1 Bassekabaka 20:1-43 LGCB2014 - Bible AI

¹Awo Benikadadi kabaka wʼe Busuuli nʼakuŋŋaanya eggye lye lyonna wamu ne bakabaka amakumi asatu mu babiri nʼembalaasi nʼamagaali gaabwe, bonna ne bambuka okuzingiza Samaliya nʼokulwana nakyo.

²Nʼatuma ababaka mu kibuga eri Akabu kabaka wa Isirayiri ngʼagamba nti, “Bwʼati bwʼayogera Benikadadi nti,

³‘Effeeza yo ne zaabu yo byange ate era ne bakyala bo abasinga obulungi nʼabaana bo nabo bange.’ ”

⁴Kabaka wa Isirayiri nʼaddamu nti, “Nga bwʼogambye, mukama wange kabaka, nze ne bye nnina byonna bibyo.”

⁵Ababaka ne baddayo ewa Akabu nate ne bamugamba nti, “Kino Benikadadi kyʼagamba nti, ‘Natuma nga njagala ffeeza yo ne zaabu yo, nʼabakyala bo nʼabaana bo.

⁶Naye olunaku lwʼenkya essaawa nga zino nzija kuweereza abakungu bange banoonyeemu mu lubiri lwo ne mu nnyumba zʼabakungu bo, era bajja kutwala ebibyo byonna ebyʼomuwendo.’ ”

⁷Awo kabaka wa Isirayiri nʼayita abakadde bonna abʼensi, nʼabagamba nti, “Mulabe omusajja ono bwʼanoonya emitawaana! Bwe yatumya bakyala bange nʼabaana bange wamu ne ffeeza yange ne zaabu yange, sabimumma.”

⁸Abakadde nʼabantu bonna ne bamuddamu nti, “Tomuwuliriza wadde okukkiriziganya naye.”

⁹Awo kabaka nʼaddamu ababaka ba Benikadadi nti, “Mutegeeze mukama wange kabaka nti, ‘Omuddu wo nzija kukola byonna bye walagidde ku ntandikwa, naye kino ekyʼoluvannyuma siyinza kukikola.’ ”

¹⁰Awo Benikadadi nʼaweereza obubaka obulala eri Akabu nti, “Bakatonda bankole bwe batyo nʼokukirawo, enfuufu ya Samaliya bwe teebune mu bibatu byʼabasajja bonna abangoberera.”

¹¹Kabaka wa Isirayiri nʼamuddamu nti, “Mumugambe nti, ‘Eyeesiba ebyokulwanyisa aleme okwenyumiriza ngʼoyo abyesumulula.’ ”

¹²Benikadadi bwe yawulira obubaka obwo, ngʼali mu kutamiira ne bakabaka abalala mu weema zaabwe, nʼalagira abasajja be nti, “Mweteeketeeke okulumba.” Ne beeteekateeka okulumba ekibuga.

¹³Mu kiseera ekyo ne wabaawo nnabbi eyajja eri Akabu kabaka wa Isirayiri nʼalangirira nti, “Bwʼati bwʼayogera Mukama nti, ‘Olaba eggye lino eddene? Nzija kulikuwa mu mukono gwo leero, otegeere nga nze Mukama.’ ”

¹⁴Akabu nʼabuuza nti, “Anakikola atya?” Nnabbi nʼaddamu nti, “Bwʼati bwʼayogera Mukama nti, ‘Abavubuka bo abʼabaduumizi bʼamasaza, bajja kukubeera.’ ” Akabu ne yeeyongera okubuuza nti, “Ani anasooka okulumba?” Nnabbi nʼaddamu nti, “Ggwe.”

¹⁵Awo Akabu nʼayita abavubuka abʼabaduumizi bʼamasaza, ne bawera ebikumi bibiri mu asatu mu babiri (232). Era nʼakuŋŋaanya ne Isirayiri yenna, bonna awamu ne baba kasanvu (7,000).

¹⁶Ne batabaala mu ttuntu nga Benikadadi ne bakabaka amakumi asatu mu ababiri be yali alagaanye nabo bali mu kutamiira.

¹⁷Abavubuka bʼabaduumizi bʼamasaza be baasooka okulumba.

¹⁷Naye Benikadadi yali atumye ababaka okuketta, ne bamutegeeza nti, “Waliwo abasajja abajja nga bava Samaliya.”

¹⁸Nʼayogera nti, “Bwe baba bazze na mirembe, mubawambe, ne bwe baba nga baze ku lutalo, era mubawambe.”

¹⁹Abavubuka bʼabaduumizi bʼamasaza ne bafuluma ne balumba okuva mu kibuga, nga nʼeggye libagoberera.

²⁰Buli omu ku bo nʼatta gwe yayolekera. Abasuuli ne badduka, nga nʼAbayisirayiri bwe babagoba, naye Benikadadi kabaka wʼe Busuuli nʼawonera ku mbalaasi nʼabamu ku basajjabe abeebagala embalaasi.

²¹Awo kabaka wa Isirayiri nʼabagobera ddala era nʼawamba embalaasi nʼamagaali, era Abasuuli bangi ne bafa.

²²Awo ebyo nga biwedde, nnabbi nʼagenda eri kabaka wa Isirayiri nʼamugamba nti, “Weenyweze, olabe ekiteekwa okukolebwa, kubanga omwaka ogunaddirira kabaka wʼe Busuuli ajja kukulumba nate.”

²³Mu kiseera ekyo, abakungu ba kabaka wʼe Busuuli ne bamuwa amagezi nti, “Bakatonda bʼAbayisirayiri bakatonda ba nsozi, era kyebavudde batusinza amaanyi. Naye bwe tunaabalwanyisizza mu lusenyi, mazima ddala tunaabasinza amaanyi.

²⁴Kola bwʼoti, ggyawo bakabaka bonna mu bifo byabwe ebyʼokuduumira, osseewo abaduumizi abalala.

²⁵Oteekwa okufuna eggye eryʼenkana liri lye wafiirwa, embalaasi edde mu kifo kyʼembalaasi, nʼeggaali mu kifo kyʼeggaali, tulyoke tulwane nabo mu lusenyi, olwo tunaabasinzizza ddala amaanyi.” Nʼabawuliriza era nʼakola bwʼatyo.

²⁶Omwaka ogwaddirira Benikadadi nʼakuŋŋaanya Abasuuli, nʼayambuka mu Afeki okulwana ne Isirayiri.

²⁷Awo abantu ba Isirayiri nabo ne bakuŋŋaana ne baweebwa entanda yaabwe, ne bagenda okubasisinkana. Abayisirayiri ne basiisira okuboolekera ne bafaanana ngʼebisibo bibiri ebitono ebyʼembuzi, naye Abasuuli ne babuna ensi yonna.

²⁸Awo omusajja wa Katonda nʼasembera, nʼagamba kabaka wa Isirayiri nti, “Bwʼati bwʼayogera Mukama nti, ‘Olwʼokuba Abasuuli balowooza nga Mukama Katonda wa ku nsozi so si Katonda wa mu biwonvu, ndigabula eggye lino eddene mu mukono gwo, otegeere nga nze Mukama.’ ”

²⁹Ne basiisira nga boolekaganye okumala ennaku musanvu, ku lunaku olwʼomusanvu ne balumbagana. Abayisirayiri ne batta abaserikale abʼebigere Abasuuli emitwalo kkumi mu lunaku lumu.

³⁰Abalala ne baddukira mu kibuga Afeki, era eyo bbugwe wʼekibuga ekyo gye yagwira ku bantu emitwalo musanvu ku baali bawonyeewo.

³⁰Benikadadi naye nadduka ne yeekweka mu kibuga mu kimu ku bisenge ebyʼomunda.

³¹Abakungu be ne bamugamba nti, “Laba, tuwulidde nti bakabaka bʼennyumba ya Isirayiri, ba kisa, twesibe ebibukutu mu biwato byaffe, tuzingirire emige ku mitwe gyaffe tugende ewa kabaka wa Isirayiri, oboolyawo anaakusaasira.”

³²Ne beesiba ebibukutu mu biwato byabwe, ne bazingirira emige ku mitwe gyabwe, ne balaga ewa kabaka wa Isirayiri, ne bamugamba nti, “Omuddu wo Benikadadi agamba nti, ‘Nkwegayiridde tonzita.’ ” Kabaka nʼababuuza nti, “Akyali mulamu? Oyo muganda wange.”

³³Abasajja ne balowooza nti ako kabonero kalungi, era ne banguwa okwogera nti, “Weewaawo, muganda wo Benikadadi.” Kabaka nʼayogera nti, “Mugende mumuleete.” Benikadadi bwe yavaayo, Akabu nʼamuleetera mu gaali lye.

³⁴Awo Benikadadi nʼagamba nti, “Ndikuddiza ebibuga kitange bye yawamba ku kitaawo, era olyessizaawo obutale obubwo ggwe mu Ddamasiko, nga kitange bwe yakola mu Samaliya.” Akabu nʼaddamu nti, “Nzija kukuleka ogende nga tukoze endagaano.” Era ne bakola endagaano, nʼamuleka nʼagenda.

³⁵Omu ku batabani ba bannabbi nʼagamba munne nti, “Katonda alagidde onfumite nʼekyokulwanyisa kyo,” naye munne oyo nʼagaana.

³⁶Mutabani wa nnabbi nʼayogera nti, “Olwʼobutagondera ddoboozi lya Mukama, bwʼonooba wakava wano, empologoma eneekutta.” Awo bwe baali kyebajje baawukane, nʼasanga empologoma era nʼemutta.

³⁷Mutabani wa nnabbi nʼasanga omusajja omulala, nʼamugamba nti, “Nfumita, nkwegayiridde.” Omusajja nʼamufumita nʼamuleetako ekiwundu.

³⁸Awo nʼagenda nʼalindirira kabaka mu kkubo, ne yeebuzaabuza ngʼabisse ekiremba kye ku maaso ge.

³⁹Kabaka bwe yali ngʼayitawo, mutabani wa nnabbi nʼamukoowoola ngʼagamba nti, “Omuddu wo yagenze wakati mu lutalo, ne wabaawo omuserikale eyandetedde omusibe nʼaŋŋamba nti, ‘Kuuma omusajja ono. Bwʼanaabula ggwʼonottibwa mu kifo kye, oba si kyo oteekwa okusasula kilo amakumi asatu mu nnya eza ffeeza.’

⁴⁰Omuddu wo bwe yali ngʼatawaana erudda nʼerudda, laba omusajja nʼabula.”

⁴⁰Kabaka wa Isirayiri nʼamuddamu nti, “Ogwo musango gwo, era ogwesalidde.”

⁴¹Awo mutabani wa nnabbi nʼayanguwa, okuggya ekiremba ku maaso ge, kabaka wa Isirayiri nʼamutegeera nga yʼomu ku bannabbi.

⁴²Nʼagamba kabaka nti, “Bwʼati bwʼayogera Mukama nti, ‘Otadde omusajja gwe namaliridde okutta. Noolwekyo ggwʼojja okufa mu kifo kye, nʼabantu bo bafe mu kifo kyʼabantu be.’ ”

⁴³Kabaka wa Isirayiri nʼalaga mu lubiri lwe e Samaliya ngʼaswakidde era nga munyiivu.