Руларды санау 33:1-56 KZB2010 - Bible AI

¹Мұса мен Һаронның бастауымен өз топтары бойынша Мысыр елінен шыққаннан кейін исраилдіктер көшіп-қонып жүрген сапарында төмендегі жерлер арқылы өтті.

²Мұса Жаратқан Иенің бұйрығымен көшіп-қонып жүрген жолдарында өздері аялдаған жерлердің аттарын жазып алып отырды. Солар мыналар еді:

³Бірінші айдың он бесінші күні, құтқарылу мейрамынан кейінгі келесі күні исраилдіктер мысырлықтардың көз алдында Рамсес қаласынан нық сеніммен алға басып шықты. [1]

⁴Жаратқан Ие мысырлықтардың барлық тұңғыштарын қырғынға ұшыратқандықтан, олар сол күні тұңғыштарының мәйіттерін жерлеп жатты. Себебі Жаратқан Ие олардың жалған тәңірлеріне Өзінің үкімін жүзеге асырған еді. [2]

⁵Исраилдіктер Рамсестен көшіп шығып, Соқотқа жетіп, қостарын тікті, [3]

⁶олар сол жерден шығып, айдаланың шет жағындағы Етамға [4] барып тоқтады.

⁷Халық Етамнан шығып, Бағал-Сефонның шығысындағы Пи-Һахиротқа қарай кері бұрылды да, Миғдолдың маңында аялдады.

⁸Кейін олар Пи-Һахироттан шығып, Қамысты теңізден [5] өтіп, арғы жақтағы иен далаға жетті. Олар Етамның жанындағы айдаламен үш күн жол жүріп, Мараға барып аялдады; [6]

⁹Марадан шығып, Елимге жетіп тоқтады. Сол шұратта [7] он екі су көзі, жетпіс құрма ағашы болды.

¹⁰Кейін халық Елимнен шығып, Қамысты теңіздің жағасына жетіп, қостарын тікті;

¹¹бұл жерден шығып, олар Сін атты елсіз далаға [8] барып аялдады.

¹²Халық сол даладан шыққаннан кейін Допқаға,

¹³Допқадан шығып, Алушқа,

¹⁴Алуштан шығып, Рефідимге [9] жетіп тоқтады. Сол жерде халық ішетін ауыз су болмады.

¹⁵Олар Рефідимнен шығып, Синай атты елсіз далаға [10] жетіп тұрақтады.

¹⁶Кейін халық сол даладан шығып, Қиброт-Хатауаға,

¹⁷сол жерден шығып, Хасиротқа,

¹⁸Хасироттан шығып, Ритмаға жетіп, қостарын тікті.

¹⁹Олар Ритмадан шығып, Римнон-Пәреске,

²⁰сол жерден шығып, Либнаға,

²¹Либнадан шығып, Риссаға,

²²Риссадан шығып, Кеһелатаға жетіп аялдады.

²³Сол жерден олар Шәфер тауына барып,

²⁴Шәферден Харадаға жетіп,

²⁵Харададан Макехелотқа,

²⁶Макехелоттан Тахатқа,

²⁷Тахаттан Тарахқа барып, қонды.

²⁸Сол жерден Митқаға,

²⁹Митқадан Хашмонаға,

³⁰одан Мосеротқа,

³¹Мосероттан шығып, Бене-Яқанға жетіп, аялдады.

³²Бене-Яқаннан Хор-Агидгадқа,

³³содан Жотбатаға,

³⁴Жотбатадан Абронға барып тоқтады.

³⁵Аброннан шығып, Есион-Гәберге,

³⁶сол жерден қайтадан Сін атты елсіз далаға [11] жетіп тоқтады. Сол аймақ Қадеш [12] деп те аталады.

³⁷Қадештен шыққаннан кейін халық Едом елінің шетіндегі Һор тауына [13] жетіп тұрақтады.

³⁸Діни қызметкер Һарон Жаратқан Иенің айтқанына сәйкес Һор тауына көтеріліп, сол жерде көз жұмып дүние салды. [14] Бұл, исраилдіктердің Мысыр елінен шыққаннан кейінгі қырқыншы жылдың бесінші айының бірінші күні болды.

³⁹Дүние салғанда Һаронның жасы жүз жиырма үште еді.

⁴⁰Сол кезде Қанахан елінің оңтүстік (Негев) бөлігінде тұрып жатқан Арадтың қанахандық патшасы исраилдіктердің көшінің елге жақындап қалғаны туралы естіді.

⁴¹Халық Һор тауынан шығып, Салмонаға,

⁴²одан Пунонға,

⁴³Пуноннан Оботқа,

⁴⁴Моаб елінің шекарасындағы Ие-Абаримге жетіп тоқтады.

⁴⁵Сол жерден олар Дибон-Ғадқа,

⁴⁶одан Алмон-Диблатаимға,

⁴⁷содан Абарим қыратындағы Небо тауына [15] жетіп, қостарын тігіп тұрақтады.

⁴⁸Халық Абарим қыратынан шыққаннан кейін Иерихонға қарама-қарсы, Иордан өзенінің жағалауындағы Моабтың елсіз алқаптарына жетіп қонды.

⁴⁹Сонда олар Моабтың елсіз алқаптарында Иордан өзенін бойлап Бет-Ешимоттан Әбел-Ситтимге дейінгі аралықта жайғасты.

⁵⁰Жаратқан Ие сол жерде, Иерихонға қарама-қарсы, Иорданның жағалауындағы Моабтың елсіз алқаптарында, Мұсаға тіл қатып былай деді:

⁵¹«Исраилдіктерге мынаны айт: Сендер Иордан өзенінен өтіп, Қанахан еліне кірген кезде

⁵²елде тұрып жатқандардың барлығын қуып шығып, олардың ойып жасаған және балқытып құйған тәңір мүсіндерінің бәрін де жойып, жоқ қылыңдар! Биіктеу жерлердегі табыну орындарын да талқандап қиратыңдар!

⁵³Елді иемденіп, сонда қоныстаныңдар, себебі Мен сол елді сендердің иеліктеріңе беріп қойғанмын.

⁵⁴Оның жерін жеребе тастап әулеттерің бойынша өзара бөлісіп алыңдар. Халқының саны көп әулетке көбірек, ал халқының саны аз әулетке азырақ жер берілетін болсын. [16] Жеребе бойынша кімге қай жер үлесіне тиген болса, сол жер онікі болады. Жерді сендердің ата-бабаларыңнан тараған руларың бойынша бөлісіп, мұралық меншіктерің ретінде иемденіп алыңдар.

⁵⁵Ал егер елдің тұрғындарын қуып жібермесеңдер, онда елде қалып қойғандары көздеріңе тікендей кіріп, денелеріңе жаңқадай қадалып, қоныстанған сол елдеріңде сендерге жәбір көрсететін болады.

⁵⁶Сонда Мен оларға істемек болғандарымды сендердің өз бастарыңа түсіремін».