Шежірелер 2-ж. 1:1-17 KZB2010 - Bible AI

¹Дәуіттің ұлы Сүлеймен [1] өз патшалығында жағдайын берік орнатып алды. Құдай Иесі оған жар болып, мерейін айрықша жоғарылатты. [2]

²Бір күні Сүлеймен Исраилдің барлық мыңбасыларын, жүзбасыларын, төрешілерін және халықтың басқа да жетекшілері мен әулет басшыларының бәріне де жиналуға бұйрық берді.

³Мұнан соң Сүлеймен бүкіл жамағатты ертіп Гибеон қаласының биіктеу жеріндегі ғибадат орнына [3] қарай беттеді. Өйткені Жаратқан Иенің қызметшісі Мұса пайғамбардың иен далада жасатқан кездесу шатыры сол жерде тігілген болатын. [4]

⁴Дәуіт патша көзі тірісінде Иерусалимде бір киелі шатыр тұрғызып, дайындап қойып, осы орынға Кирият-Иғарымнан Құдайдың Келісім сандығын әкелген еді. [5]

⁵Ал Һұр немересі Ұри ұлы Беселиел қоладан жасаған құрбандық үстелі [6] Жаратқан Иенің Гибеон қаласындағы кездесу шатырының алдында тұрды. Осы себепті Сүлеймен және жиналған жамағат Жаратқан Иенің еркін білу үшін сол жерге барды.

⁶Сүлеймен кездесу шатырының алдындағы қоладан жасалған құрбандық үстелінің қасына көтеріліп, Жаратқан Иеге арнап мың бас малды құрбандыққа шалғызып, өртетті.

⁷Сол түні Құдай Сүлейменге аян беріп: — Өзіңе не сыйлағанымды қаласаң, соны сұра, — деді.

⁸Сүлеймен Құдайға былай деп жауап берді:

⁸— Сен әкем марқұмға [7] зор рақымыңды көрсете отырып, маған оның орнын бастырып патшалық құрғыздың.

⁹Уа, Құдай Ие, мені жер бетіндегі құм түйіршіктеріндей сансыз көп халықтың үстінен патша етіп қойдың. Енді әкеме берген уәдеңді орындап,

¹⁰маған осы халықтың лайықты басқарушысы болуға [8] даналық пен білім сыйлай гөр. Онсыз Сенің осыншама көп халқыңа дұрыстап билік жүргізу ешкімнің де қолынан келмейтін іс. —

¹¹Сонда Құдай Сүлейменге:

¹¹— Жүрек қалауың осы болып, сен қазына-байлық пен атақ-даңқ [9] және жауларыңның жеңіліп, құруы былай тұрсын, тіпті өзің үшін ұзақ өмір де сұраған жоқсың. Қайта, Мен сені патшасы етіп қойған халқыма билік жүргізуің үшін даналық пен білім сыйлауымды өтіндің.

¹²Сол үшін Мен өзіңе даналық пен білім сыйлап отырмын. Соған қоса қазына-байлық пен атақ-даңқты да сыйлаймын. Сенде бар болатын мол қазына-байлық пен атақ-даңққа саған дейінгі ешбір патша ие болған емес, сенен кейін де ешбір патша ие болмайды, — деп уәде етті.

¹³Сүлеймен кездесу шатыры орналасқан Гибеондағы биіктеу жерінен түсіп, Иерусалимге қайта оралғаннан кейін Исраилге патшалық құрды.

¹⁴Сүлеймен соғыс күймелері мен аттарды [10] жинап, жасақтады. Оның бір мың төрт жүз соғыс күймесі мен он екі мың жылқысы болды. Оларды соғыс күймелеріне дайындалған арнайы қалаларында және өзінің қасында астанасы Иерусалимде ұстады. [11]

¹⁵Патша Иерусалимде алтын мен күмісті тас сияқты үйреншікті нәрсе әрі шетелден әкелінетін қымбат самырсындарды [12] өз елінің төменгі қыраттарында көптеп өсетін тұт ағаштары [13] іспетті мол етті.

¹⁶Сүлеймен жылқыларын Мысыр мен Қуадан [14] алдыртты. Патшаның саудагерлері оларды белгілі бағаға Қуа елінен сатып алатын.

¹⁷Саудагерлер әрбір күймені алты жүз мысқал, [15] әрбір жылқыны жүз елу мысқал күміске Мысырдан сатып алып келетін. [16] Олар сол тауарлардың бірқатарын күллі хеттік және арамалық [17] патшаларға да жеткізіп, сатып отырды.