1 Abakkolinso 9:1-27 LGCB2014 - Bible AI

¹Ssiri wa ddembe? Ssiri mutume? Ssaalaba Yesu Mukama waffe? Si mmwe bibala byʼomulimu gwange mu Mukama waffe?

²Obanga ssiri mutume eri abalala, naye ndi mutume eri mmwe, kubanga mmwe kabonero kʼobutume bwange mu Mukama waffe.

³Ekyo kyʼekyʼokuwoza kyange eri abo abambulirizaako.

⁴Sirina buyinza kulya na kunywa?

⁵Singa nnewasiza omukazi, siyinza kutambula naye mu ŋŋendo zange ngʼabatume abalala ne Keefa[4], ne baganda ba Mukama waffe bwe bakola?

⁶Oba Balunabba nange, ffe ffekka ffe tusaana okwekolera?

⁷Muserikale ki ali mu magye nga yeesasula empeera? Muntu ki eyalima ennimiro yʼemizabbibu naye nʼaziyizibwa okulya ku bibala byayo? Oba ani alunda ekisibo nʼatanywa ku mata gaamu?

⁸Ebyo mbyogera ku bwange ngʼomuntu, etteeka nalyo si bwe ligamba?

⁹ⓒ Kubanga kyawandiikibwa mu mateeka ga Musa nti, “Tosibanga mumwa gwa nte ewuula eŋŋaano,” Mulowooza Katonda afa ku bya nte zokka,

¹⁰oba kino akyogera ku lwaffe? Kubanga kino kyawandiikibwa ku lwaffe, oyo alima mu kusuubira alime, nʼoyo awuula asuubire okufuna ku bibala.

¹¹Obanga ffe twabasigamu ebyʼomwoyo, tekiriba kya kitalo bwe tulikungula ebyammwe ebyʼomubiri?

¹²Kale obanga abalala balina obuyinza ku mmwe, ffe tetusaanidde nnyo nʼokusingawo? Kyokka ffe tetwabakaka kubituwa.

¹²Naye tugumiikiriza byonna, tuleme okuziyiza Enjiri ya Kristo.

¹³Temumanyi ngʼabo abakola mu Yeekaalu baliisibwa bya Yeekaalu, era nga nʼabo abaweereza ku kyoto bagabana bya ku kyoto?

¹⁴Mu ngeri yʼemu Mukama waffe yalonda abo ababuulira Enjiri baliisibwenga olwʼEnjiri.

¹⁵Kyokka nze siriiko na kimu ku ebyo kye nkozesezzaako. Era ssawandiika bino ndyoke binkolerwe kubanga waakiri nze okufa okusinga okwenyumiriza kwange bwe kutaabeemu nsa.

¹⁶Kubanga bwe mbuulira Enjiri sisobola kwenyumiriza, kubanga mpalirizibwa okugibuulira. Era ziba zinsanze bwe sigibuulira.

¹⁷Kubanga bwe mbuulira Enjiri olwʼokweyagalira, mbeera nʼempeera, naye ne bwe mba nga ssaagala, nkikola lwa kubanga nakwasibwa omulimu ogwo.

¹⁸Kale empeera yange yʼeruwa? Empeera yange kwe kubuulira Enjiri nga sisasulwa era nga sibasaba nsasulwe olwʼomulimu ogwo nga bwe nsaanidde.

¹⁹Kubanga newaakubadde nga ndi wa ddembe eri abantu bonna, nfuuka omuddu wa bonna olwʼokweyagalira, ndyoke ndeete bangi eri Kristo.

²⁰Eri Abayudaaya nafuuka ngʼOmuyudaaya ndyoke nsobole okubaleeta eri Kristo. Nʼeri abo abafugibwa amateeka nafuuka ngʼafugibwa amateeka, newaakubadde nze nga ssifugibwa mateeka, ndyoke mbaleete eri Kristo.

²¹Eri abo abatalina mateeka ga Katonda, nafuuka ngʼatafugibwa mateeka, newaakubadde nga ssaaleka mateeka ga Katanda, naye nga ndi mu mateeka ga Kristo, nʼabo abatalina mateeka ndyoke mbaleete eri Kristo.

²²Mu banafu nafuuka ngʼomunafu ndyoke mbaleete eri Kristo. Eri abantu bonna nfuuse byonna, mu ngeri yonna ndyoke mbeeko beentusa ku kulokolebwa.

²³Byonna mbikola olwʼenjiri, era nange ndyoke nfunire wamu nabo ebiva mu Njiri eyo.

²⁴Temumanyi nga mu mpaka ezʼokudduka abo bonna abazeetabamu badduka, naye awangula ekirabo abeera omu? Kale nammwe muddukenga bwe mutyo nga mufubirira okuwangula ekirabo.

²⁵Buli muzanyi eyeetaba mu mpaka ateekwa okufuna okutendekebwa okwʼamaanyi nga yeefuga mu bintu byonna. Ekyo bakikola balyoke bawangule engule eyonooneka. Naye ffe tulifuna engule eteyonooneka.

²⁶Noolwekyo nziruka nga nnina kye ŋŋenderera. Sirwana ngʼomukubi wʼebikonde amala gawujja nʼakuba ebbanga.

²⁷Naye mbonereza omubiri gwange ne ngufuula omuddu wange, si kulwa nga mbuulira abalala Enjiri, ate nze nzennyini ne sisiimibwa.