1 Bassekabaka 15:1-34 LGCB2014 - Bible AI

¹Awo mu mwaka ogwʼekkumi nʼomunaana ogwʼobufuzi bwa Yerobowaamu mutabani wa Nebati, Abiyaamuⓒ nʼatandika okufuga Yuda.

²Yafugira mu Yerusaalemi emyaka esatu. Nnyina ye yali Maaka muwala wa Abusaalomu.

³Nʼakola ebibi byonna kitaawe bye yakolanga, omutima gwe ne gutatuukirira mu maaso ga Mukama Katonda we ngʼomutima gwa jjajjaawe Dawudi bwe gwali.

⁴Naye ku lwa Dawudi, Mukama Katonda we nʼamuteerawo ettabaaza mu Yerusaalemi era nʼayimusa ne mutabani we okumusikira, era nʼokunyweza Yerusaalemi.

⁵Dawudi yakola ebirungi mu maaso ga Mukama, nʼagondera ebiragiro bya Mukama ennaku zonna ezʼobulamu bwe, okuggyako ensonga ya Uliya Omukiiti.

⁶Ne wabangawo entalo wakati wʼennyumba ya Lekobowaamu nʼennyumba ya Yerobowaamu ennaku zonna ezʼobulamu bwa Abiyaamu.

⁷Nʼebyafaayo ebirala byonna ebyʼokufuga kwa Abiyaamu, ne bye yakola, tebyawandiikibwa mu kitabo ekyʼebyomumirembe gya bassekabaka ba Yuda? Ne wabangawo entalo wakati wa Abiyaamu ne Yerobowaamu.

⁸Awo Abiyaamu ne yeebakira wamu ne bajjajjaabe era nʼaziikibwa mu kibuga kya Dawudi. Asa mutabani we nʼamusikira, nʼalya obwakabaka.

⁹Awo mu mwaka ogwʼamakumi abiri ogwʼobufuzi bwa Yerobowaamu kabaka wa Isirayiri, Asa nʼalya obwakabaka bwa Yuda.

¹⁰Yafugira mu Yerusaalemi emyaka amakumi ana mu gumu. Jjajjaawe omukazi nga ye Maaka muwala wa Abusaalomu.

¹¹Asa nʼakola ebirungi mu maaso ga Mukama, nga jjajjaawe Dawudi bwe yakola.

¹²Nʼagoba mu nsi abaalyanga ebisiyaga, era nʼaggyawo nʼebifaananyi ebyakolebwa nʼemikono byonna bajjajjaabe bye baakola.

¹³Era nʼagoba ne jjajjaawe Maaka ku bwa namasole kubanga yali akoze empagi ya Asera. Asa nʼagitema era nʼagyokera ku kagga Kidulooni.

¹⁴Newaakubadde nga teyaggyawo bifo bigulumivu, omutima gwe gwali ku Mukama ennaku ze zonna.

¹⁵Nʼayingiza mu yeekaalu ya Mukama effeeza, ne zaabu nʼebintu ebirala kitaawe bye yawaayo ne Asa yennyini bye yawaayo.

¹⁶Ne wabangawo entalo wakati wa Asa ne Baasa kabaka wa Isirayiri ennaku zonna ezʼokufuga kwabwe.

¹⁷Baasa kabaka wa Isirayiri nʼalumba Yuda nʼazingiza Laama obutaganya muntu nʼomu okufuluma wadde okuyingira mu kitundu kya Asa kabaka wa Yuda.

¹⁸Awo Asa nʼaddira effeeza ne zaabu yonna eyali esigadde mu ggwanika lya yeekaalu ya Mukama nʼeyʼolubiri lwe, nʼabikwasa abakungu be, nʼabiweereza Benikadadi mutabani wa Tabulimmoni, muzzukulu wa Keziyoni, eyali kabaka wa Busuuli ngʼafugira e Ddamasiko.

¹⁹Nʼayogera nti, “Wabeewo endagaano wakati wo nange, ngʼeyaliwo wakati wa kitaawo ne kitange. Laba nkuweereza ekirabo ekya ffeeza ne zaabu, omenyewo kaakano endagaano yo ne Baasa kabaka wa Isirayiri, anveeko.”

²⁰Benikadadi nʼakkiriziganya ne kabaka Asa era nʼaweereza abaduumizi bʼeggye lye okulumba ebibuga bya Isirayiri. Nʼakuba Iyoni, ne Ddaani, ne Aberubesumaaka ne Kinnerosi yonna ngʼokwo kwʼotadde Nafutaali.

²¹Awo Baasa bwe yakiwulira nʼalekeraawo okuzimba Laama, nʼaddukira e Tiruza.

²²Kabaka Asa nʼawa ekiragiro mu Yuda yonna nga kikwata ku buli muntu. Ne batwala amayinja agʼe Laama nʼembaawo Baasa bye yazimbisanga, kabaka Asa nʼabizimbisa Geba ekya Benyamini, ne Mizupa.

²³Ebyafaayo ebirala byonna ebyʼomu mirembe gya Asa, nʼobuwanguzi bwe era nʼebibuga bye yazimba, tebyawandiikibwa mu kitabo ekyʼebyomumirembe gya bassekabaka ba Yuda? Kyokka mu bukadde bwe, nʼalwala ebigere.

²⁴Awo Asa ne yeebakira wamu ne bajjajjaabe nʼaziikibwa mu kibuga kya jjajjaawe Dawudi. Yekosafaati, mutabani we nʼamusikira, nʼalya obwakabaka.

²⁵Nadabu mutabani wa Yerobowaamu nʼalya obwakabaka bwa Isirayiri mu mwaka ogwokubiri ogwʼobufuzi bwa Asa kabaka wa Yuda. Yafugira Isirayiri emyaka ebiri.

²⁶Nʼakola ebibi mu maaso ga Mukama, ngʼatambulira mu ngeri za kitaawe ne mu kibi kye, ebyaleetera Isirayiri okwonoona.

²⁷Awo Baasa mutabani wa Akiya owʼomu nnyumba ya Isakaali nʼamukolera olukwe, nʼamuttira e Gibbesoni ekibuga kyʼAbafirisuuti, Nadabu ne Isirayiri yenna bwe baali bakitaayizza.

²⁸Baasa nʼatta Nadabu mu mwaka ogwokusatu ogwʼobufuzi bwa Asa kabaka wa Yuda, ye nʼalya obwakabaka bwa Isirayiri.

²⁹Amangwago nga kyajje alye obwakabaka, nʼatta ennyumba ya Yerobowaamu yonna nʼatalekaawo muntu nʼomu omulamu. Yabazikiriza bonna ngʼekigambo kya Mukama kye yayogerera mu muddu we Akiya Omusiiro,

³⁰olwʼebibi bya Yerobowaamu bye yakola, era bye yayonoonyesa Isirayiri, nʼokusunguwaza ne bisunguwaza Mukama Katonda wa Isirayiri.

³¹Ebyafaayo ebirala ebyʼomu mirembe gya Nadabu, ne bye yakola, tebyawandiikibwa mu kitabo ekyʼebyomumirembe gya bassekabaka ba Isirayiri?

³²Ne wabangawo entalo wakati wa Asa ne Baasa kabaka wa Isirayiri, ennaku zonna ezʼokufuga kwabwe.

³³Awo mu mwaka ogwokusatu ogwʼobufuzi bwa Asa kabaka wa Yuda, Baasa mutabani wa Akiya nʼafuuka kabaka wa Isirayiri yonna e Tiruza, era nʼafugira emyaka amakumi abiri mu ena.

³⁴Nʼakola ebibi mu maaso ga Mukama, ngʼatambulira mu ngeri za Yerobowaamu, ne mu kibi kye, kye yayonoonyesa Isirayiri.