1 Bassekabaka 22:1-53 LGCB2014 - Bible AI

¹Ne wataba ntalo wakati wa Busuuli ne Isirayiri okumala emyaka esatu.

²Naye mu mwaka ogwokusatu Yekosafaati kabaka wa Yuda nʼaserengeta okugenda okukyalira kabaka wa Isirayiri.

³Kabaka wa Isirayiri yali agambye abaami be nti, “Mumanyi nti Lamosugireyaadi kyaffe, naye ate nga tetulina kye tukola wo okukiggya ku kabaka wa Busuuli?”

⁴Mu kiseera ekyo nʼabuuza Yekosafaati nti, “Onoogenda nange mu lutalo e Lamosugireyaadi?” Yekosafaati nʼaddamu kabaka wa Isirayiri nti, “Nze ndi nga bwʼoli abantu bange ngʼabantu bo, nʼembalaasi zange ngʼezizo.”

⁵Naye Yekosafaati nʼayongerako nti, “Sooka weebuuze ku Mukama.”

⁶Awo kabaka wa Isirayiri nʼakuŋŋaanya bannabbi awamu nga bawera ngʼebikumi bina, nʼababuuza nti, “Ŋŋende ntabaale e Lamosugireyaadi oba ndekeyo?” Ne baddamu nti, “Genda kubanga Mukama alikigabula mu mukono gwa kabaka.”

⁷Naye Yekosafaati nʼabuuza nti, “Wano tewaliwo nnabbi wa Mukama gwe tuyinza kwebuuzaako?”

⁸Kabaka wa Isirayiri nʼaddamu Yekosafaati nti, “Wakyaliyo omusajja omu gwe tuyinza okwebuuzaako eri Mukama erinnya lye ye Mikaaya[38] mutabani wa Imula naye namukyawa kubanga tewali kirungi kyʼalagula ku nze, wabula ebibi.”

⁹Awo kabaka wa Isirayiri nʼalagira omu ku baami be nti, “Yanguwa mangu okuleeta Mikaaya mutabani wa Imula.”

¹⁰Awo Kabaka wa Isirayiri ne Yekosafaati kabaka wa Yuda nga bambadde ebyambalo byabwe ebyʼobwakabaka era nga batudde ku ntebe zaabwe ezʼobwakabaka mu mulyango ogwa wankaaki we kibuga Samaliya, nga ne bannabbi bonna balagulira awo we baali;

¹¹Zeddekiya mutabani wa Kenaana yali yeekoledde amayembe agʼebyuma, nʼayogera nti, “Bwʼati bwʼayogera Mukama nti, ‘Olisindikiriza Abasuuli ne gano okutuusa lwe balisaanyizibwawo.’ ”

¹²Bannabbi abalala bonna nabo baalagula kye kimu, nga boogera nti, “Yambuka olumbe Lamosugireyaadi obe muwanguzi kubanga Mukama ajja kukigabula mu mukono gwa kabaka.”

¹³Omubaka eyatumibwa okuleeta Mikaaya nʼamugamba nti, “Laba ebigambo bya bannabbi abalala biragula buwanguzi eri kabaka, kale ekigambo kyo nakyo kikkiriziganye nabyo, oyogere bulungi.”

¹⁴Naye Mikaaya nʼayogera nti, “Nga Mukama bwʼali omulamu, nzija kwogera ekyo kyokka Mukama kyʼanaŋŋamba.”

¹⁵Bwe yatuuka awali kabaka, kabaka nʼamubuuza nti, “Mikaaya tulumbe Lamosugireyaadi, nantiki tulekeyo?” Nʼamuddamu nti, “Kirumbe obe muwanguzi kubanga Mukama anakigabula mu mukono gwa kabaka.”

¹⁶Kabaka nʼamubuuza nti, “Nnaakulayiza emirundi emeka okutegeeza amazima mu linnya lya Mukama?”

¹⁷Nnabbi nʼaddamu nti, “Nalaba Isirayiri yenna ngʼesaasaanye ku nsozi, ngʼendiga ezitalina musumba.” Mukama nʼayogera nti, “Bano tebalina mukama waabwe, era buli omu ku bbo addeyo ewuwe mirembe.”

¹⁸Awo kabaka wa Isirayiri nʼagamba Yekosafaati nti, “Saakugambye nti, talina kirungi kyʼandagulako wabula ekibi?”

¹⁹Mikaaya nʼayogera nti, “Noolwekyo wulira ekigambo kya Mukama nti Nalaba Mukama ngʼatudde ku ntebe ye eyʼobwakabaka nga nʼeggye lyonna eryʼomu ggulu liyimiridde ku mukono gwe ogwa ddyo ne mukono gwe ogwa kkono.

²⁰Mukama nʼayogera nti, ‘Ani anaasendasenda Akabu ayambuke okulumba Lamosugireyaadi afiire eyo?’ Omu ku bo nʼaddamu bulala, nʼomulala nʼaddamu bulala.

²¹Ku nkomerero ne wavaayo omwoyo ne guyimirira mu maaso ga Mukama ne gwogera nti, ‘Nze nnaamusendasenda.’

²²“Mukama nʼabuuza nti, ‘Mu ngeri ki?’ Omwoyo ne guddamu nti, ‘Nzija kugenda nfuuke omwoyo ogwʼobulimba mu mimwa gya bannabbi be bonna.’ Mukama nʼaddamu nti, ‘Ojja kusobola okumusendasenda, genda okole bwʼotyo.’

²³“Kale nno, Mukama atadde omwoyo omulimba mu mimwa gya buli nnabbi wo era Mukama amaliridde okukusaanyaawo.”

²⁴Awo Zeddekiya mutabani wa Kenaana nʼasembera nʼakuba Mikaaya oluyi ku ttama, nʼayogera nti, “Omwoyo wa Mukama yampiseeko atya okwogera nawe?”

²⁵Awo Mikaaya nʼaddamu nti, “Laba, ekyo onokimanya ku lunaku lwʼoligenda okwekweka mu kisenge ekyʼomunda.”

²⁶Awo kabaka wa Isirayiri nʼalagira nti, “Mukwate Mikaaya, mumuzzeeyo ewa Amoni omukulu wʼekibuga, nʼeri Yowaasi mutabani wa kabaka,

²⁷era mwogere nti, ‘Bwʼati bwʼayogera kabaka nti: muteeke omuntu ono mu kkomera, ate temumuwa ekintu kyonna okuggyako omugaati nʼamazzi okutuusa lwe ndikomawo emirembe.’ ”

²⁸Mikaaya nʼalangirira nti, “Bwʼolikomawo emirembe, Mukama nga tayogeredde mu nze.” Era nʼayongerako nti, “Mugenderere ebigambo byange, mmwe abantu mwenna.”

²⁹Awo kabaka wa Isirayiri ne Yekosafaati kabaka wa Yuda ne bambuka e Lamosugireyaadi.

³⁰Kabaka wa Isirayiri nʼagamba Yekosafaati nti, “Nzija kugenda mu lutalo nga nneefudde omuntu omulala, naye ggwe oyambale ebyambalo ebyʼobwakabaka.” Awo kabaka wa Isirayiri ne yeefuula omuntu omulala nʼagenda mu lutalo.

³¹Kabaka wʼe Busuuli yali alagidde abaduumizi bʼamagaali nti “Temulwanagana na muntu yenna, kabe mutono oba mukulu, wabula kabaka wa Isirayiri yekka.”

³²Awo abaduumizi bʼamagaali bwe baalaba Yekosafaati, ne balowooza nti, “Ddala ono ye kabaka wa Isirayiri.” Ne batanula okumulumba, naye Yekosafaati nʼaleekaanira waggulu,

³³abaduumizi bʼamagaali ne bategeera nti si ye kabaka wa Isirayiri ne balekeraawo okumugoba.

³⁴Awo omuntu omu nʼamala galasa akasaale ke, ne kakwata kabaka wa Isirayiri ebyambalo bye ebyʼebyuma we bigattira, nʼagamba omugoba wʼeggaali lye nti, “Kyusa eggaali onzigye mu lutalo, kubanga nfumitiddwa.”

³⁵Olutalo ne lweyongerera ddala nnyo ku lunaku olwo, era kabaka ne bamukwatirira mu gaali lye nga litunuulaganye nʼAbasuuli. Omusaayi okuva mu kiwundu kye ne gukulukuta nnyo mu gaali, nʼoluvannyuma nʼafa.

³⁶Enjuba bwe yali ngʼeneetera okugwa, ne waba ekirango ekyabuna mu ggye nti, “Buli muntu adde mu kibuga kyʼewaabwe, era buli muntu adde mu nsi yʼewaabwe!”

³⁷Awo kabaka nʼafa nʼaleetebwa e Samaliya, era nʼaziikibwa eyo.

³⁸Ne booleza eggaali lye awaali ekidiba kya Samaliya, bamalaaya we baanaabiranga, embwa ne zikomba omusaayi gwe, ngʼekigambo kya Mukama bwe kyayogerwa.

³⁹Ebyafaayo ebirala ebyʼomulembe gwa Akabu, nʼebyo bye yakola, nʼolubiri lwe yazimba nʼalulongoosa nʼamasanga, nʼebibuga bye yazimbako bbugwe, tebyawandiikibwa mu kitabo ekyʼebyomumirembe gya bassekabaka ba Isirayiri?

⁴⁰Awo Akabu ne yeebakira wamu ne bajjajjaabe, Akaziya mutabani we nʼamusikira.

⁴¹Awo Yekosafaati mutabani wa Asa nʼatandika okufuga mu Yuda mu mwaka ogwʼamakumi ana ogwa Akabu kabaka wa Isirayiri.

⁴²Yekosafaati yalina emyaka egyʼobukulu amakumi asatu mu etaano we yatandikira okufuga, era nʼafugira mu Yerusaalemi okumala emyaka amakumi abiri mu etaano. Nnyina erinnya lye ye yali Azuba muwala wa Siruki.

⁴³Nʼatambulira mu ngeri za kitaawe Asa era nʼatazivaamu, ngʼakola ebirungi mu maaso ga Mukama, newaakubadde nga teyaggyawo bifo bigulumivu, abantu ne beeyongeranga okuweerayo ssaddaaka nʼokwokya obubaane.

⁴⁴Yekosafaati nʼatabagana ne kabaka wa Isirayiri.

⁴⁵Ebyafaayo ebirala ebyʼomulembe gwa Yekosafaati, ebintu bye yakola, nʼamaanyi ge mu ntalo, tebyawandiikibwa mu kitabo ekyʼebyomumirembe gya bassekabaka ba Yuda?

⁴⁶Nʼaggyirawo ddala abaalyanga ebisiyaga abaali basigaddewo mu nsi, oluvannyuma lwʼomulembe gwa kitaawe Asa.

⁴⁷Awo mu biro ebyo ne wataba kabaka mu Edomu, omusigire wa kabaka nʼafuga.

⁴⁸Yekosafaati yali azimbye ekibinja ekyʼebyombo okugenda e Ofiri okukimangayo zaabu, naye ne bitasobola, kubanga byonna byabbira e Eziyonigeba.

⁴⁹Mu kiseera ekyo Akaziya mutabani wa Akabu yali agambye Yekosafaati nti, “Abasajja bange ka baseeyeeye nʼababo,” naye Yekosafaati nʼatakyagala.

⁵⁰Awo Yekosafaati ne yeebakira wamu ne bajjajjaabe era nʼaziikibwa mu kibuga kya Dawudi jjajjaawe, Yekolaamu mutabani we nʼamusikira.

⁵¹Awo Akaziya mutabani wa Akabu nʼalya obwakabaka kabaka bwa Isirayiri mu Samaliya mu mwaka ogwʼekkumi nʼomusanvu ogwa Yekosafaati kabaka wa Yuda, era nʼafuga Isirayiri okumala emyaka ebiri.

⁵²Nʼakola ebibi mu maaso ga Mukama, ne yeeyisa nga kitaawe bwe yeeyisanga, era nga ne nnyina bwe yakolanga, ate era nga Yerobowaamu mutabani wa Nebati, eyaleetera Isirayiri okwonoona bwe yakolanga.

⁵³Yaweereza era nʼasinza Baali, nʼasunguwaza Mukama Katonda wa Isirayiri, mu ngeri zonna nga kitaawe bwe yakola.