Шежірелер 1-ж. 24:1-31 KZB2010 - Bible AI

¹Һароннан тараған діни қызметкерлер арнайы топтарға бөлініп [1] міндеттерін атқаратын. Һаронның ұлдары: Надаб, Әбиһу, Елазар және Ітамар. [2]

²Надаб пен Әбиһу арттарында ұл қалдырмай әкелерінің көзі тірісінде бұ дүниеден өтті. [3] Сол себептен Елазар мен Ітамар діни қызметті атқаратын болды.

³Дәуіт патша Елазардың ұрпағы Садықтың [4] және Ітамардың [5] ұрпағы Ахимәліктің [6] көмегімен діни қызметкерлерді міндеттерін атқаратын кезектері бойынша топтарға бөлді.

⁴Ітамардың ұрпақтарына қарағанда Елазардың ұрпақтарында әулет басшылары көбірек болды. Сондықтан Елазардың ұрпақтары он алты топқа, [7] ал Ітамардың ұрпақтары сегіз топқа бөлінді.

⁵Елазардың да, Ітамардың да ұрпақтарының ішінде киелі үйде Құдайға қызмет етуге лайықты басшылар бар болғандықтан, олар атқаратын міндеттеріне жеребе тастау арқылы тағайындалды. [8]

⁶Леуілік хатшы Нетанел ұлы Шемаях жеребенің кімге түскенін патшаның, діни қызметкер Садықтың, Абиятар ұлы Ахимәліктің және діни қызметкерлер мен леуіліктердің әулет басшыларының көздерінше ресми тізімге жазып алып отырды. Жеребе бір болып түссе Елазардың, екі болып түссе Ітамардың әулеті алынып отырды.

⁷Жеребелер мына ретпен түсті: біріншісі Ехоярипке, екіншісі Едаяхқа,

⁸үшіншісі Харымға, [9] төртіншісі Сеоримге,

⁹бесіншісі Малқияхқа, алтыншысы Мияминге,

¹⁰жетіншісі Хақосқа, сегізіншісі Абияхқа,

¹¹тоғызыншысы Ешуаға, оныншысы Шеханияхқа,

¹²он біріншісі Елияшипке, он екіншісі Жәкімге,

¹³он үшіншісі Хупаға, он төртіншісі Ешебапқа,

¹⁴он бесіншісі Билғаға, он алтыншысы Имерге,

¹⁵он жетіншісі Хезирге, он сегізіншісі Гаписеске,

¹⁶он тоғызыншысы Петахияхқа, жиырмасыншысы Ехезкелге,

¹⁷жиырма біріншісі Яхинге, жиырма екіншісі Ғамулға,

¹⁸жиырма үшіншісі Делаяхқа, ал жиырма төртіншісі Мағазияхқа түсті.

¹⁹Исраилдің Құдай Иесі ежелде олардың түп аталары Һаронға Жаратқан Иенің киелі үйінде қызмет ету тәртібін бұйырған болатын. Енді діни қызметкерлер сол тәртіп бойынша кезекпен киелі үйге кіріп, міндеттерін атқаратын болды.

²⁰Леуіліктердің өзге әулет басшылары мыналар болды: Ымрамның ұрпақтарынан Шебуил, ал оның ұлдарынан Едиях шыққан еді. [10]

²¹Рехабияхтың ұлдарының тұңғышы Ишиях болды.

²²Ысқардың ұрпақтарынан Шеломит, [11] ал Шеломиттің ұрпақтарынан Яхат шықты.

²³Хебронның ұрпақтарынан тұңғышы Ерия, екіншісі Амариях, үшіншісі Яхазиел, төртіншісі Екамам әулет басшылары болды. [12]

²⁴Ұзиелдің ұрпақтарынан Миха, ал Миханың ұрпақтарынан Шамир есімді әулет басшылары болды.

²⁵Миханың інісі Ишиях, ал Ишияхтың ұрпақтарынан Зәкәрия әулет басшысы еді.

²⁶Мераридің ұрпақтарынан Мәхли мен Мұши, әрі Язияхтың ұрпақтарынан Бено әулет басшылары болды.

²⁷Мерариден Язиях арқылы тараған ұрпақтарынан Бено, Шоһам, Зақур, Ибри әулет басшылары болатын.

²⁸Мәхлиден Елазар тарады, ал оның ұлдары болмады.

²⁹(Мәхли ұлы) Қиштан өз ұлдары арқылы Ерахмел тарады. [13]

³⁰Мұшидың ұлдары: Мәхли, Едер, Еремот.

³⁰Есімдері әулеттеріне сәйкес келтірілген леуіліктер осылар.

³¹Өздерімен рулас діни қызметкерлер сияқты, олар да жеребе тастап, қызметтеріне тағайындалып отырды. Сонда осы әулеттердің шыққан түп аталарының жасы үлкен-кішілігіне көңіл бөлінген жоқ. Жеребе Дәуіт патшаның, Садық пен Ахимәліктің және діни қызметкерлер мен леуіліктердің әулет басшыларының алдында тасталды.