1 Bassekabaka 14:1-31 LGCB2014 - Bible AI

¹Awo mu biro ebyo Abiya mutabani wa Yerobowaamu nʼalwala,

²Yerobowaamu nʼagamba mukyala we nti, “Golokoka ogende e Siiro, nga weefuddefudde baleme kumanya nga bwʼoli mukazi wa Yerobowaamu. Akiya nnabbi, eyanjogerako nti ndiba kabaka wʼabantu bano ali eyo.

³Twala emigaati kkumi, ne bukeeke, nʼensumbi eyʼomubisi gwʼenjuki, ogende gyʼali era ye alikubuulira omwana bwʼaliba.”

⁴Awo muka Yerobowaamu nʼakola bwʼatyo, nʼagenda ewa Akiya e Siiro.

⁴Akiya yali muzibe, kubanga amaaso ge gaali gayimbadde olwʼobukadde.

⁵Naye Mukama yali alabudde Akiya nga muka Yerobowaamu bwʼanajja okumubuuza ebifa ku mutabani waabwe, eyali alwadde era nga bwʼajja okumuddamu, nga bwʼanaatuuka ajja kwefuula okuba omuntu omulala.

⁶Awo Akiya bwe yawulira enswagiro ku mulyango, nʼamugamba nti, “Yingira muka Yerobowaamu. Lwaki weefuula okuba omuntu omulala? Ntumiddwa gyʼoli nʼamawulire amabi.

⁷Genda ogambe Yerobowaamu nti Kino Mukama, Katonda wa Isirayiri kyʼagamba nti, ‘Nakugulumiza nga nkuggya mu bantu, ne nkufuula omukulembeze wa bantu bange Isirayiri.

⁸Naggya obwakabaka mu nnyumba ya Dawudi, ne mbukuwa, naye tobadde ngʼomuddu wange Dawudi, eyagondera ebiragiro byange era nʼabigoberera nʼomutima gwe gwonna, ngʼakola ekyo ekyali ekirungi mu maaso gange.

⁹Oyonoonye nnyo okusinga bonna abaakusooka. Weekoledde bakatonda abalala, nʼokola nʼebifaananyi ebisaanuuse nʼonneerabira; onsunguwazizza nnyo.

¹⁰“ ‘Kyendiva nsanyaawo ennyumba ya Yerobowaamu, era ndiggyawo ku Yerobowaamu buli mwana owoobulenzi yenna mu Isirayiri, omuddu nʼatali muddu. Ndiyokya ennyumba ya Yerobowaamu, ngʼomuntu bwʼayokya obusa, okutuusa lwe liggweerawo ddala.

¹¹Abo bonna aba Yerobowaamu abalifiira mu kibuga, embwa zirirya emirambo gyabwe, nʼennyonyi ezʼomu bbanga zirirya egyʼabo abalifiira ku ttale, kubanga Mukama yʼakyogedde!’

¹²“Wabula ggwe, ddayo eka. Bwʼonooba wakalinnya ekigere mu kibuga kyo, omulenzi anaafa.

¹³Isirayiri yonna banaamukaabira era ne bamuziika. Ye yekka owʼennyumba ya Yerobowaamu aliziikibwa, kubanga ye yekka mu nnyumba ya Yerobowaamu Mukama Katonda wa Isirayiri, gwʼalabyemu akalungi.

¹⁴“Mukama alyeyimusiza kabaka wa Isirayiri alisaanyaawo ennyumba ya Yerobowaamu mu kiseera ekitali kyʼewala nnyo.

¹⁵Mukama aliva ku Isirayiri, abeere ngʼekitoogo bwe kinyeenyezebwa mu mazzi, era alisimbula Isirayiri okubaggya mu nsi eno ennungi eya bajjajjaabwe, nʼabasaasaanyiza emitala wʼOmugga,[31] kubanga baasunguwaza Mukama bwe baakola bakatonda Baaseri.

¹⁶Era aliva ku Isirayiri olwʼebibi bya Yerobowaamu nʼebyo byʼayonoonesezza Isirayiri.”

¹⁷Awo muka Yerobowaamu nʼagolokoka okugenda e Tiruza. Olwayingira mu nnyumba yaabwe, omulenzi nʼafa.

¹⁸Ne bamuziika, era Isirayiri yonna ne bamukungubagira ngʼekigambo kya Mukama kye yayogerera mu nnabbi Akiya bwe kyali.

¹⁹Nʼebirala byonna ebyabaawo mu mirembe gya Yerobowaamu, entalo ze, nʼokufuga kwe, tebyawandiikibwa mu kitabo ekyʼebyʼomu mirembe gya bassekabaka ba Isirayiri?

²⁰Yafugira emyaka amakumi abiri mu ebiri, oluvannyuma ne yeebakira wamu ne bajjajjaabe; Nadabu mutabani we nʼamusikira, nʼalya obwakabaka.

²¹Lekobowaamu mutabani wa Sulemaani nʼalya obwakabaka bwa Yuda, ngʼalina emyaka amakumi ana mu gumu. Yafugira emyaka kkumi na musanvu mu Yerusaalemi, ekibuga Mukama kye yeeroboza mu bika byonna ebya Isirayiri olwʼerinnya lye. Nnyina yayitibwanga Naama, Omwamoni.

²²Yuda ne bakola ebibi mu maaso ga Mukama, okusinga ne bajjajjaabwe bye baakola era ebibi byabwe ne bikwasa Mukama obuggya.

²³Beezimbira ebifo ebigulumivu nʼempagi za Baaseri ku buli lusozi oluwanvu ne wansi wa buli muti omugazi.

²⁴Era waaliwo nʼabaalyanga ebisiyaga mu nsi, ne bakolanga ebyʼemizizo byonna abamawanga Katonda be yagoba mu maaso gʼAbayisirayiri bye baakolanga.

²⁵Mu mwaka ogwokutaano ogwʼobufuzi bwa kabaka Lekobowaamu, Sisaki kabaka wʼe Misiri nʼalumba Yerusaalemi.

²⁶Nʼatwala ebyʼobugagga ebyʼomu yeekaalu ya Mukama, nʼebyobugagga ebyʼomu lubiri lwa kabaka byonna, ngʼokwo kwʼotadde engabo eza zaabu Sulemaani ze yali akoze.

²⁷Awo kabaka Lekobowaamu nʼakola engabo ezʼebikomo okuzzaawo ziri, era nʼazikwasa abaduumizi bʼabambowa abaakuumanga wankaaki wʼolubiri lwa kabaka.

²⁸Buli Kabaka lwe yalaganga mu yeekaalu ya Mukama, abambowa ne bambalira engabo ezo, era Oluvannyuma ne bazizaayo mu kisenge kyʼabambowa we zaaterekebwanga.

²⁹Ebyafaayo ebirala byonna ebyʼomulembe gwa Lekobowaamu, ne bye yakola byonna, tebyawandiikibwa mu kitabo ekyʼebyomumirembe gya bassekabaka ba Yuda?

³⁰Waabangawo entalo ezʼolubeerera wakati wa Lekobowaamu ne Yerobowaamu.

³¹Lekobowaamu ne yeebakira wamu ne bajjajjaabe, era nʼaziikibwa mu kibuga kya Dawudi. Nnyina yayitibwanga Naama Omwamoni. Abiyaamuⓑ mutabani we nʼamusikira, nʼalya obwakabaka.