1 Abakkolinso 2:1-16 LGCB2014 - Bible AI

¹Bwe najja gye muli abooluganda sajja gye muli na bumanyirivu mu kwogera wadde amagezi nga nangirira ekyama kya Katonda gye muli.

²Kubanga nasalawo obutamanya kintu kyonna mu mmwe wabula Yesu Kristo oyo eyakomererwa.

³Bwe nnali nammwe nnali munafu, nga ntya era nga nkankana nnyo.

⁴Era okubuulira kwange nʼokuyigiriza tebyali mu bigambo bya magezi ebisendasenda, naye byali mu maanyi ne Mwoyo Mutukuvu,

⁵okukkiriza kwammwe kuleme kuba kwʼamagezi ga bantu wabula kwesigame ku maanyi ga Katonda.

⁶Naye eri abo abakulu mu mwoyo, twogera ebyʼamagezi agatali ga mu mulembe guno, wadde agʼabafuzi abʼomu mulembe guno abaggwaawo.

⁷Wabula twogera ebyʼamagezi ga Katonda, agatamanyiddwa era agakisibwa, Katonda bye yateekateeka edda nʼedda olwʼekitiibwa kyaffe;

⁸tewali nʼomu ku bafuzi abʼomulembe guno abaagategeera, kubanga singa baamanya tebandikomeredde Mukama owʼekitiibwa.

⁹Naye nga bwe kyawandiikibwa nti,

⁹“Eriiso bye litalabangako, nʼokutu bye kutawulirangako, nʼomutima gwʼomuntu kye gutalowoozangako Katonda bye yategekera abo abamwagala.”

¹⁰Naye ffe Katonda yabitubikkulira mu Mwoyo, kubanga Omwoyo anoonyereza ebintu byonna, nʼebyʼomunda ennyo ebya Katonda.

¹¹Kubanga muntu ki ategeera ebyʼomuntu omulala okuggyako omwoyo wʼomuntu oyo ali mu ffe? Noolwekyo nʼebintu bya Katonda tewali abimanyi okuggyako Omwoyo wa Katonda.

¹²Era kaakano ffe tetwafuna mwoyo wa ku nsi, wabula Omwoyo eyava eri Katonda, tulyoke tumanye ebintu Katonda bye yatuwa obuwa,

¹³era ne mu bigambo bye twogera so si mu kuyigirizibwa okwʼamagezi gʼabantu, naye mu bigambo Omwoyo byʼayigiriza, ebintu ebyʼOmwoyo nga bikwatagana nʼebyʼOmwoyo.

¹⁴Omuntu obuntu tasobola kufuna bintu bya Mwoyo wa Katonda, kubanga busirusiru gyʼali, era tasobola kubimanya, kubanga bikeberwa Mwoyo.

¹⁵Naye omuntu owʼOmwoyo akebera ebintu byonna, naye tewali nʼomu amukebera.

¹⁶“Kubanga ani eyali ategedde okulowooza kwa Mukama, era ani alimulagira? Kyokka ffe tulina endowooza ya Kristo.”