Шежірелер 1-ж. 18:1-17 KZB2010 - Bible AI

¹Біраз уақыт өткеннен кейін Дәуіт філістірлерге шабуыл жасап, оларды өзіне бағындырды. Содан ол Ғат қаласы мен оған қарасты елді мекендерді філістірлердің қолынан тартып алды.

²Дәуіт моабтықтарды да жеңді. Енді олар Дәуітке құлдық ұрып, оған алым-салық төлейтін болды.

³Бірде Дәуіт Евфрат өзенінің жағасындағы билігін бекітуге аттанғанда, Соба елінің патшасы Ададәзерге [1] Хаматқа дейін шабуыл жасап, оны жеңіп шықты.

⁴Сонда Дәуіт оның мың соғыс күймесін, жеті мың аттылы және жиырма мың жаяу жасақшысын қолға түсірді. Дәуіт жаудың соғыс күймелеріне жегілетін барлық жылқыларының тілерсектерін қиып тастап, [2] жүз соғыс күймесіне жетерлік аттарды ғана аман қалдырды.

⁵Соба патшасы Ададәзерге дамаскілік арамалықтар [3] көмекке келген кезде, Дәуіттің жасағы олардың жиырма екі мың жауынгерін қырып салды.

⁶Содан Дәуіт Дамаск қаласы мен оның айналасына өз қарауылдарын орналастырды. Осылай арамалықтар Дәуітке құлдық ұрып, оған алым-салық төлейтін болды. Дәуіт қайда барса да, Жаратқан Ие оны қолдап-қорғап, жеңіске жеткізіп отырды. [4]

⁷Дәуіт Ададәзердің нөкерлерінің алтын жалатқан қалқандарын жинап, Иерусалимге алып келді.

⁸Ададәзердің қол астындағы Тебах пен Қун қалаларынан Дәуіт көп мөлшерде қола олжалап алды. Сол қоладан кейінірек Сүлеймен ғибадатханадағы «теңіз» деп аталған дәу қазанды, бағаналарды және түрлі қола бұйымдарды жасатты. [5]

⁹Хамат елінің патшасы Тоу [6] Дәуіттің Соба патшасы Ададәзердің бүкіл әскерін жеңгенін естіді.

¹⁰Сонда ол өз ұлы Жорамды [7] Дәуіт патшаға жіберіп, жеңісімен құттықтаған сәлемін жолдады. Себебі Ададәзер Тоу патшамен жауласып жүрген болатын. Жорам Дәуітке алтын, күміс, қоладан жасалған әр түрлі бұйымдарды ала келіп, сыйға тартты.

¹¹Дәуіт патша осы заттарды Жаратқан Иеге бағыштады. Ол бұрынырақ жеңген барлық елдерден: Едом, Моаб, аммондықтар, філістірлер және амалектіктерден алынған күміс пен алтынды да осылай Жаратқан Иеге арнаған еді.

¹²Сарұяның ұлы Әбішай Тұзды аңғарда он сегіз мың едомдықты жеңіп шықты.

¹³Дәуіт Едом еліне қарауылдарын орналастырып, халықтың барлығы оған бағынышты болды. Дәуіт қайда барса да, Жаратқан Ие оны қолдап-қорғап, жеңіске жеткізіп отырды. [8]

¹⁴Дәуіт бүкіл Исраилге билік жүргізіп, күллі халықтың арасында заңдылық пен әділдікті жүзеге асырды.

¹⁵Сарұяның ұлы Жоғаб [9] — әскер қолбасшысы, Ахилуд ұлы Жосапат — уәзір әрі жылнамашы, [10]

¹⁶Ахитұб ұлы Садық [11] пен Абиятар ұлы Ахимәлік — діни қызметкерлер, Серая [12] — хатшы,

¹⁷әрі Еходай ұлы Бенаях кереттік және пелеттік [13] ұлан бөлімдерінің қолбасшысы болды. Дәуіттің ұлдары да патшаның қызметінде тұрды.