Қорынттықт. 1-хат 16:1-24 KZB2010 - Bible AI

¹Енді Құдайдың мұқтаждық көріп жүрген (Яһудеядағы) халқына көмек жинау [1] туралы: Ғалатия өлкесіндегі қауымдарға берген нұсқауларыма сай әрекет жасаңдар.

²Жексенбі сайын әрқайсыларың жағдайларыңа қарай қолдағы қаражаттарыңнан [2] бөлектеп, сақтап қойыңдар. Осылайша мен сендерге барған уақытта оларды жинаудың қажеті болмайды.

³Сол кезде өздерің сәлемдемелеріңді апару үшін таңдап алған адамдарыңа сенімхаттарымды беріп, оларды Иерусалимге шығарып саламын.

⁴Егер өзімнің де баруым жөн болса, онда бірге барармыз.

⁵Мен сендерге Македония арқылы сапар шегіп келмекпін. Себебі сол өлкемен өтетін ойым бар.

⁶Ал сендерде біраз тоқтап, тіпті қыстап та қалуым мүмкін. Осылай қай жаққа сапарымды жалғастырсам, мені жолға шығарып сала аласыңдар.

⁷Себебі қазір жолай соққым келмейді; Иеміз қаласа, біраз уақыт өздеріңмен бірге болсам деп үміттенемін.

⁸Алғашқы өнім мейрамына [3] дейін Ефес қаласында болмақпын.

⁹Өйткені осында өнімді еңбек етуіме есік айқара ашық, ал қарсыластарым да аз емес.

¹⁰Тімоте [4] сендерге келіп жатса, оның араларыңда алаңсыз жүруіне көңіл бөліңдер. Тімоте де мен сияқты Иеміздің ісімен айналысуда.

¹¹Ешқайсың оны елемей жүрмеңдер, [5] аман-есен жолға шығарып салып, маған қайтып келуіне жағдай жасасаңдар екен. Тімотенің өзге бауырластарымызбен бірге қайта оралуын күтудемін.

¹²Ал бауырласымыз Аполлос [6] болса, оны сендерге баратын бауырластарға ілессін деп әлденеше рет жігерлендірдім, бірақ бұл жолы оның барғысы келген жоқ; [7] сәті түскенде барар.

¹³Сақ болыңдар, сенімдеріңде берік, ер жүрек әрі күшті тұрыңдар!

¹⁴Бәрін де сүйіспеншілікпен істеңдер!

¹⁵Степан мен оның үй ішін білесіңдер, олар Ахаядағы [8] алғашқы сенушілер арасында болып, өздерін Құдайдың халқына қызмет етуге бағыштап келеді. Бауырластар, сендерден өтінемін:

¹⁶осындай адамдардың және олармен істес болып, қажырлы еңбек етіп жүргендердің жетегіне сендер де еріңдер.

¹⁷Степан, Фортунат және Ахайықтың келгендеріне қатты қуанып қалдым. Олар сендердің жоқ екендіктеріңнің орнын толтырып,

¹⁸мені де, өздеріңді де рухтандырды. Мұндай адамдар шынында да қадірленуге лайық.

¹⁹Азия өлкесіндегі [9] қауымдар сендерге сәлем жолдайды. Ақила мен Прискила және олардың үйінде жиналатын қауымнан Иемізбен жүрген сендерге дұғай сәлем.

²⁰Мұндағы барлық бауырластар да сәлем айтуда. Шын жүректен бір-біріңе сүйіспеншіліктеріңді білдіріп, [10] сәлемімізді жеткізіңдер.

²¹Енді мен, Пауыл, сәлемімді өз қолыммен жазып отырмын.

²²Иемізді сүймейтін әркімді Құдайдың қарғысы атпақ. [11] Иеміз, келе гөр! [12]

²³Сендерге Иеміз Иса Мәсіх жар болып, рақымын жаудыра көрсін!

²⁴Менің сүйіспеншілігім Мәсіх Исамен байланысқан бәріңмен бірге. (Аумин.)