Қолостықт. хат 3:1-25 KZB2010 - Bible AI

¹Сонымен, Мәсіх өлімнен қайта тірілгенде сендер Онымен бірге рухани тірілдіңдер. Сондықтан көкке [1] лайықты қасиеттерді иемденуге ұмтылыңдар! Өйткені Мәсіх көкте, Құдайдың оң жағында отыр.

²Ойларыңды күнәкар дүниедегіге емес, көктегіге аударыңдар!

³Себебі сендер рухани өлдіңдер, [2] енді өлген кісідей бұрынғы күнәлі іс-әрекеттеріңе жоқсыңдар. Ал Мәсіхпен бірлесіп сүрген жаңа өмірлерің ел көзінен таса, Құдайдың алдында.

⁴Өмірлеріңнің бірден-бір бастауы мен мақсаты — Мәсіх. [3] Ол жер бетінде қайтадан көрінген кезде сендер де Онымен бірге салтанатты ұлылықпен көрінесіңдер.

⁵Ал енді, күнәкар дүниеге жататын қылықтарыңды біржола тоқтатыңдар: [4] неке адалдығын бұзу, әр қилы азғындық, нәпсіқұмарлық және арам пиғылдан аулақ жүріңдер; ашкөздікке де салынбаңдар, ол жалған тәңірлерге табынумен бірдей!

⁶Құдайға мойынсұнбайтындарға осындай күнәлары үшін Оның қаһарлы соты төніп тұр.

⁷Бір кезде сендер де оларды жасайтындармен бірге дәл солай әрекет етіп жүрдіңдер.

⁸Ал мына қылықтарды енді тастаңдар: ашу-ыза, кек сақтау, қаралау, бейпіл ауыздық;

⁹бір-біріңе өтірік те айтпаңдар! Себебі сендер ескі күнәкар болмыстарыңның іс-әрекетін тастап,

¹⁰жаңа ізгі болмысқа ие болдыңдар. [5] Оны жаратып берген Иеміз Өзін жақынырақ тануларың үшін сендердің рухани жағынан Өзіне ұқсас болуларыңды көздеп соған ұмтылуда.

¹¹Бұл жерде яһуди не басқа ұлттық, сүндеттелген не сүндеттелмеген, шетелдік не көшпенді скиф, [6] құл не ерікті жоқ, қайта, Мәсіх барлық сенушілердің өмірлерінде басты орында. [7]

¹²Ал енді, Құдай сендерді сүйіп, өз халқым деп таңдап алғандықтан, ұдайы жанашыр, мейірімді, кішіпейіл, ілтипатты, сабырлы болып, осы қасиеттерге бөленіңдер!

¹³Өзара төзімді болыңдар. Егер біреуге реніш сақтап, тағатын кінәларың болса, кешірімді болыңдар: сендерді Иеміз Мәсіх қалай кешірсе, сендер де солай етіңдер!

¹⁴Барлық қасиеттердің бастысы ретінде сүйіспеншілікке бөленіңдер, ол бәріңді толықтай біріктіреді. [8]

¹⁵Иеміз Мәсіх сыйлаған тыныштық сендерге билігін жүргізсін! Ол сендерді біртұтас рухани дененің құрамдас мүшелері ретінде татулықта тұруға шақырды. Сонымен қатар ризашылықтарыңды білдіріңдер!

¹⁶Мәсіх туралы Ізгі хабарға [9] көңілдеріңнен мол орын беріңдер: Забур жырлары, мадақтау өлеңдері және Киелі Рух дарытқан басқа да әндер [10] арқылы бір-біріңе зор парасатпен тәлім-тәрбие және бағыт-бағдар беріңдер. Жүректерің ризашылыққа кенеліп, Құдайға арнап ән айтып отырыңдар!

¹⁷Не айтып, не істесеңдер де, бәрін Иеміз Исаның атымен жасап, [11] Иеміз арқылы Құдай Әкемізге шүкірлік етіңдер!

¹⁸Әйелдер, күйеулеріңе мойынсұныңдар! [12] Иемізбен байланыстағы сендердің осылай істегендерің жөн.

¹⁹Күйеулер, әйелдеріңді сүйіп, оларға қатаң болмаңдар!

²⁰Балалар, барлық жағдайда да ата-аналарыңның тілін алыңдар, өйткені Иемізге осы ұнайды!

²¹Ата-аналар, балаларыңның ынжық болмауы үшін оларға шектен тыс ұрыспаңдар! [13]

²²Басыбайлы қызметшілер, [14] барлық жағдайда да бұл дүниелік қожайындарыңның тілін алыңдар! Көңілдерінен шығу үшін тек олар бақылап тұрғанда ғана емес, ұдайы шын жүректен мойынсұныңдар! Осылай Құдай Иемізді терең қастерлеңдер!

²³Қандай жұмыс болса да, оны адам баласы үшін ғана емес, Иеміз үшін істеп жүргендей жан-тәндеріңмен атқарыңдар!

²⁴Себебі осының ақысы ретінде сендер Иемізден Оның уәде еткен игіліктерін қабылдайтындарыңды білесіңдер. [15] Қызмет ететін Қожайындарың — Мәсіхтің Өзі ғой. [16]

²⁵Ал жамандық жасайтын әркім соның лайықты жазасын тартады. Мәсіх ешкімнің бет-жүзіне қарамай әділ үкім шығармақ.