1 Bassekabaka 12:1-33 LGCB2014 - Bible AI

¹Lekobowaamu nʼalaga e Sekemu, Abayisirayiri bonna gye baali bakuŋŋaanidde okumufuula kabaka.

²Yerobowaamu mutabani wa Nebati bwe yawulira ekyo, ngʼali e Misiri, gye yali yeewaŋŋangusirizza, nʼakomawo.

³Abantu ne batumira Yerobowaamu, ye nʼekibiina kyonna ekya Isirayiri ne bagenda ewa Lekobowaamu, ne bamugamba nti,

⁴“Kitaawo yatuteekako ekikoligo ekizito, naye kaakano wewula ku mirimu emizibu ne ku kikoligo ekizito kye yatuteekako, naffe tunaakuweereza.”

⁵Lekobowaamu nʼabaddamu nti, “Mumpe ebbanga lya nnaku ssatu, nʼoluvannyuma nnaabaddamu.” Abantu ne beetambulira.

⁶Awo kabaka Lekobowaamu nʼagenda ne yeebuuza ku bakadde abaaweerezanga kitaawe Sulemaani, mu biseera bwe yali ngʼakyali mulamu. Nʼababuuza nti, “Mumpa magezi ki, ku nsonga abantu bano gye bansabye?”

⁷Ne bamuddamu nti, “Leero bwʼonoobeera omuwulize eri abantu bano ne weetoowaza, nʼobaweereza, era nʼobaddamu nʼeggonjebwa, kale banaabeeranga baweereza bo.”

⁸Naye Lekobowaamu nʼatawuliriza magezi abakadde ge baamuwa, nʼagenda ne yeebuuza ku bavubuka be yali akuze nabo, era nga be bamuweereza.

⁹Nʼababuuza nti, “Mumpa magezi ki okuddamu abantu abasabye okuwewula ku kikoligo kitange kye yabateekako?”

¹⁰Abavubuka abaakulira awamu naye ne bamuddamu nti, “Gamba abantu abo abakusabye nti, ‘Okendeeze ku kikoligo kitaawo kye yabateekako nti, “Engalo yange eya nasswi esinga ekiwato kya kitange obunene.

¹¹Kitange yabateekako ekikoligo ekizito, naye nze ndyongera ku kikoligo kyammwe. Kitange yabakangavvulanga na nkoba, naye nze nnaabakangavvulanga nʼenjaba ezʼobusagwa.” ’ ”

¹²Oluvannyuma lwʼennaku ssatu, Yerobowaamu nʼabantu bonna, ne baddayo eri Lekobowaamu, nga bwe yali abagambye okudda oluvannyuma lwʼennaku essatu.

¹³Awo kabaka nʼaddamu abantu nʼebboggo, nʼagaana amagezi abakadde ge baamuwa,

¹⁴nʼagoberera agʼabavubuka, nʼayogera nti, “Kitange yafuula ekikoligo kyammwe okuba ekizito, naye nze nnaayongera ku kikoligo kyammwe. Kitange yabakangavvulanga na nkoba, naye nno nze nnaabakangavvula na njaba ezʼobusagwa.”

¹⁵Kabaka nʼatawuliriza bantu. Bino byonna byabaawo Mukama atuukirize ekigambo kye yayogera eri Yerobowaamu mutabani wa Nebati ngʼayita mu Akiya Omusiiro.

¹⁶Awo Isirayiri yenna bwe baalaba nga kabaka agaanye okubawuliriza, ne bamuddamu nti, “Mugabo ki gwe tulina mu Dawudi, oba kitundu ki kye tulina mu mutabani wa Yese? Mudde mu weema zammwe ayi Isirayiri! Weerabirire ggwe ennyumba ya Dawudi.” Awo Abayisirayiri[29] ne beddirayo ewaabwe.

¹⁷Naye abaana ba Isirayiri abaabeeranga mu bibuga bya Yuda, ne bafugibwa Lekobowaamu.

¹⁸ⓐ Lekobowaamu yalagira Adolaamu eyakuliranga emirimu egyʼobuwaze okugenda eri Abayisirayiri, okubalagira ebyʼokukola, naye ne bamukuba amayinja ne bamutta. Naye ye Kabaka Lekobowaamu nʼawona, nʼalinnya eggaali lye nʼaddukira e Yerusaalemi.

¹⁹Bwʼatyo Isirayiri nʼajeemera ennyumba ya Dawudi nʼokutuusa leero.

²⁰Abayisirayiri bonna bwe baawulira nti Yerobowaamu akomyewo, ne bamutumira ajje eri ekibiina, ne bamutikkira okuba kabaka wa Isirayiri yonna. Ekika kya Yuda kyokka kye kyasigala nga kigoberera ennyumba ya Dawudi.

²¹Awo Lekobowaamu bwe yatuuka mu Yerusaalemi nʼakuŋŋaanya ennyumba ya Yuda yonna, nʼekika kya Benyamini, abasajja abalwanyi emitwalo kkumi na munaana, okulwanagana nʼennyumba ya Isirayiri, asobole okweddiza obwakabaka.

²²Naye ekigambo kya Katonda ne kijjira Semaaya omusajja wa Katonda nti,

²³“Gamba Lekobowaamu mutabani wa Sulemaani kabaka wa Yuda, nʼennyumba ya Yuda yonna ne ya Benyamini, era nʼabantu bonna nti,

²⁴‘Bwʼati bwʼayogera Mukama nti, Temwambuka kulwana ne baganda bammwe, Abayisirayiri. Buli omu ku mmwe addeyo eka kubanga kino nze nkisazeewo.’ ” Awo ne bagondera ekigambo kya Mukama, ne baddayo ewaabwe, nga Mukama bwe yalagira.

²⁵Awo Yerobowaamu nʼazimba Sekemu mu Efulayimu ensi eyʼensozi, era nʼabeera eyo. Eyo gye yava nʼagenda nʼazimba Penieri.

²⁶Yerobowaamu ne yeerowooza munda ye nti, “Obwakabaka sikulwa nga budda mu nnyumba ya Dawudi!

²⁷Abantu bano bwe banayambukanga okuwaayo ebiweebwayo mu yeekaalu ya Mukama mu Yerusaalemi, olunaku olumu emitima gyabwe giyinza okukyukira mukama waabwe, Lekobowaamu, kabaka wa Yuda. Balinzita ne badda gyʼali.”

²⁸Awo Kabaka Yerobowaamu nʼaweebwa amagezi okukola ennyana bbiri eza zaabu. Nʼagamba abantu nti, “Kijja kubazitoowerera nnyo okwambukanga e Yerusaalemi. Baabano bakatonda bammwe, Ayi Isirayiri, abaabaggya mu Misiri.”

²⁹Emu nʼagiteeka mu Beseri nʼendala mu Ddaani.

³⁰Ekintu ekyo ne kiba kibi nnyo, kubanga abantu baatuuka nʼokugenda e Ddaani okusinza ekifaananyi kyʼennyana ekyali kiteekeddwa eyo.

³¹Yerobowaamu nʼazimba amasabo mu bifo ebigulumivu nʼalonda bakabona[30] ngʼabaggya mu bantu abaabulijjo, newaakubadde nga tebaali ba kika kya Leevi.

³²Nʼakola embaga ku lunaku olwʼekkumi nʼettaano mu mwezi ogwʼomunaana, okufaanana nʼembaga ebeerawo mu Yuda, era nʼawaayo ebyokebwa ku kyoto. Kino yakikola mu Beseri ngʼawaayo ssaddaaka eri ennyana ze yakola. Nʼassa bakabona mu bifo ebigulumivu bye yali akoze e Beseri.

³³Ku lunaku olwʼekkumi nʼettaano mu mwezi ogwʼomunaana gwe yeerondera, nʼawaayo ebiweebwayo ebyokebwa ku kyoto kye yazimba e Beseri. Era nʼassaawo embaga Abayisirayiri gye baakuumanga, nʼayambukanga ne ku kyoto okuwaayo ebyokebwa.