Патшалықтар 2-ж. 23:1-39 KZB2010 - Bible AI

¹Мынау Дәуіттің соңғы өсиеті, Есей ұлының пайғамбарлық сөздері, Жақып сенген Құдай тағайындаған, [1] Мәртебесін көтерген патшасының — Исраилдің сүйікті жыршысының [2] Келер ұрпаққа қалдырған өсиеті.

²Мен арқылы Жаратқанның Рухы сөйледі, Аузымнан Оның сөзі шығып келді.

³Исраил арқа сүйер жартас — Құдай Маған бірде былай деп айтқан еді:

³ Халықты әділдікпен басқарушы, Құдайды қастерлеп билік құрушы —

⁴Бұлтсыз аспандағы таңғы шапақтай, Жерден көк шөп өсіріп шығаратын Жаңбырдан кейінгі күн нұрындай.

⁵Менің әулетімді Құдай бекіткен, Мәңгі Келісім жасады Ол менімен Барлық жағынан да толық реттелген. Құдай бұл уәдесін нақты бекіткен, Әлде Ол мені ұдайы қорғамай ма, Бар жүрек қалауымды сыйламай ма?

⁶Ал сұмдар Құдайға жақындамайды, Олар адамдар қолына да алмайтын Пайдасыз тікенектерге ұқсайды.

⁷Соларды құртпақ болғандар бұл үшін Темір құрал, найза сабын қолданады, Жатқан жерлерінде өртеп жояды. [3]

⁸Дәуіттің батырларының аты-жөндері мыналар: Ахаман ұлы Яшобам-Бәсебет, [4] ол Үш батырдың басшысы болды. Бір шайқаста ол сегіз жүз жау сарбазын сүңгісімен түйреп өлтірген еді.

⁹Үш батырдың екіншісі Ахоахтың ұрпағы Додайдың ұлы Елазар [5] болатын. Ол Дәуіттің қасында жүріп (Пас-Даммим деген жерде) шайқасқа жиналып тұрған філістірлерді менсінбей оларға тойтарыс берді. [6] Исраилдік жасақшылар жаудан шегінгенмен,

¹⁰Елазар сол жерде берік тұрды. Філістірлерді соққылай бергеннен қолы әбден шаршап, семсеріне қарысып қалды. Сол күні Жаратқан Ие оны үлкен жеңіске жеткізді. Әскер жасағы Елазарға қайта оралғанда, оларға өлгендердің қару-жарақтарын олжалаудан басқа жұмыс болмады.

¹¹Одан кейінгі батыр харарлық Аге ұлы Шаммах. Філістірлер бірде (Лехиде) бұршақ [7] бітік шыққан бір егістіктің қасына жиналған еді. Исраилдің жасағы олардан қашып кетті.

¹²Бірақ Шаммах егістіктің ортасында тұрып алып, філістірлерді қырып-жойып, егістікті аман сақтап қалды. Осылайша Жаратқан Ие Шаммахты үлкен жеңіске жеткізді.

¹³Егін орағы кезінде Отыз басты жауынгердің үшеуі Адуллам үңгірінде тұрып жатқан Дәуітке келді. Осы кезде філістір әскерінің бір бөлігі Рефаим аңғарында қостарын тікті. [8]

¹⁴Бетлехемде де олардың қарауылдары орналасқан еді. Ал Дәуіт жасырынып, бекінуге ыңғайлы таулы жерді [9] паналап жүрді.

¹⁵Сонда Дәуіт: «Шіркін, маған біреу Бетлехемдегі қала қақпасының жанындағы құдықтан су әкеліп берсе ғой!» — деп аңсады. [10]

¹⁶Үш батыр філістір әскер қостарынан білдіртпей өтіп, Бетлехем қақпасының жанындағы құдықтан су тартып алып, Дәуітке әкелді. Бірақ Дәуіт суды ішкісі келмей, оны Жаратқан Иеге сұйық тарту іспетті бағыштап жерге төгіп тастап:

¹⁷«Жаратқан Ие мені мұны істеуден сақтай көрсін! Мен бұл суды қалай ішемін? Ол бастарын өлімге тігіп, оны алып келген адамдардың қаны іспетті ғой!» — деді. Содан Дәуіт суды ішуден бас тартты. Міне, Үш батырдың ерлік істері осындай болды.

¹⁸Зеруяның ұлы Жоғабтың туған інісі Әбішай Отыз батырдың басшысы еді. [11] Әбішай сүңгісімен үш жүз жауын түйреп өлтіріп, Үш батырдікіндей атақты иемденді.

¹⁹Басқа Отыз батырдан да даңқты болып, оларға басшылық еткенмен, Әбішай Үш батырдың дәрежесіне жете алмады. [12]

²⁰Кәбіселдік Еходай [13] ұлы Бенаях та ерлік істер жасаған мықты жауынгер болды. Арыстандай күшті екі моабтық жауынгердің көздерін жойған сол еді. Бенаях қар жауып тұрған бір күні ұраға түсіп, оның ішіндегі арыстанды өлтірді.

²¹Бенаях бір алып мысырлықтың да көзін құртты. Мысырлықтың қолында сүңгі болса да, Бенаях оған қарсы бір таяқпен ғана шығып, мысырлықтың қолынан сүңгісін тартып алып, оны сонысымен түйреп өлтірді.

²²Еходай ұлы Бенаяхтың ерлік істері осындай еді. Жаңағы Үш батыр сияқты ол да даңқты жауынгер болатын.

²³Отыз батырдың ішіндегі ең даңқтысы сол еді, алайда Үш батырдың дәрежесіне жете алмады. Дәуіт Бенаяхты өзінің ұлан бөлімдерінің басшысы [14] етіп қойды.

²⁴Атақты Отыз батыр мыналар болатын: Жоғабтың туған інісі Асахил, бетлехемдік Додо ұлы Елханан,

²⁵хародтық Шаммах, хародтық Елика,

²⁶пәлеттік Хелес, текоялық Икеш ұлы Ирақ,

²⁷анатоттық Әбиезер, хушалық Сипхай, [15]

²⁸ахоахтық Салмон, нетопаттық Маһарай,

²⁹нетопаттық Бағанах ұлы Хелеп, Буняминдегі гибеялық Рибай ұлы Іттай,

³⁰пиратондық Бенаях, нахале-ғағаштық [16] Хиддай;

³¹арбаттық Әби-Албон, бахуримдік Азмаует,

³²шағалбондық Әлиахпа, Яшеннің ұлдары,

³³харарлық Шаммах ұлы Жонатан, харарлық Шарар ұлы Ахиям,

³⁴мағахаттық Ахасбай ұлы Әліпәлет, ғилолық Ахитопел ұлы Елиям,

³⁵кәрмелдік Хесрай, әрабтық Пағарай,

³⁶собалық Натан ұлы Иғал, ғадтық Бани,

³⁷аммондық Селек, Сарұяның ұлы Жоғабтың қару-жарағын тасушы бероттық Нахарай,

³⁸итірлік [17] Ирақ, итірлік Гәреб және

³⁹хеттік Ұрия. [18]

³⁹Батырлардың жалпы саны отыз жеті болды.