Тімотеге 2-хат 2:1-26 KZB2010 - Bible AI

¹Ал сен, балам менің, Мәсіх Исаның сыйлайтын рақымымен күшейе бер.

²Өзің менен естіп, көптеген кісілер растаған шынайы ілімді [1] басқаларға да тәлім беруге қабілеті бар, сенімді жандарға аманатта!

³Иса Мәсіхтің «адал сарбазы» ретінде азаптарды бірге көр!

⁴Есіңде болсын: ешбір сарбаз тұрмыстық істермен шырмалмайды, қайта, қолбасшысының көңілінен шығуға ұмтылады.

⁵Сондай-ақ, балуан күрес тәртібін бұзса, жүлдені жеңіп ала алмайды. [2]

⁶Жиналған өнімнен үлесін ең алдымен жан сала еңбектенген диқан алуға тиіс. [3]

⁷Айтқандарым туралы ойлана бер, сонда Құдай саған бәріне түсінік береді.

⁸Дәуіттің ұрпағынан шыққан, өлімнен қайта тірілген Иеміз Иса Мәсіхті әрдайым есіңде ұста! Мен уағыздаған Ізгі хабар — осы.

⁹Соған бола азап шегіп, қылмыскердей бұғауланудамын. Алайда Құдайдың сөзі бұғаулы емес! [4]

¹⁰Сондықтан мен Құдайдың таңдаған адамдары үшін, олардың да Иса Мәсіх арқылы құтқарылып, мәңгілік ұлылықты иемденулері үшін бәріне де төземін.

¹¹Мынау — дәл айтылған, шынайы сөз:
Онымен бірге өмір сүретін де боламыз.

¹¹«Егер Мәсіхпен бірге өлген болсақ, [5]

¹²Егер қиыншылықтарға төзе берсек, Онымен бірге патшалық ететін де боламыз. Ал егер Мәсіхті мойындаудан бас тартсақ, Ол да бізді мойындаудан бас тартпақ [6].

¹³Біз айтқанымызға адал болмасақ, Ол айтқанына адал болып қала береді, [7] Өз болмысымен келіспейтінді Ол істемейді».

¹⁴Осыларды бәрінің есіне түсіріп, сөздер туралы айтыспасын [8] деп Құдай алдында мықтап ескерт. Ондай айтыстардан ешқандай пайда жоқ. Қайта, олар тыңдағандардың сенімдеріне зор нұқсан келтіреді.

¹⁵Сен кінәратсыз жұмысшы [9] — Құдайдың шынайы сөзін дұрыс үйретуші ретінде Оған ұнамды болуға жан сала ұмтыл!

¹⁶Жай, бос әңгімелерден аулақ жүр. Бұларды айтатындар Құдайдың адал жолынан одан бетер адасып кетеді.

¹⁷Олардың сөздері қабынған жарадай жайыла беріп, рухани денені құртпақ. Солардың арасында Үменей мен Філет те бар.

¹⁸Олар шындық жолынан тайып, «Қайта тірілу болып кетті», — деп жариялап, кейбіреулердің сенімдерін жоюда.

¹⁹Бірақ Құдайдың салған негізі [10] берік тұрады, онда мына сөздер «мөрленіп» жазылған: «Иеміз Өзінікі болған адамдарын жақсы біледі» [11] және «Иеміздің атын атап сиынатын әркім жамандықтан алшақтасын!»

²⁰Бір үлкен үйде алтын мен күмістен ғана емес, ағаш пен қыштан жасалған ыдыс-аяқтар да бар: алдыңғылары қадірмен тұтылса, соңғылар қадір-құрметтен ада. [12] (Сол сияқты, қауымның көптеген мүшелері игі істерімен Құдайды құрметтесе, басқалары жамандықтарымен Оның даңқы мен ісіне нұқсан келтіреді.)

²¹Сол себепті, кім өзін соңғылардан арылтып таза ұстаса, қадірлі ыдыстар іспетті Қожайынына бағышталған, пайдалы және әрбір ізгі істер үшін қолданылуға дайын болады.

²²Сонымен жастықтың құмарлықтарынан бас тартып, пәк жүрекпен Иемізге сиынатындардың бәрімен бірге әділдік, сенім, сүйіспеншілік және татулыққа ұмтыл.

²³Ақылсыз, мәнсіз айтыстардан аулақ бол, олардың дау-жанжал туғызатынын білесің ғой.

²⁴Жаратқан Иенің қызметшісінің жанжалдасуына болмайды. Ол бәріне бірдей жылы жүзді, жақсылап тәлім беретін, сабырлы болып,

²⁵қарсыластарын ілтипаттылықпен түзету қажет. Мүмкін болса, [13] Құдай оларды өкіндіріп, шындықты мойындатар.

²⁶Осылайша олар ақылға келіп, өзінің еркіне бағындыру үшін ұстап алған шайтанның тұзағынан босап, құтыла алмақ.