Тімотеге 1-хат 3:1-16 KZB2010 - Bible AI

¹«Егер біреу қауым басқарушысы болуға ынталанса, оның игілікті істі қалағаны». Бұл — дәл айтылған шынайы сөз.

²Ал қауым басқарушысының ешбір кінәратсыз таза болуы қажет: ол әйеліне адал, [1] салауатты, байсалды, әдепті, қонақжай және қабілетті оқытушы,

³не арақ-шарапқа құмар, не ұрыншақ та емес, шыдамды, айтыс-тартыстан аулақ жүретін, ақшаға да құнықпайтын жан болуға тиіс.

⁴Ол отбасына жақсы басшылық жасап, балаларын өзін құрметпен тыңдайтындай етіп тәрбиелеуі шарт.

⁵Өйткені өз отбасына басшылық ете алмаған адам қалайша Құдайдың қауымын қамқорлай алады?

⁶Басқарушы сенім жолына жуықта ғана түскен біреу болмауға тиіс. Әйтпесе ол әзәзіл шайтан іспетті мақтаныштан кеудесін көтеріп, Құдайдың үкіміне ұшырауы мүмкін. [2]

⁷Сондай-ақ, масқараланып, шайтанның торына түсіп кетпеуі үшін [3] қауымнан тыс жұрттың да оған жақсы куәлік берулері керек.

⁸Сол сияқты, қауым қызметшілері де байыпты, өтірік айтпайтын жандар болып, маскүнемдік пен пайдақұмарлықтан аулақ жүрулері қажет.

⁹Олар бізге сенім туралы ашылған шынайы ілімдерді [4] ұстанып, таза ар-ұжданмен өмір сүруге ұстануға тиіс. [5]

¹⁰Бұлар да алдымен сыналсын. [6] Содан кейін, егер айыпсыз болса, міндеттеріне кіріссін.

¹¹Сондай-ақ (қауым қызметшілерінің) әйелдері [7] де байыпты, өсек айтпайтын, салауатты, қай нәрседе де адал болуға тиіс.

¹²Қауым қызметшілері әйелдеріне адал болып, [8] балалары мен отбасыларына жақсы басшылық етулері керек.

¹³Міндеттерін жақсы атқаратындар зор беделге және Мәсіх Исаға деген сенімде үлкен батылдыққа ие болады.

¹⁴Жақын арада саған баруға үміттенсем де, осы хатты жазып отырмын.

¹⁵Сөйтіп, егер кешіксем, сенушілердің «Құдайдың отбасының» мүшелері ретінде [9] қалай әрекет етуге тиіс екенін сен білетін боласың. Ал Оның «отбасы» — мәңгі тірі Құдайдың қауымы; ол шындықты бағана мен тіреу іспетті көтеріп ұстайды. [10]

¹⁶Құдайға ұнамдылық туралы бізге ашылған мына құпияның ұлы екендігі еш шүбәсіз:
Мәсіх [11] адам болып дүниеге келді, Киелі Рух әділдігін дәлелдеді, Содан Мәсіх періштелерге көрінді, Халықтарға Ол жарияланды, Жер жүзінде Оған көбі иланды, Ол ұлылықпен көкке қабылданды.