Мысырдан шығу 25:1-40 KZB2010 - Bible AI

¹Сонда Жаратқан Ие Мұсаға мынаны бұйырды:

²— Исраилдің үрім-бұтағына былай де: Олар Маған сый-тартулар бағыштап ұсынсын. Шын жүрегімен ниеттенген әрбір адамнан өзінің Маған арнаған тарту-таралғысын қабылдап алыңдар.

³Олардан қабылдайтындарың мыналар болсын: алтын, күміс, қола, [1]

⁴иірілген қою күлгін, күрең қызыл, ал қызыл жүн жіптер және жіңішке иірілген зығыр жіптер, ешкінің түбіті,

⁵қызыл түске боялған қошқар терілері, борсық [2] терілері, аққараған ағашы, [3]

⁶май шамға қажетті зәйтүн майы, май жағу рәсімінде қолданылатын (майға қосылуға) немесе түтетілуге арналған хош иісті заттар, [4]

⁷сондай-ақ бас діни қызметкердің жеңсіз сырт киіміне және төс қалтасына [5] тағылатын оникс пен тағы басқа да асыл тастар.

⁸Исраилдіктер Маған арнап киелі шатыр дайындап жасасын. Мен халық арасында сол жерде тұратын боламын. [6]

⁹Бәрін де Мен саған көрсететін киелі шатыр мен ондағы бұйымдардың үлгісіне дәлме-дәл сай етіп жасаңдар!

¹⁰Аққараған ағашынан сандық жасат. Ұзындығы екі жарым, ал ені мен биіктігі бір жарым шынтақтан болсын.

¹¹Іші-сырты саф алтынмен қапталып, жоғарғы ернеуі айналдыра алтынмен әшекейленіп жиектелсін.

¹²Сандық үшін төрт алтын шығыршық құйғызып, төменгі төрт бұрышына, екеуін бір жақ бүйіріне, қалған екеуін қарама-қарсы бүйіріне бекіттір.

¹³Мұнан кейін аққарағаннан сырықтар жасатып, алтынмен қаптат.

¹⁴Сандықты көтеріп алып жүру үшін сырықтар оның екі бүйіріндегі шығыршықтардан өткізілсін.

¹⁵Сырықтар әрдайым шығыршықтарға кигізулі тұрсын, оларды алып тастауға болмайды.

¹⁶Мен өзіңе беретін Келісім жайлы айғақтарды [7] осы сандықтың ішіне салып қой.

¹⁷Сандықтың қақпағын [8] да саф алтыннан жасат. Ұзындығы екі жарым, ені бір жарым шынтақ болсын.

¹⁸[18-19] Қақпақтың екі жақ шетіне керуб деген күзетші періштелердің [9] екі мүсінін алтыннан балғамен соғып жасатып, орнатқыз. Олар қақпақпен бірге біртұтас алтыннан жасалсын.

²⁰Керуб мүсіндері қанаттарын жоғары жайып, қақпақты көлегейлеп, беттері бір-біріне қарама-қарсы, қақпаққа қарап тұрулары керек.

²¹Мен өзіңе беретін Келісім жайлы айғақтарды [10] сандыққа сал да, үстін қақпақпен жауып қой.

²²Сол жерден, Келісім сандығы қақпағының үстіндегі екі керуб мүсіндерінің ортасынан Мен саған тіл қатып, [11] Исраилдің үрім-бұтағына сен арқылы бұйыратын ережелерімнің бәрін тапсырамын.

²³Аққараған ағашынан үстел жасат, ұзындығы екі, ені бір, биіктігі бір жарым шынтақ болсын.

²⁴Үстел саф алтынмен қапталып, жақтауы айналдыра алтынмен қапталсын.

²⁵Үстелдің бетін айналдыра төрт елі бойы ернеумен жиектетіп, соны да алтынмен қаптат.

²⁶Төрт алтын шығыршық құйдырып жасатып, оларды үстелдің аяқтары орнатылған төрт бұрышына бекіттір.

²⁷[27-28] Үстелді көтеріп жүруге арналған сырықтар өткізілетін осы шығыршықтар ернеу жиегіне жақын орнатылсын. Сырықтарды аққарағаннан жасатып, алтынмен қаптат.

²⁹Үстелдің аяқ-табақтары мен табаларын және құйылып ұсынылатын сұйық тартуларға арналған құмыралары мен тостағандарын саф алтыннан жасат.

³⁰Нан тартуларын үстелге қойып отыр, олар ұдайы Менің алдымда болсын. [12]

³¹Саф алтыннан шам қойғыш та жасат. Оның тұғыры мен діңгегі, мүсінделген тармақтары, гүл тостағаншалары, қауыздары және бүршіктері түгел біртұтас алтыннан балғамен соғылып жасалсын.

³²Діңгегінен екі жағына үш-үштен алты тармақ шығуы керек.

³³[33-34] Әр тармақта шар тәрізді үш бүршіктен тараған, қауыздарын ашқан үш алтын бадам гүлінен болсын. Ал ортадағы діңгекте дәл осындай төрт алтын бадам гүлі болуы керек.

³⁵Бұл гүлдердің бүршіктері екі жаққа созылған үш жұп тармақтың діңгектен шыққан жерлерінің астыңғы жағында орналассын.

³⁶Тармақтарымен, бүршіктерімен бірге шам қойғыш түгелдей біртұтас саф алтыннан балғамен соғылып жасалсын.

³⁷Шам қойғышқа жеті май шамын дайындатып, оларды жарығы алдыңғы жағына түсіп тұратын етіп діңгек пен тармақтардың бастарына орнат.

³⁸Оның білте түзеткіштері мен табақшаларын [13] да саф алтыннан жасат.

³⁹Шам қойғыш пен қажетті құрал-жабдықтары үшін бір ат басындай [14] саф алтын жұмсалсын.

⁴⁰Байқа, барлығын саған осы тау басында көрсетілген үлгіге сай жасайтын бол!