1 Ebyomumirembe 14:1-17 LGCB2014 - Bible AI

¹Kabaka Kiramu owʼe Ttuulo nʼatuma ababaka ne batwala emivule, ne bagenda nʼabazimbi bʼamayinja, nʼababazzi eri Dawudi okumuzimbira olubiri.

²ⓗ Awo Dawudi nʼategeera nga Mukama amunywezezza okuba kabaka wa Isirayiri, era nga nʼobwakabaka bwe bwagulumizibwa nnyo olwʼabantu ba Mukama Isirayiri.

³Dawudi ne yeeyongera okuwasa abakazi abalala mu Yerusaalemi, ne bamuzaalira abaana abalala bangi aboobulenzi nʼaboobuwala.

⁴Amannya gʼabaana abaamuzaalirwa ge gaano: Sammuwa, ne Sobabu, ne Nasani, ne Sulemaani,

⁵ⓘ ne Ibukali, ne Eriswa, ne Erupereti,

⁶ne Noga, ne Nefegi, ne Yafiya,

⁷ne Erisaama, ne Beeriyadda, ne Erifereti.

⁸ⓙ Awo Abafirisuuti bwe baawulira nti Dawudi yafukibwako amafuta okuba kabaka wa Isirayiri yenna, ne bambuka okugenda okumunoonya, naye Dawudi nʼakiwulirako era nʼagenda okubatabaala.

⁹Abafirisuuti baali bazze nga bazinze ekiwonvu Lefayimu;

¹⁰ⓚ Dawudi ne yeebuuza ku Mukama nti, “Ŋŋende ntabaale Abafirisuuti? Onoobagabula mu mukono gwange?” Mukama nʼamuddamu nti, “Genda, kubanga nnaabagabula mu mukono gwo.”

¹¹Awo Dawudi nʼayambuka ne basajja be e Baaluperazimu, nʼatabaala Abafirisuuti nʼabawangula. Nʼayogera nti, “Katonda awangudde abalabe bange nʼomukono gwe, ngʼamazzi bwe gawaguza.” Era ekifo ekyo kye kyava kituumibwa Baaluperazimu.

¹²Abafirisuuti baali balese awo balubaale baabwe be beekolera, Dawudi nʼalagira okwokya balubaale abo.

¹³Abafirisuuti ne badda, ne bazinda ekiwonvu.

¹⁴Awo Dawudi nʼaddamu ne yeebuuza ku Mukama, Mukama nʼamuddamu nti, “Tobatabaalirawo, naye beetooloole, obalumbe ngʼobafuluma mu maaso gʼemitugunda.

¹⁵Awo bwʼonoowulira eddoboozi eryʼokukumba waggulu mu mitugunda, onootabaala, kubanga ekyo kinaategeeza nti Katonda akukulembedde okuzikiriza eggye lyʼAbafirisuuti.”

¹⁶ⓛ Dawudi nʼakola nga Mukama bwe yamulagira, ne bazikiriza eggye lyʼAbafirisuuti, okuva e Gibyoni okutuuka e Gezeri.

¹⁷ⓜ Awo ettutumo lya Dawudi ne libuna ensi zonna, Mukama nʼaleetera amawanga gonna okutya Dawudi.