1 Abakkolinso 10:1-33 LGCB2014 - Bible AI

¹Abooluganda, musaana mutegeere nga bajjajjaffe bonna baakulemberwa ekire, era bonna ne bayita mu nnyanja,

²bwe batyo bonna ne bakulemberwa Musa ne babatizibwa mu kire ne mu nnyanja.

³Bonna baalyanga emmere yʼemu eyʼomwoyo,

⁴era bonna baanywanga ekyokunywa kye kimu ekyʼomwoyo, kubanga bonna baanywanga mu lwazi olwʼomwoyo olwabagobereranga era olwazi olwo yali Kristo.

⁵Naye era abasinga obungi Katonda teyabasiima, bwe batyo ne bazikirizibwa mu ddungu.

⁶Ebintu bino ebyabatuukako bitulabula obuteegomba bibi nga bo bwe baakola.

⁷ⓓ Temusinzanga bakatonda balala, ngʼabamu ku bo bwe baali, ngʼEkyawandiikibwa bwe kigamba nti, “Abantu baatuula okulya nʼokunywa ne basituka ne bakola effujjo.”

⁸Tetusaana kubeera benzi ngʼabamu ku bo bwe baali, abantu emitwalo ebiri mu enkumi ssatu ku bo ne bafa mu lunaku lumu.

⁹Era tetusaana kukema Kristo ngʼabamu ku bo bwe baakola, emisota ne gibazikiriza.

¹⁰Era temwemulugunyanga ngʼabamu ku bo bwe baakola, ne battibwa omuzikiriza.

¹¹Ebyo byonna byabatuukako ngʼekyokulabirako gye tuli, era byawandiikibwa olwʼokutulabula ffe abaliwo abatuukiddwako enkomerero.

¹²Kale alowooza ngʼayimiridde, yeekuumenga aleme okugwa.

¹³Tewali kukemebwa kubatuukako okutali kwa bantu; kyokka Katonda mwesigwa, kubanga taabalekenga kutuukibwako kukemebwa kwe mutayinza kugumira, naye anaabasobozesanga okubigumira, nʼabalaga nʼekkubo eryʼokubiwangula.

¹⁴Noolwekyo, mikwano gyange, muddukenga okusinza bakatonda abalala.

¹⁵Muli bantu abategeera. Kale, mulabe obanga kye njogera kye kikyo.

¹⁶Ekikompe ekyʼomukisa, kye tusabira omukisa, si kwe kussekimu okwʼomusaayi gwa Kristo? Omugaati gwe tumenya, si kwe kussekimu okwʼomubiri gwa Kristo?

¹⁷Kubanga ffe bangi, ffenna tulya ku mugaati gumu, ekiraga nga bwe tuli omubiri ogumu.

¹⁸Mulabe Isirayiri owʼomubiri, abalya ssaddaaka tebassa kimu na Kyoto?

¹⁹Kale kiki kye ngezaako okutegeeza? Mulowooza ŋŋamba nti Ebyokulya ebiweebwayo eri bakatonda abalala birimu amakulu? Oba nti bakatonda abalala balina omugaso?

²⁰Nedda. Kye ŋŋamba kye kino nti abo abawaayo ssaddaaka eri bakatonda abalala bawa eri baddayimooni so si eri Katonda. Saagala mwegatte wamu ne baddayimooni musse kimu nabo.

²¹Temuyinza kunywa ku kikompe kya Mukama ate ne munywa ne ku kikompe kya baddayimooni. Era temuyinza kuliira ku mmeeza ya Mukama ate ne ku ya baddayimooni.

²²Oba Mukama tetumukwasa buggya? Tumusinza amaanyi?

²³Byonna bikkirizibwa, naye si byonna ebirimu omugaso. Byonna bikkirizibwa naye si byonna ebizimba.

²⁴Omuntu yenna alemenga okwefaako yekka, naye afengayo ne ku bya munne.

²⁵Mwegulire ennyama eya buli ngeri gye batunda mu katale mulye, awatali kusooka kwebuuza olwʼomwoyo gwammwe.

²⁶Kubanga ensi ya Mukama nʼokujjula kwayo.

²⁷Singa omu ku batali bakkiriza abayita ku kijjulo, ne mwagala okugenda, kale mulyenga kyonna kye banaabagabulanga nga temuliiko kye mubuuzizza olwʼobulungi bwʼomwoyo gwammwe.

²⁸Kyokka omuntu yenna bwʼabategeezanga nti, “Kino kyaweereddwayo eri bakatonda abalala,” temukiryanga olwʼoyo abategeezezza nʼolwʼobulungi bwʼomwoyo gwammwe,

²⁹bwe njogera bwe ntyo, njogera ku mwoyo gwe so si ogwʼoli omulala. Kubanga lwaki eddembe lyange lisalirwa omusango omwoyo gwʼomulala?

³⁰Bwe ndya nga neebazizza, lwaki nnenyezebwa olwʼekyo kye ndya nga neebazizza?

³¹Kubanga buli kye mukola, oba kulya oba kunywa, mukikole nga mugenderera kugulumiza Katonda.

³²Temukolanga ekyo ekineesittaza Abayudaaya oba Abayonaani wadde abʼekkanisa ya Katonda.

³³Nange bwe ntyo ngezaako okusanyusa abantu bonna mu byonna bye nkola, nga sinoonya byange, wabula nga nfa ku bulungi bwʼabalala balyoke balokolebwe.