1 Abakkolinso 6:1-20 LGCB2014 - Bible AI

¹Omuntu yenna mu mmwe bwʼaba nʼensonga ne munne, agitwala eri abatali batuukirivu oba eri abatukuvu?

²Oba temumanyi ngʼabatukuvu be balisalira ensi omusango? Kale obanga mmwe mulisalira ensi omusango, temusobola kusala nsonga ntono eziri mu mmwe?

³Temumanyi nga ffe tulisalira bamalayika omusango, okwo nga totaddeeko bintu bya mu bulamu buno?

⁴Kale bwe muba nʼensonga lwaki muzitwala mu abo abanyoomebwa ekkanisa ne mubalonda okuba abalamuzi?

⁵Njagala kubakwasa nsonyi; ddala mu mmwe temuli muntu nʼomu alina magezi asobola okusala ensonga wakati wʼabooluganda?

⁶Naye owooluganda ayinza okuwoza nʼowooluganda mu maaso gʼabatali bakkiriza?

⁷Nʼokuwozaŋŋana mwekka na mwekka kiraga nti muli mu kabi. Lwaki obutamala gakolwanga bubi? Lwaki obutamala galyazaamaanyizibwanga?

⁸Naye musobya baganda bammwe ne mubalyazaamaanya.

⁹Oba temumanyi ngʼabatali batuukirivu tebaliyingira mu bwakabaka bwa Katonda? Temulimbibwanga. Abakaba, newaakubadde abasinza bakatonda abalala, newaakubadde abenzi, newaakubadde abasajja abeeyisa ngʼabakazi, newaakubadde abalya ebisiyaga,[3]

¹⁰newaakubadde ababbi, newaakubadde aboomululu, newaakubadde abatamiivu, newaakubadde abajerega, newaakubadde abanyazi tebaliyingira mu bwakabaka bwa Katonda.

¹¹Era abamu ku mmwe mwali nga bo, naye ebibi byammwe byanaazibwa era mwatukuzibwa era mwaweebwa obutuukirivu mu linnya lya Mukama waffe Yesu Kristo nʼOmwoyo wa Katonda waffe.

¹²Ebintu byonna nzikirizibwa okubikola, mu mateeka, naye byonna tebinsanira. Ebintu byonna nzikirizibwa okubikola naye sigenda kufugibwa kintu na kimu.

¹³Ebyokulya bya lubuto, nʼolubuto lwa byakulya. Naye byombi Katonda alibizikiriza. Omubiri si gwa bwenzi, naye gwa Mukama.

¹⁴Era Katonda eyazuukiza Mukama waffe alituzuukiza olwʼamaanyi ge.

¹⁵Temumanyi ngʼemibiri gyammwe bitundu bya Kristo? Ate nzirire ebitundu bya Kristo mbifuule ebyʼomwenzi? Kikafuuwe.

¹⁶Oba temumanyi nti Omuntu yenna eyeegatta nʼomwenzi, emibiri gyammwe gifuuka gumu? Kubanga kigambibwa nti, ⓑ “Bombi balifuuka omubiri gumu.”

¹⁷Naye eyeegatta ne Mukama waffe bafuuka omu mu mwoyo.

¹⁸Mudduke obwenzi. Buli kibi omuntu kyʼakola kiba ku mubiri, naye ayenda akola ekibi ku mubiri gwe ye yennyini.

¹⁹Oba temumanyi ngʼomubiri gwammwe ye Yeekaalu ya Mwoyo Mutukuvu Katonda gwe yabawa, era nʼemibiri gyammwe si gyammwe ku bwammwe?

²⁰Kubanga mwagulibwa na muwendo, noolwekyo emibiri gyammwe gigulumizenga Katonda.