1 Bassekabaka 17:1-24 LGCB2014 - Bible AI

¹Awo Eriya Omutisubi owʼe Tisubi mu Gireyaadi, nʼagamba Akabu nti, “Mukama Katonda wa Isirayiri gwe mpeereza nga bwʼali omulamu, tewaabe musulo newaakubadde enkuba mu myaka egijja wabula olwʼekigambo kyange.”

²Awo ekigambo kya Mukama ne kijjira Eriya nga kigamba nti,

³“Vva wano ogende ebuvanjuba weekweke ku kagga Kerisi akoolekera Yoludaani.

⁴Ojja kunywanga mu kagga, era ndagidde bannamuŋŋoona okukuliisiza eyo.”

⁵Nʼakola nga Mukama bwe yamulagira, nʼalaga ku kagga Kerisi, akoolekera Yoludaani, nʼabeera eyo.

⁶Bannamuŋŋoona ne bamuleeteranga emmere nʼennyama buli nkya na buli kawungeezi, era nʼanywanga mu kagga.

⁷Bwe waayitawo ebbanga, akagga ne kakalira olwʼobutabaawo nkuba mu nsi.

⁸Awo ekigambo kya Mukama ne kimujjira nga kigamba nti,

⁹“Situkiramu ogende e Zalefaasi ekya Sidoni obeere eyo. Ndagidde nnamwandu ali eyo okukuwanga emmere.”

¹⁰Awo nʼagolokoka nʼalaga e Zalefaasi. Bwe yatuuka ku wankaaki wʼekibuga, waliwo nnamwandu eyali alondalonda obuku. Eriya nʼamusaba ngʼagamba nti, “Nkwegayiridde, ndeetera ku mazzi matono mu kibya nnyweko.”

¹¹Bwe yali ngʼagenda okugakima, Eriya nʼamukoowoola ngʼagamba nti, “Nkwegayiridde, ndeeteraayo nʼomugaati.”

¹²Nʼaddamu nti, “Mukama nga bwʼali omulamu, sirina mugaati okuggyako olubatu lwʼobutta mu kibya nʼotufuta mu kasumbi, era kaakano nkuŋŋaanya buku mbutwale eka neefumbire nze nʼomwana wange tubulye tufe.”

¹³Eriya nʼamugamba nti, “Totya. Genda eka okole nga bwʼogambye. Naye sooka onfumbire akagaati, okuva mu byʼolina okandeteere, oluvannyuma weefumbire ggwe nʼomwana wo.

¹⁴Kubanga kino Mukama Katonda wa Isirayiri kyʼagamba nti, ‘Ekibya kyʼobutta tekiriggwaamu, so nʼakasumbi kʼamafuta tekalikalira okutuusa olunaku Mukama lwʼalitonyesa enkuba ku nsi.’ ”

¹⁵Nʼagenda nʼakola nga Eriya bwe yamugamba, era ne waba emmere bulijjo eya Eriya ne nnamwandu nʼamaka ge.

¹⁶Ekibya kyʼobutta tekyakendeera wadde akasumbi kʼamafuta okukalira, ngʼekigambo kya Mukama kye yayogerera mu Eriya bwe kyali.

¹⁷Bwe waayitawo ebbanga, omwana wa nnamwandu nʼalwala nnyo, obulwadde ne bweyongera okutuusa lwe yafa.

¹⁸Nnamwandu nʼagamba Eriya nti, “Kiki kyʼonnanga, omusajja wa Katonda? Wajja okunzijukiza ekibi kyange nʼokutta omwana wange?”

¹⁹Eriya nʼamuddamu nti, “Mpa omwana wo.” Nʼamuggya mu kifuba kye, nʼamusitula nʼamutwala mu kisenge ekya waggulu[32] gye yabeeranga, nʼamugalamiza ku kitanda kye.

²⁰Nʼakoowoola Mukama ngʼagamba nti, “Ayi Mukama Katonda wange, ne nnamwandu ono gwe mbeera naye omuleeseko ekikangabwa kino, nʼotta omwana we?”

²¹Eriya ne yeegololera ku mulenzi emirundi esatu, nʼakaabira Mukama ngʼagamba nti, “Ayi Mukama Katonda wange, obulamu bwʼomulenzi ono bukomewo nate!”

²²Mukama nʼawulira okukaaba kwa Eriya, obulamu bwʼomulenzi ne bumuddamu, era nʼalama.

²³Awo Eriya nʼasitula omwana nʼamuserengesa okuva mu kisenge nʼamuleeta mu nnyumba, nʼamuwa nnyina, nʼamugamba nti, “Laba mutabani wo mulamu!”

²⁴Awo nnamwandu nʼagamba Eriya nti, “Kaakano ntegedde ngʼoli musajja wa Katonda, era nʼekigambo kya Mukama ekiva mu kamwa ko kiba kya mazima.”