1 Abakkolinso 14:1-40 LGCB2014 - Bible AI

¹Mugobererenga okwagala era muluubirirenga ebirabo ebyʼOmwoyo, na ddala ekirabo ekyʼokwogera ebyʼobunnabbi.

²Kubanga ayogera mu nnimi tayogera nʼabantu, wabula ayogera na Katonda. Kubanga tewali nʼomu ategeera byʼagamba. Aba ayogera bya kyama mu Mwoyo.

³Naye oyo ategeeza abantu ebyʼobunnabbi ayogera ebibazimba, ebibagumya era nʼokubazzaamu amaanyi.

⁴Ayogera ennimi yeezimba yekka, naye oyo ayogera ebyʼobunnabbi azimba ekibiina kyonna ekyʼabakkiriza.

⁵Nandyagadde mwenna mwogere mu nnimi, naye ekisingira ddala nandyagadde mwenna mwogere ebyʼobunnabbi, kubanga ayogera ebyʼobunnabbi akira oyo ayogera mu nnimi, okuggyako nga waliwo avvuunula, Ekkanisa eryoke egasibwe.

⁶Kale kaakano, abooluganda, bwe nzija gye muli ne njogera mu nnimi mbagasa ntya? Naye bwe mbategeeza ebyo Katonda byʼambikulidde oba bye njize mu kutegeera, oba ebyʼobunnabbi, oba bye njigiriza, olwo mmanyi nga mbagasa.

⁷Era nʼebivuga ebitalina bulamu, ngʼendere oba ennanga, bwe bitavuga mu maloboozi gategeerekeka, omuntu ayinza atya okutegeera oluyimba olufuuyibwa oba olukubibwa?

⁸Era singa omufuuyi wʼeŋŋombe tafuuwa ddoboozi Iitegeerekeka, ani ayinza okweteekerateekera olutalo?

⁹Mu ngeri yʼemu, bwe mwogera nʼomuntu mu lulimi lwʼatamanyi, asobola atya okutegeera kye mugamba? Muba mwogeredde bwereere.

¹⁰Weewaawo waliwo ennimi nnyingi mu nsi, era zonna zirina amakulu.

¹¹Naye omuntu bwʼayogera olulimi lwe simanyi, aba ngʼomugwira gye ndi, nange mba ngʼomugwira gyʼali.

¹²Bwe mutyo nga bwe mwegomba okufuna ebirabo ebyʼOmwoyo, mufubenga nnyo mulyoke musobole okuzimba Ekkanisa ya Kristo.

¹³Kale buli ayogera mu lulimi asabe Katonda amusobozese okuluvvuunula.

¹⁴Kubanga bwe nsaba Katonda mu lulimi lwe sitegeera, omwoyo gwange gusaba, naye sibaako kye nganyulwa.

¹⁵Kale kino ki? Nnaasinzanga Katonda nʼomwoyo gwange awamu nʼamagezi gange era nnaayimbanga mu mwoyo gwange awamu nʼamagezi gange.

¹⁶Kubanga bwʼotendereza Katonda mu mwoyo gwo, omuntu atategeera kyʼogamba ayinza atya okuddamu nti, “Amiina!” ngʼomaliriza okwebaza, ngʼebigambo ebyebazizza tabitegedde?

¹⁷Weewaawo oyinza okuba nga weebazizza Katonda, naye omulala nga tagasibbwa.

¹⁸Neebaza Katonda kubanga njogera ennimi okubasinga mwenna.

¹⁹Naye mu lukuŋŋaana njagala njogere nʼamagezi gange ebigambo bitaano abalala bye bategeera nga mbayigiriza, okusinga okwogera ebigambo omutwalo mu nnimi, bye bataategeere.

²⁰Abooluganda, temulowooza bya kito. Mube ngʼabaana abato ku bikwata ku kukola ebibi, mube bakulu mu kulowooza kwammwe.

²¹Era kyawandiikibwa mu mateeka nti, bwʼayogera Mukama.”

²¹“Ndyogera nʼabantu bano mu nnimi endala, nʼemimwa egyʼabalala, naye era tebalimpulira,

²²Noolwekyo ennimi kyeziva ziba akabonero, si eri abo abakkiriza naye eri abo abatali bakkiriza, naye okutegeeza obunnabbi kwʼabo abakkiriza so si abo abatali bakkiriza.

²³Kale singa Ekkanisa ekuŋŋaana bonna ne boogera mu nnimi abatamanyi oba abatali bakkiriza ne bayingira, tebagamba nti Mulaluse?

²⁴Naye singa bonna boogera ebyʼobunnabbi, atali mukkiriza oba atamanyi nʼayingira, ebyo ebyogerebwa byonna, bijja kumuleetera okulumirizibwa olwʼebibi bye, yeesalire omusango,

²⁵ebyama byʼomu mutima gwe bibikkulwe, alyoke afukamire asinze Katonda, nga bwʼagamba nti, “Ddala Katonda ali mu mmwe.”

²⁶Kale abooluganda tugambe tutya? Bwe mukuŋŋaana buli omu aba ne zabbuli, oba ekyʼokuyigiriza, oba ekyo Katonda kyʼamubikkulidde, oba okwogera mu nnimi, oba okuvvuunula. Ebyo byonna bisaana bikolebwe olwʼokuzimba Ekkanisa ya Katonda.

²⁷Singa wabaawo aboogera mu nnimi bandyogedde babiri, oba obutasussa basatu, era nga boogera mu mpalo, ate wabeewo nʼavvuunula.

²⁸Naye bwe watabaawo avvuunula omwogezi wʼennimi asirike busirisi mu Kkanisa wabula ayogerere munda ye ne Katonda.

²⁹Kyokka abo aboogera ebyʼobunnabbi boogerenga babiri oba basatu, ngʼabalala bafumiitiriza ku ebyo ebyogerwa.

³⁰Naye singa omu ku batudde abikkulirwa ekigambo kya Katonda, oyo abadde ayogera asirikenga.

³¹Kubanga mwenna musobola okwogera ebyʼobunnabbi nga mwogera mu mpalo, bonna balyoke bayige era bongerwemu amaanyi.

³²Abalina omwoyo ogwʼobunnabbi bafugibwa bannabbi,

³³kubanga Katonda si wa luyoogaano, wabula wa mirembe.

³³Kale nga bwe kiri mu Kkanisa zʼabatukuvu zonna,

³⁴abakazi basirikenga busirisi mu kuŋŋaaniro, kubanga tebakkirizibwa kwogera, wabula okukulemberwa ngʼamateeka bwe gagamba.

³⁵Bwe wabangawo kye baagala okubuuza babuuzenga babbaabwe eka, kubanga kya nsonyi omukazi okwogera mu Kkanisa.

³⁶Kale mulowooza nti Ekigambo kya Katonda kyatandikira mu mmwe oba nti Mmwe be kyatuukako mwekka?

³⁷Omuntu yenna alowooza okuba nnabbi oba omuntu owʼomwoyo, ategeere mu bujjuvu nti Bino bye mbawandiikira kye kiragiro kya Mukama.

³⁸Naye omuntu yenna atabifaako naye si wa kufiibwako.

³⁹Kale baganda bange muyaayaanirenga okwogera ebyʼobunnabbi, kyokka okwogera mu nnimi temukuziyiza.

⁴⁰Naye byonna bikolebwenga nga bwe kisaana era mu ntegeka entuufu.