Руларды санау 13:1-34 KZB2010 - Bible AI

¹[1] Мұнан кейін халық Хасироттан көшіп шығып, Паран атты елсіз далаға жетіп, қостарын тікті.

²Сонда Жаратқан Ие Мұсаға былай деп тапсырды:

³«Мен Исраил халқына табыстап отырған Қанахан елін барлап келу үшін сол жерге адамдар жібер. Ата-бабаларынан тараған он екі рудан бір-бір басшыдан жібер».

⁴Сонымен Мұса оларды Жаратқан Иенің нұсқауы бойынша Паран атты иен даладан жұмсап жіберді. Олардың барлығы Исраил халқының басшыларынан болатын.

⁵Олардың аты-жөндері мыналар: Рубен руынан Зақур ұлы Шаммуа,

⁶Шимон руынан Хори ұлы Шапат,

⁷Яһуда руынан Ефунне ұлы Халеп,

⁸Исашар руынан Жүсіп ұлы Иғал,

⁹Ефрем руынан Нұн ұлы Ошия, [2]

¹⁰Бунямин руынан Рафу ұлы Палти,

¹¹Забулон руынан Соди ұлы Ғаддиел,

¹²Жүсіптен тараған Манаса руынан Суси ұлы Ғадди,

¹³Дан руынан Гемалли ұлы Әмиел,

¹⁴Ашир руынан Михайл ұлы Сетур,

¹⁵Нафталим руынан Уопси ұлы Нахби,

¹⁶Ғад руынан Махи ұлы Геуел.

¹⁷Мұсаның елді барлап келуге жіберген адамдарының есімдері осылар. Ал Мұса Нұн ұлы Ошияға Ешуа деген жаңа ат қойды. [3]

¹⁸Сонымен Мұса оларды Қанахан елін барлап келуге жіберіп, мынадай тапсырма берді: «Осы Негев аймағы арқылы елдің таулы жеріне өрлеп барыңдар.

¹⁹Байқап көріңдер: ел қандай екен? Онда тұрып жатқан халықты да байқаңдар, қуатты ма, әлде әлсіз бе, көп пе, әлде аз ба?

²⁰Халықтың тұрып жатқан жері де қандай: жақсы ма, жоқ па? Қандай елді мекендерде тұрады екен, шатырлы қоныстарда ма, әлде бекіністі қалаларда ма?

²¹Жерлерінің топырағы қандай: құнарлы ма, әлде құнарсыз ба? Онда ағаш өсе ме, жоқ па? Батыл да қайсар болып сол елдің жемістерінен де біраз алып келіңдер!» — Бұл жүзім піскен мезгіл болатын.

²²Жіберілгендер елге өрлеп барып, оны Сін [4] атты елсіз даладан бастап (солтүстіктегі) Лебо-Хаматқа қарай баратын жолдағы Рехоб аймағына дейін [5] шарлап, барлап шықты.

²³Олар елге Негев арқылы еніп, Хеброн [6] қаласына жетті. Онда Анақтың ұрпақтары Ахиман, Шешай, Талмай деген алыптар тұратын. Ал Хеброн Мысырдағы Соған [7] қаласынан жеті жыл бұрын салынған қала.

²⁴Мұнан кейін олар Ешқол аңғарына барып, онда жүзім бұтасынан шоғы бар бір сабағын кесіп алып, оны ағаш бақанға іліп, екеулеп көтеріп кетті. Сонымен бірге олар анар, інжір жемістерінен де ала жүрді.

²⁵Сол жер исраилдік барлаушылардың кесіп алған жүзім шоғына бола Ешқол (демек, жүзім шоғы) аңғары деп аталып кетті.

²⁶Жіберілгендер қырық күн бойы елді барлап болғаннан кейін қоныстарына қайта оралды.

²⁷Олар Паран даласындағы Қадеште [8] жиналып тұрған Мұса мен Һаронның және Исраил халқының бүкіл жамағатының алдында өздерінің көріп-біліп келгендерін айтып беріп, алып келген жемістерін де көрсетті.

²⁸Барлаушылар Мұсаға баяндап былай деді:

²⁸— Біз сіз жіберген елге барып келдік. Онда шынында да ағы мен балы молынан ағып жатыр екен. Міне, мыналар — сол елде өсетін жемістер.

²⁹Алайда онда тұратын халық сондай мықты екен! Ондағы қалалар да бекіністі әрі өте үлкен. Біз одан тіпті Анақтың алып ұрпақтарын да көрдік.

³⁰Елдің оңтүстігіндегі Негев аймағында Амалек тайпасы тұрады. Ортадағы таулы аймақта хеттіктер, ебустіктер, аморлықтар орналасыпты. Қанахандықтар (батыстағы) теңіз жағасында және (шығыстағы) Иордан өзені бойында қоныстанған екен.

³¹Ал Халеп Мұсаның алдында халықты тыныштандырып: — Уа, халайық, біз елге өрлеп барып, оны иемденіп алайық! Соны сөзсіз істей аламыз! — деді.

³²Бірақ онымен бірге барып келген басқалар:

³²— Жоқ, біз сол халыққа қарсы шыға алмаймыз, олар бізден соншама күшті! — деп онымен келіспеді.

³³Сол он барлаушы [9] исраилдіктердің арасында өздері барлап келген ел туралы жағымсыз хабар таратты: «Біз аралап, барлап келген сол ел өз тұрғындарын жалмайтын жер екен! Онда тұрып жатқан халықтың адамдары денелі.

³⁴Бұл жерде алыптың тұқымынан [10] тараған Анақтың ұрпақтары да тұрады! Біз олардың жанында өзімізді шегіртке іспетті кішкентай сезіндік! Олар да бізге солай қарады».