Нақыл сөздер 22:1-29 KZB2010 - Bible AI

¹Ізгі атағың бағалы зор байлықтан, Жақсы абыройың құнды күміс-алтыннан.

²Бай мен жарлының ортақ қасиеті: Екеуін де жаратты Тәңір — Құдай Иелері.

³Зерделі жан қатер көріп бас сауғалар, Аңғал адам жүре беріп, зиян табар.

⁴Жаратқанды терең қастерлейтін кішіпейілдер Байлық, абырой, шынайы өмірге кенелер.

⁵Зымиянның [1] жолы тікен мен торға толған, Өзіне сақ болған аулақ жүрсін содан.

⁶Баланы жастан салсаң тура жолға, Есейгенде ол содан таймайды да.

⁷Бай адам жарлыға үстемдік құрар, Қарыздар қарыз бергеннің құлы болар.

⁸Әділетсіздік сепкен пәлені орар, Оның қаһарының сойылы сынып қалар. [2]

⁹Жомарт жан жарлымен нанын бөлісер, Құдайдың жарылқауына кейін кенелер. [3]

¹⁰Қорлаушыны қусаң, жанжалдан арыларсың, Ұрыс-керіс, балағаттан ада боларсың.

¹¹Жүрек пәктігін жақтыратын, Ұнамды сөздерді айтатын Жанға патша да болар жақын.

¹²Жаратқан Ие білімге қырағы болар, Опасыздардың істерін Ол құлдыратар.

¹³«Далада арыстан бар, алаңда көзімді құртар» Деп жалқау ұдайы сылтау айтар.

¹⁴Азғын әйелдің сөздері — терең шыңырау, Тәңір Ие жақтырмаған пенде соған құлар-ау.

¹⁵Баланың жүрегінде надандық бар, Тиянақты тәрбие [4] оны содан арылтар.

¹⁶Баюы үшін кедейге жәбір көрсететін Әрі байға сыйлықтар бере беретін Адам болады кедейленетін.

¹⁷Даналардың айтқандарын құлақ түріп тыңда, Бермек тәліміме зейініңді бағышта!

¹⁸Игі болар оларды есіңде сақтасаң, Әрі аузыңнан да ешбір тастамасаң.

¹⁹Сенімің болсын деп Жаратқан Иемізде, Осыны бүгін үйретемін дәл өзіңе.

²⁰Саған ақыл-кеңес пен білім беру үшін Мына отыз нақылды [5] жазған едім,

²¹Ақиқат, адал сөздер үйренуің үшін, Өзіңді жібергенге дәл жауап беруің үшін:

²²Жарлыны жарлы деп тонама, Бейшараны дау сотында қыстама!

²³Солардың мүдделерін Жаратқан Ие қорғайды, Оларды тонағандардың өздерін тонайды. [6]

²⁴Ызақормен дос болма, Ашушаңмен байланыспа.

²⁵Әйтпесе өзің соған еліктейсің, Тұзаққа түсіп, күйреп кетесің.

²⁶Қол алысып, бөтеннің қарызына Кепіл болатындай ақылсыз болма! [7]

²⁷Болмағанда төлейтін ақшаң Төсегіңді тартып алар астыңнан.

²⁸Ата-бабаң салып кеткен межеңді Жасырын жылжытып, ұлғайтпа жеріңді.

²⁹Кездестірсең біреуді ісіне аса шебер, Жай адамдарға емес, патшаларға қызмет етер.