Уағыздаушы 3:1-22 KZB2010 - Bible AI

¹Өз уақыты бар әр нәрсенің, Осы дүниеде [1] істелінетін Әр істің мезгілі бар өзінің.

²Өз уақыттары бар туудың әрі қайтыс болудың, Тұқым себудің әрі тамырымен жұлудың. [2]

³Өз мезгілдері бар өлтірудің әрі сауықтырудың, Бұзудың әрі қайта тұрғызудың.

⁴Өз кезеңдері бар қайғырып жылаудың әрі күлудің, Жоқтау айтудың әрі би билеудің.

⁵Өз мезгілдері бар тас лақтырудың әрі оларды жинаудың, [3] Құшақтасудың әрі содан жалтарудың.

⁶Өз кездері бар іздеп жүрудің әрі жоғалтудың, Сақтаудың әрі лақтырып тастаудың.

⁷Өз уақыттары бар жыртудың әрі тігіп жөндеудің, Үндемеудің әрі сөйлеудің.

⁸Өз кездері бар сүюдің әрі жек көрудің, Соғысудың әрі татуласудың.

⁹Еңбек еткеннің өз бейнетінен көретін не пайдасы бар?

¹⁰Құдайдың адам баласына жүктеген міндеттеріне [4] де назар аудардым.

¹¹Құдай әр нәрсені [5] өз уақытына сай көрікті етіп жаратты. Ол адамның жан дүниесіне мәңгілікті сезетін түйсікті дарытты. Әйтсе де адамдар Құдайдың әуел бастан аяғына дейін не істегендерін түсіне алмайды. [6]

¹²Адам үшін шаттану мен жақсылық жасаудан артық ештеңенің жоқ екенін ұқтым.

¹³Осылай әрбір адам ішіп-жеп, еткен еңбегінен қанағат тапсын. Бұл да Құдайдың берген сыйы. [7]

¹⁴Құдай не істесе, соның мәңгі болатынын, одан ештеңе алынып, оған ештеңе қосылмайтынын да ұқтым. Құдай бұны Өзін адамдар терең қастерлеу үшін солай етті.

¹⁵Болып жатқан және болашақта болатын жайттар бұрын да болып кеткен. Ал Құдай өтіп кеткен солардың қайталануын қадағалайды. [8]

¹⁶Мен, сондай-ақ, осы өткінші дүниеде тағы мынаны да байқадым: Әділдік іске асуға тиіс орында — зұлымдық, әрі әділет орындалуға тиіс жерде сұмдық жүреді екен!

¹⁷Сонда мен іштей: «Құдай әділді де, зұлымды да сотында тексеретін болады. Өйткені сол жайттардағы әрбір ой-ниеттің және әрбір істің сыналып тексерілетін уақыты бар», — дедім.

¹⁸Мен тағы адам баласы туралы былай деп те ойладым: «Құдай оның тәндік жағынан хайуан секілді екенін көрсету үшін оны сынақтан өткізеді.

¹⁹Өйткені адам баласының да, хайуанның да ұшырайтын тағдыры бірдей: адамның өлетініндей, хайуан да өледі. Екеуінің де кеудесінде тіршілік лебі бар, осы жағынан адамның хайуаннан артықшылығы жоқ. Себебі олардың бәрі де өткінші.

²⁰Барлығының да барар жері біреу: бәрі де топырақтан жаратылған және қайтадан топыраққа айналады. [9]

²¹Адам баласының жанының көкке көтерілетінін, ал хайуанның жанының төменге, жер қойнына кететінін кім біледі?» [10]

²²Сонымен еткен еңбегінен [11] қанағат табу адам үшін ең жақсы нәрсе екеніне көзім жетті. Бұл оның үлесіне тиген. Өйткені кейінірек болатын жайттарды оған кім көрсете алады?