1 Bassekabaka 3:1-28 LGCB2014 - Bible AI

¹Awo Sulemaani nʼakola endagaano ne Falaawo, ye kabaka wʼe Misiri era nʼawasa muwala we. Nʼamuleeta mu kibuga kya Dawudi okutuusa lwe yamala okuzimba ennyumba ye nʼennyumba ya Mukama, era ne bbugwe okwetooloola Yerusaalemi.

²Kyokka ennyumba ya Mukama yali tenazimbibwa, abantu nga baweerayo ssaddaaka mu bifo ebyʼenjawulo.

³Sulemaani nʼayagala Mukama, ngʼatambulira mu mateeka ga Dawudi kitaawe, newaakubadde nga yaweerangayo ssaddaaka era ngʼayotereza nʼobubaane ku bifo ebigulumivu.

⁴Awo kabaka nʼagenda e Gibyoni okuweerayo ssaddaaka, kubanga ekyo kye kyali ekifo ekikulu mu byonna, era Sulemaani nʼaweerayo ku kyoto ekyo ssaddaaka ezookebwa lukumi.

⁵Mukama nʼalabikira Sulemaani ekiro mu kirooto e Gibyoni, Katonda nʼamugamba nti, “Saba kyʼoyagala kyonna kye mba nkuwa.”

⁶Sulemaani nʼaddamu nti, “Olaze ekisa kingi eri omuddu wo, Dawudi kitange, kubanga yali mwesigwa gyʼoli, era mutuukirivu ate nga mwesimbu gyʼoli. Era oyongedde okulaga ekisa kino ekingi gyʼali nʼomuwa omwana okutuula ku ntebe ye eyʼobwakabaka leero.

⁷Kaakano, Ayi Mukama Katonda wange, ofudde omuddu wo okuba kabaka mu kifo kya Dawudi kitange. Naye ndi mwana muto[10] era simanyi ngeri ya kuddukanyaamu mirimu gyange.

⁸Omuddu wo ali wakati mu bantu bo be walonda, eggwanga ekkulu, eritabalika.

⁹Kale omuddu wo muwe amagezi okufuganga abantu bo, njawulenga ekirungi nʼekibi: kubanga ani ayinza okufuga eggwanga lyo lino ekkulu?”

¹⁰Mukama nʼasanyuka kubanga Sulemaani yasaba ekyo.

¹¹Katonda nʼamugamba nti, “Kubanga osabye kino, so teweesabidde kuwangaala wadde bugagga, oba okufa kwa balabe bo, naye weesabidde amagezi okwawulanga emisango,

¹²nʼakola kyʼosabye. Nzija kukuwa omutima omugezi era omutegeevu, so tewalibeerawo eyali akwenkanye oba alikwenkana.

¹³Era ndikuwa, ne byʼotosabye: obugagga nʼekitiibwa waleme kubeerawo kabaka akwenkana mu kiseera kyo.

¹⁴Era bwʼonootambuliranga mu makubo gange, nʼokukwatanga amateeka gange nʼebiragiro byange, nga kitaawo Dawudi bwe yakola, ndyongera ku nnaku zo.”

¹⁵Awo Sulemaani nʼazuukuka nʼamanya nga kibadde kirooto.

¹⁵Nʼakomawo e Yerusaalemi, nʼayimirira mu maaso gʼessanduuko eyʼendagaano ya Mukama nʼawaayo ebiweebwayo ebyokebwa nʼebiweebwayo olwʼemirembe, era nʼagabula abaweereza be ekijjulo.

¹⁶Awo abakazi bamalaaya babiri ne bajja eri kabaka, ne bayimirira mu maaso ge.

¹⁷Omu ku bo nʼamugamba nti, “Mukama wange, omukazi ono nange tubeera mu nnyumba emu, era nazaala omwana nga naye waali.

¹⁸Bwe waayitawo ennaku ssatu, naye nʼazaala omwana we. Twali ffekka, so tewaali muntu nʼomu eyali naffe mu nnyumba.

¹⁹“Awo mu kiro omukazi ono, ne yeebakira omwana we nʼamutta.

²⁰Nʼagolokoka ekiro mu ttumbi nʼaggya omwana wange mu mbiriizi zange, nze omuweereza wo nga neebase, nʼamuteeka mu kifuba kye, ate nʼaddira owuwe afudde nʼamussa mu kifuba kyange.

²¹Awo bwe nagolokoka enkya okuyoonsa omwana wange, nga mufu. Naye bwe nʼamwekaliriza amaaso, ne ndaba nga si ye mwana gwe nazaala.”

²²Omukazi oli omulala nʼagamba nti, “Nedda! Omulamu ye mwana wange, omufu ye wuwo.” Naye owʼolubereberye nʼaggumiza nti, “Nedda! Omufu ye wuwo, omulamu ye wange.” Ne bawakanira mu maaso ga kabaka.

²³Kabaka nʼagamba nti, “Omu agamba nti, ‘Omwana wange ye mulamu, owuwo ye mufu,’ nʼomulala agamba nti, ‘Omwana wange ye mulamu, owuwo ye mufu,’ ”

²⁴Awo kabaka nʼagamba nti, “Mundeetere ekitala.” Ne baleetera kabaka ekitala.

²⁵Nʼalyoka alagira nti, “Musaleemu omwana omulamu, muwe omu ekitundu nʼomulala ekitundu ekirala.”

²⁶Nnyina wʼomwana omulamu nʼajjula ennaku olwʼomwana we, nʼagamba kabaka nti, “Nkwegayiridde mukama wange, omwana omulamu mumuwe! Tomutta!” Naye omukazi oli nʼagamba nti, “Tajja kuba wange oba wuwo. Mumusalemu!”

²⁷Awo kabaka nʼasalawo ngʼagamba nti, “Omwana omulamu mumuwe omukazi owʼolubereberye, so temumutta, kubanga oyo ye nnyina.”

²⁸Isirayiri yonna bwe yawulira okusalawo kwa kabaka, ne beewuunya kabaka, kubanga baalaba ngʼalina amagezi okuva eri Katonda okulamula ensonga.