Шежірелер 1-ж. 4:1-43 KZB2010 - Bible AI

¹Яһуданың ұрпақтарына Парес, Хесрон, Қарми, Һұр [1] және Шобал жатады.

²Шобал ұлы Реях Яхаттың әкесі болатын. Яхаттың ұлдары: Ахум, Лахад. Олардан тараған әулеттер Сораның [2] тұрғындары болатын.

³Етамның ұлдары мыналар: Ізрел, Ишма, Идбаш. Олардың әпке-қарындастарының есімі — Хаселелпони.

⁴Пенуел Гедордың әкесі, ал Езер Хушаның әкесі болатын. Ефратаның тұңғышы әрі Бетлехемнің басқарушысы [3] Һұрдың ұрпақтары осылар болатын.

⁵Текояның басқарушысы [4] Ашхұрдың Хела мен Нағарат деген екі әйелі бар еді.

⁶Нағарат Ашхұрға Ахузам, Хефер, Темни, Ахаштариды туды. Олар Нағараттың ұрпақтары болып саналатын.

⁷Хеладан туған ұлдар: Серет, Сохар, Әтнан,

⁸Қос. Қостан Ануб пен Собеб және Ахархел ұлы Харумның әулеттері тарады.

⁹(Яһуда руында) Ябес есімді адам болды. Ол өз ағайындары арасында көбірек құрметтелетін. Ал анасы: «Мен оны азаппен қиналып босандым», — деп, оның атын Ябес [5] деп қойған еді.

¹⁰Ябес Исраил сиынған Құдайға [6] былай деп мінажат етті: «Мені жарылқап, тиесілі жерімнің көлемін кеңейтсең екен! Құдіретті қолыңмен маған жар бола гөр. Азапқа ұшырататын жамандықтан аулақ сақтай гөр!» Сонда Құдай Ябеске сұрағанын берді. [7]

¹¹Шухахтың бауыры Хелуб Махырдың әкесі және Ештонның атасы болатын.

¹²Ештон Бет-Рафа мен Пасеахтың басқарушысы, ал Техинах Нахаш қаласының басқарушысы [8] болды. Бұлар бұрын Рехада тұрған адамдар еді.

¹³Кеназдың ұлдары: Отниел [9] мен Сераях. Отниелдің ұлдары: Хатат пен Меонотай.

¹⁴Меонотай Офраның әкесі, Сераях Жоғабтың әкесі ал Жоғаб қолөнершілер аңғарының басқарушысы болатын. [10] Сол жер ондағы халық қолөнермен айналысатындықтан солай аталып кетті.

¹⁵Ефунне ұлы Халептің [11] ұлдары: Иру, Ила, Нағам. Иланың ұлы: Кеназ.

¹⁶Ехәлелелдің ұлдары: Зиф, Зифах, Тириях, Асарел.

¹⁷Езраның ұлдары: Етер, Меред, Ефер, Жалон. (Етердің) [12] бір әйелі Мәриям, Шаммай, Ишбах есімді балаларды туды; Ишбах Ештемоғаның [13] басқарушысы болды.

¹⁸(Етердің) [14] яһуди әйелі Гедордың [15] басқарушысы Ередті, Сохоның [16] басқарушысы Хеберді және Заноахтың [17] басқарушысы Екутиелді туды. Меред перғауынның қызы Битияға үйленіп, одан бірнеше бала сүйді.

¹⁹Ходия Нахамның қарындасына үйленді. Олардың ұлдары: Кеилдің әкесі Ғарми және махалық [18] Ештемоға.

²⁰Шимонның ұлдары: Амнон, Ринна, Бенханан, Тилон. Ишидің ұрпақтары: Зохет, Бензохет.

²¹Яһуданың бір ұлы Шелах еді. [19] Шелахтан өрбіген ұрпақтар: Леханың басқарушысы Ер, Марешаның [20] басқарушысы Ладах, Бет-Ашбеядағы бәтес [21] тоқушылардың әулеттері,

²²сондай-ақ, Жоқим, Хозебаның адамдары және Моаб пен Жашуби-Лехемді басқарған Жоғас пен Сарап. Осы шежіре жазбалар ежелден қалған.

²³Соңғы аталған адамдар Нетаим мен Гедерахты [22] мекендеп, құмыра жасауды кәсіп қылып жүрді. Олар сонда тұрып, патшаға жұмыс істеді.

²⁴Шимонның ұрпақтары: Емуел, Ямин, Яхин, Сохар, Саул. [23]

²⁵Саулдан өрбіген ұрпақтар: ұлы Шаллум, одан Мипсам, одан Мишма.

²⁶Мишмадан өрбіген ұрпақтары: ұлы Хаммуил, одан Зақур, одан Шимей.

²⁷Шимейден он алты ұл, алты қыз туды. Бірақ оның ағайындарында баланың саны аз еді. Сол себепті Шимон руы Яһуда руындай үлкен болмады.

²⁸Шимейдің ұрпақтары Бер-Шеба, Молада, Хасар-Шуал,

²⁹Балах, Әсем, Толад атты мекендерге қоныстанды.

³⁰Олар Бетуел, Хорма, Сикеләг,

³¹Бет-Марқабот, Хасар-Сусим, Бет-Біреи, Шағараим [24] деген жерлерде де тұратын. Дәуіт патшалық құрғанға дейін осы қалалар олардың қарамағында болды.

³²Шимейдің ұрпақтары тағы Етам, Аин, Риммон, Токен, Ашан атты бес қалада да тұратын.

³³Сол қалаларға қарасты, Бағалатқа дейін орналасқан барлық елді мекендер де олардың қоныстары болды. Шимейдің ұрпақтары ата-тектерінің шежірелерін жазып алып отырды.

³⁴Шимонның тағы мына ұрпақтары да болды: Мешобаб, Ямлех, Амасиях ұлы Жосах,

³⁵Жоел: Асиилдің шөбересі, Сераяхтың немересі, Жошибияхтың ұлы Еху;

³⁶сондай-ақ, Елиохенай, Жақобах, Ешохаях, Асаях, Адиел, Ешимиел, Бенаях;

³⁷Шемаяхтың неменесі, Шимридің шөпшегі, Едаяхтың шөбересі, Аллонның немересі, Шифидің ұлы Зизах.

³⁸Осы аттары аталған адамдар әулеттердің басшылары еді. Үрім-бұтақтары кеңінен өсіп көбейгендіктен,

³⁹олар малдарына жайылым жер іздеп, Герардың [25] маңына, ондағы аңғардың шығысына қарай көшіп барды.

⁴⁰Сол жақта олар оты мол, мал өрісіне жақсы бір жайылым тауып алды. Ол шалқыған кең, тыныш та алаңсыз жатқан жер екен. Оны Хамның кейбір ұрпақтары мекендеп келген еді.

⁴¹Жоғарыда есімдері аталған Шимон руының басшылары Яһуда елінің патшасы Езекияның [26] билік құрып тұрған кезінде аттанып, хамдықтардың шатырларын және сол жерде тұрып жатқан меунилерді мүлдем жойды. [27] Бүгінде олардың ізі де жоқ. Шимондықтар солардың жеріне қоныстанып алды, себебі онда малдарына жайылым болатын.

⁴²Бірде Шимон руының бес жүз адамы Ишидің ұлдары — Пелатиях, Неариях, Рефаях, Ұзиелдің басшылығымен таулы Сейір аймағына аттанды. [28]

⁴³Олар амалектіктердің бұрын қашып кетіп, тірі қалғандарының көздерін құртты. [29] Содан бері олар сол жерде осы күнге дейін тұрып келе жатыр.