1 Bassekabaka 9:1-28 LGCB2014 - Bible AI

¹Awo Sulemaani bwe yamala okuzimba yeekaalu ya Mukama nʼolubiri lwe, nʼokuzimba ebyo byonna bye yasiima,

²Mukama nʼamulabikira omulundi ogwokubiri, nga bwe yamulabikira e Gibyoni.

³Mukama nʼamugamba nti,

³“Mpulidde okusaba nʼokwegayirira kwʼowaddeyo gye ndi; ntukuzizza yeekaalu eno gyʼozimbye, nʼerinnya lyange, emirembe gyonna. Amaaso gange nʼomutima gwange binaabeeranga omwo.

⁴Naawe bwʼonootambuliranga mu maaso gange nʼomutima ogwʼamazima nʼobugolokofu, nga Dawudi kitaawo bwe yakola, era nʼokolanga bye nkulagira byonna, nʼokwatanga amateeka gange,

⁵nnaanyweza entebe yo eyʼobwakabaka mu Isirayiri emirembe gyonna, nga bwe nasuubiza Dawudi kitaawo bwe nʼayogera nti, ‘Tolirema kuba na musajja owʼomu lulyo lwo anaatuulanga ku ntebe eyʼobwakabaka bwa Isirayiri.’

⁶Naye ggwe oba batabani bo bwe munanjeemeranga ne mutakwatanga biragiro byange nʼamateeka ge mbawadde, ne mutanula okuweereza bakatonda abalala,

⁷kale ndiggya ku Isirayiri ensi gye mbawadde era ne yeekaalu gye ntukuzizza nʼerinnya lyange ndigireka. Olwo Isirayiri erifuuka ekyʼokunyoomoolwa nʼekyokusekererwa mu mawanga gonna.

⁸Newaakubadde nga yeekaalu eno eyatiikirira kaakano, buli anaayitangawo aneewunyanga nʼaŋŋoola ngʼagamba nti, ‘Kiki ekireetedde Mukama okukola ekintu bwe kiti ku nsi eno ne ku yeekaalu eno?’

⁹Abantu baliddamu nti, ‘Kubanga baava ku Mukama Katonda waabwe, eyaggya bajjajjaabwe mu Misiri, ne basembeza bakatonda abalala, nʼokubasinza ne babasinza era nʼokubaweereza ne babaweereza. Mukama kyavudde ababonereza mu ngeri eyo.’ ”

¹⁰Ku nkomerero yʼemyaka amakumi abiri, mu kiseera Sulemaani mwe yazimbira ebizimbe byombi, eyeekaalu ya Mukama, nʼolubiri lwe olwʼobwakabaka,

¹¹Kabaka Sulemaani yagabira Kiramu kabaka wʼe Ttuulo ebibuga amakumi abiri, olwʼemivule, nʼemiberosi ne zaabu bye yaweereza Sulemaani.

¹²Naye Kiramu bwe yava e Ttuulo nʼagenda okulambula ebibuga Sulemaani bye yamugabira, ne bitamusanyusa.

¹³Nʼamubuuza nti, “Bino bibuga bya ngeri ki byʼompadde muganda wange?” Nʼabituuma erinnya Kabuli, era bwe biyitibwa nʼokutuusa olunaku lwa leero.

¹⁴Kiramu yali aweerezza kabaka ttani nnya eza zaabu.

¹⁵Kabaka Sulemaani mu buyinza bwe nʼamaanyi ge, yakuŋŋaanya abasajja abʼamaanyi bangi okuzimba yeekaalu ya Mukama, nʼolubiri lwe, nʼobusenge obuwagika bbugwe wa Yerusaalemi, nʼebibuga ebya Kazoli, ne Megiddo ne Gezeri.

¹⁶Falaawo, ye kabaka wʼe Misiri yali atabadde, nʼokuwamba nʼawamba Gezeri, nʼakireka ngʼakikumyeko omuliro, ngʼasse Abakanani abaakibeerangamu. Ekifo ekyo nʼakigabira muwala we, muka Sulemaani ngʼekirabo ku mbaga yaabwe.

¹⁷Awo Sulemaani nʼakizimba buggya; nʼazimba ne Besukolooni ekya wansi,

¹⁸Baalasi ne Tamali mu ddungu,

¹⁹nʼebibuga ebyʼamawanika, nʼomwakuumirwanga amagaali, nʼabeebagala embalaasi ze, ne byonna bye yayagala okuzimba mu Yerusaalemi, ne mu Lebanooni ne mu bitundu byonna bye yafuganga.

²⁰Abantu bonna abaasigalawo ku Bamoli, nʼAbakiiti, nʼAbaperezi, nʼAbakiivi nʼAbayebusi, abataali Bayisirayiri,

²¹Abayisirayiri be bataayinza kuzikiririza ddala, Sulemaani nʼabafuula baddu, nʼokutuusa leero.

²²Naye teyafuula Muyisirayiri nʼomu muddu, wabula bo baali nga balwanyi be, na bakungu be, na baami be, na baduumizi bʼamagaali na beebagazi ba mbalaasi ze.

²³Era be baali nga abakungu abaavunaanyizibwanga emirimu gye gyonna, era abo bonna abaavunaanyizibwanga emirimu egyo, awamu nga bawera abakungu ebikumi bitaano mu ataano.

²⁴Awo muwala wa Falaawo bwe yava mu kibuga kya Dawudi nʼagenda mu lubiri Sulemaani lwe yamuzimbira, Sulemaani nʼazimba obusenge obuwagika bbugwe.

²⁵Sulemaani yawangayo ebiweebwayo ebyokebwa nʼebiweebwayo ebyʼemirembe ku kyoto kye yazimbira Mukama, emirundi esatu[24] mu mwaka, ngʼayotereza obubaane mu maaso ga Mukama, ngʼatuukiriza obulombolombo bwa yeekaalu.

²⁶Kabaka Sulemaani yazimba nʼebyombo mu Eziyonigeba[25] okuliraana Erosi mu Edomu, ku lubalama lwʼennyanja Emyufu.

²⁷Kiramu nʼaweereza abasajja be abalunnyanja okukoleranga awamu nʼaba Sulemaani.

²⁸Ne baseeyeeya okutuuka mu Ofiri[26], ne baleeta ttani kkumi na nnya eza zaabu eri Sulemaani.