Қолостықт. хат 4:1-18 KZB2010 - Bible AI

¹Қожайындар, қызметшілеріңді [1] тиісті нәрселермен қамтамасыз етіп, әділ болыңдар! Өйткені көкте сендердің де Қожайындарыңның бар екенін білесіңдер.

²Әрдайым Құдайға сиынып, рухани сергек те шыдамды болып, шүкірлік ете беріңдер!

³Біз үшін де мінажат етіңдер: Құдай өз хабарын уағыздауымызға жол аша көрсін, осылай Мәсіх туралы құпияны жариялай алайық. Сол үшін де бұғауда отырмын.

⁴Менің тиісті түрде бұл хабарды ашық айта алуым үшін де Құдайға сиыныңдар.

⁵Қауымнан тыс адамдармен парасатты қарым-қатынас жасап, тиімді сәттерді пайдаланыңдар!

⁶Сөйлескенде ұдайы ниеттерің игі, сөздерің дәмді болсын, әрқайсысына қалай жауап беру керек екенін біліңдер.

⁷Адал көмекшім әрі Иемізге бірге қызмет етуші, сүйікті бауырласымыз Түхік [2] сендерге мен туралы бәрін хабарламақ.

⁸Оны сол мақсатпен жіберіп отырмын, ол жағдайларыңның қалай екенін көріп, жүректеріңді жігерлендірмек.

⁹Онымен бірге сүйікті де адал бауырласымыз әрі сендердің жерлестерің — Онисым [3] да барады. Бұл жердегі болып жатқан жағдайды Түхік екеуі сендерге толық айтып береді.

¹⁰Менімен бірге тұтқында отырған Арыстарқ, [4] сондай-ақ Барнабаның жиен інісі Марқа [5] сендерге сәлем жолдайды. Марқа жайлы ерекше нұсқау алдыңдар: ол сендерге барса, жылы қабылдаңдар!

¹¹Иуст деп аталатын Иса да сәлем айтады. Яһудилердің ішіндегі осы үшеуі ғана Құдай Патшалығы үшін қызметтестерім болып жүр; бұлар маған нағыз жұбаныш.

¹²Мәсіх Исаның қызметшісі әрі сендердің жерлестерің — Епафрас [6] та сәлем айтып отыр. Ол сендердің рухани жағынан жетіліп, [7] берік сеніммен Құдайдың бүкіл еркін орындауларың үшін үздіксіз мінажат етіп күресуде.

¹³Оның сендерді және Лаудіки [8] мен Иераполдағы бауырластарды қатты уайымдап жүргеніне куәмін.

¹⁴Сүйікті дәрігер Лұқа да, Димас [9] та сәлем жолдайды.

¹⁵Лаудікидегі бауырластарымызға, әсіресе Нүмфан мен оның үйінде жиналатын қауымға, сәлем айтыңдар.

¹⁶Сендер осы хатты оқып болған соң, оны әрі қарай Лаудікидегі қауымға беріңдер, оларға жазған хатымды да оқыңдар.

¹⁷Арқыпқа: «Иеміз саған міндеттеген қызметіңді адал атқаруға ықылас сал!» деген сәлемімізді жеткізіңдер.

¹⁸Енді мен, Пауыл, сендерге өз қолыммен сәлем жазып отырмын. Бұғауда екенімді естеріңде ұстаңдар! Лайым Құдай сендерге жар болып, рақымын жаудыра көрсін! (Аумин.)