1 Abakkolinso 16:1-24 LGCB2014 - Bible AI

¹Kale ebyo ebikwata ku kuyamba abantu ba Katonda, mmwe mukole nga bwe nagamba abʼEkkanisa zʼe Ggalatiya.

²Buli omu ku mmwe ngʼasinziira ku kufuna kwe mu wiiki, abengako kyʼatereka, ebintu bireme kukuŋŋaanyizibwa nga nzize.

³Kale bwe ndituuka ne mutuma abo be munaasiima ne mbawa ebbaluwa ne batwala ebirabo byammwe e Yerusaalemi.

⁴Naye bwe kirirabika nga nange nsaanye ŋŋende, kale balimperekerako.

⁵Ŋŋenda kujja gye muli nga mpitira e Makedoniya, gye ndimala akabanga akatono.

⁶Osanga ewammwe gye ndimala ebbanga eriwera, oboolyawo ndiba nammwe mu biseera ebyʼobutiti byonna, mulyoke munnyambe buli gye nnaalaganga.

⁷Saagala kubalabako kaseera katono, nsuubira okumala nammwe ekiseera, Mukama waffe bwʼalisiima.

⁸Kyokka ŋŋenda kubeera mu Efeso okutuusa ku Pentekoote.

⁹Kubanga ddala oluggi lwʼEnjiri lunziguliddwawo, newaakubadde ngʼeriyo bangi abampakanya.

¹⁰Timoseewo bwʼajjanga, mumuyambe atereere bulungi mu mmwe, kubanga naye akola omulimu gwa Mukama waffe nga nze.

¹¹Noolwekyo waleme kubaawo amunyooma. Mumuyambe olugendo lwe lube lwa mirembe, ajje gye ndi. Kubanga nze nʼabooluganda tumulindiridde.

¹²Naye ebyo ebikwata ku wooluganda Apolo, namwegayirira nnyo ajje gye muli, ngʼali nʼabooluganda abalala, kyokka ye nʼatayagala kujja kaakano, wabula alijja ngʼafunye ebbanga.

¹³Mutunulenga, munywerere mu kukkiriza, mubeere bazira era abʼamaanyi.

¹⁴Buli kye mukola mukikolerenga mu kwagala.

¹⁵Abooluganda, mumanyi nti Mu Akaya abʼomu nnyumba ya Suteefana be baasooka okukkiriza Mukama waffe, era beewaayo okuyamba nʼokuweereza abantu ba Katonda. Kale, abooluganda, mbasaba

¹⁶muwulirenga abantu ngʼabo, era na buli omu afube okukoleranga awamu nabo.

¹⁷Suteefana ne Folutunaato ne Akayiko[5] bwe bajja gye ndi nasanyuka, kubanga baaliwo mu kifo kyammwe.

¹⁸Era bansanyusa, era nga nammwe bwe baabasanyusa. Abantu ngʼabo musaana mubalage nga bwe musiimye okuweereza kwabwe.

¹⁹Ekkanisa eyʼomu Asiya ebalamusizza. Akula ne Pulisikira awamu nʼEkkanisa ya Kristo eri mu maka gaabwe babalamusizza nnyo mu Mukama waffe.

²⁰Era abooluganda bonna babalamusizza. Mulamusagane mu nʼokunywegera okutukuvu.

²¹Nze, Pawulo, mbaweereza okulamusa kwange kuno, kwe mpandiika nze nzennyini nʼomukono gwange.

²²Obanga waliwo atayagala Mukama, akolimirwe. Mukama waffe Yesu, jjangu!

²³Ekisa kya Mukama waffe Yesu Kristo kibeerenga nammwe.

²⁴Mwenna mbalamusizza nʼokwagala mu Kristo Yesu. Amiina.