1 Ebyomumirembe 15:1-29 LGCB2014 - Bible AI

¹Dawudi bwe yamala okwezimbira embiri ze mu kibuga kya Dawudi, nʼategekera essanduuko ya Katonda ekifo, nʼagikubira eweema.

²ⓝ Awo Dawudi nʼayogera nti, “Tewali muntu yenna akkirizibwa kusitula essanduuko ya Katonda wabula Abaleevi, kubanga Mukama be yalonda okugisitula, era nʼokumuweerezanga ennaku zonna.”

³Dawudi nʼakuŋŋaanya Abayisirayiri bonna mu Yerusaalemi, okulinnyisa essanduuko ya Mukama mu kifo kyayo kye yali agitegekedde.

⁴Nʼayita abazzukulu ba Alooni nʼAbaleevi;

⁵Ku bazzukulu ba Kokasi, Uliyeri omukulembeze ne baganda be kikumi mu abiri;

⁶ku bazzukulu ba Merali,

⁶Asaya omukulembeze ne baganda be bibiri mu abiri;

⁷ku bazzukulu ba Gerusomu,

⁷Yoweeri omukulembeze ne baganda be kikumi mu asatu;

⁸Ku bazzukulu ba Erizafani,

⁸Semaaya omukulembeze ne baganda be ebikumi bibiri,

⁹ku bazzukulu ba Kebbulooni,

⁹Eryeri omukulembeze ne baganda be kinaana;

¹⁰ku bazzukulu ba Wuziyeeri,

¹⁰Amminadaabu omukulembeze ne baganda be kikumi mu kkumi na babiri.

¹¹Awo Dawudi nʼatumya Zadooki ne Abiyasaali bakabona, ne Uliyeri, ne Asaya, ne Yoweeri, ne Semaaya, ne Eryeri ne Amminadaabu Abaleevi,

¹²nʼabagamba nti, “Mmwe bakulembeze mu nnyumba zʼAbaleevi, era mmwe ne baganda bammwe mujja kwetukuza, mulyoke mwambuse essanduuko ya Mukama Katonda wa Isirayiri, okugiteeka mu kifo kye ngitegekedde.

¹³Kubanga mmwe temwagisitula omulundi ogwasooka Mukama Katonda waffe kyeyava atusunguwalira, olwʼobutamwebuuzaako okutegeera nga bwe kyalagibwa.”

¹⁴Awo bakabona nʼAbaleevi ne beetukuza okulinnyisa essanduuko ya Mukama, Katonda wa Isirayiri.

¹⁵Abaleevi ne basitulira essanduuko ya Mukama ku bibegabega byabwe nʼemisituliro gyako, nga Musa bwe yalagira, ngʼekigambo kya Mukama bwe kyali.

¹⁶Awo Dawudi nʼalagira abakulembeze bʼAbaleevi okulonda baganda baabwe okuba abayimbi, nga bayimba ennyimba ezʼessanyu, nga bakuba ebivuga: entongooli, nʼennanga, nʼebitaasa.

¹⁷Abaleevi ne balonda Kemani mutabani wa Yoweeri, ku baganda be ne balonda Asafu mutabani wa Berekiya, ne ku batabani ba Merali, baganda baabwe, ne balonda Esani mutabani wa Kusaya;

¹⁸ne baganda baabwe abaabaddiriranga nga be ba Zekkaliya, ne Yaaziyeri, ne Semiramosi, ne Yekyeri, ne Unni, ne Eriyaabu, ne Benaaya, ne Maaseya, ne Mattisiya, ne Erifereku, ne Mikuneya, nʼabaggazi Obededomu ne Yeyeeri,

¹⁹ne Kemani, ne Asafu, ne Esani abayimbi abaalina okukuba ebitaasa ebyʼebikomo;

²⁰ne Zekkaliya, ne Aziyeri, ne Semiramosi, ne Yekyeri, ne Unni, ne Eriyaabu, ne Maaseya ne Benaya baali baakukuba entongooli ezʼekyalamosi;

²¹naye Mattisiya, ne Erifereku, ne Mikuneya, ne Obededomu, ne Yeyeeri, ne Azaziya baali baakukulemberamu nga bakuba ennanga ezʼekiseminisi.

²²Kenaniya omukulembeze wʼAbaleevi mu byʼokuyimba, avunaanyizibwe ebyʼokuyimba kubanga yali mukugu mu byo.

²³Berekiya ne Erukaana be baali abaggazi bʼomulyango gwʼekifo essanduuko mwʼebeera.

²⁴Sebaniya, ne Yosafaati, ne Nesaneri, ne Amasayi, ne Zekkaliya, ne Benaya, ne Eryeza be bakabona abaafuuwanga amakondeere mu maaso gʼessanduuko ya Katonda. Obededomu ne Yekiya nʼabo baali baggazi bʼomulyango gwʼekifo essanduuko mwʼebeera.

²⁵Awo Dawudi nʼabakadde aba Isirayiri, nʼabaduumizi bʼenkumi ne bagenda okwambusa essanduuko eyʼendagaano ya Mukama okugiggya mu nnyumba ya Obededomu nga basanyuka.

²⁶Olwʼokubeera Katonda kwe yabeera Abaleevi abaali basitudde essanduuko eyʼendagaano ya Mukama, baawaayo sseddume zʼente musanvu ne zʼendiga musanvu nga ssaddaaka.

²⁷ⓞ Dawudi yali ayambadde olugoye olwa linena, ngʼAbaleevi bonna abaali basitudde essanduuko, era ngʼabayimbi ne Kenaniya eyali avunaanyizibwa okuyimba. Dawudi yali ayambadde nʼekkanzu eya linena.

²⁸Awo Isirayiri yenna ne bambusa essanduuko eyʼendagaano ya Mukama nga baleekaana nʼamaloboozi agʼessanyu, nʼeddoboozi eryʼeŋŋombe, eryʼamakondeere, nʼebitaasa, era nga bakuba nnyo entongooli nʼennanga.

²⁹ⓟ Awo essanduuko eyʼendagaano ya Mukama bwe yali ngʼeyingizibwa mu kibuga kya Dawudi, Makali muwala wa Sawulo nʼalingiza mu ddirisa, nʼalaba Kabaka Dawudi ngʼazina era ngʼajjaguza, nʼamunyooma mu mutima gwe.