1 Ebyomumirembe 16:1-43 LGCB2014 - Bible AI

¹Awo ne baleeta essanduuko ya Mukama, ne bagiyingiza mu weema Dawudi gye yali agisimbidde, ne bawaayo ebiweebwayo ebyokebwa nʼebiweebwayo olwʼemirembe eri Katonda.

²ⓠ Awo Dawudi bwe yamala okuwaayo ebiweebwayo ebyokebwa nʼebiweebwayo olwʼemirembe, nʼasabira abantu omukisa mu linnya lya Mukama,

³era nʼagabira buli Muyisirayiri omusajja nʼomukazi, omugaati nʼekitole ekyʼezabbibu enkalu, nʼekiyungula kyʼennyama.

⁴Yalonda abamu ku Baleevi okuweerezanga mu maaso gʼessanduuko ya Mukama, okukoowoola nga basaba, nga beebaza, era nga batendereza Mukama, Katonda wa Isirayiri.

⁵Asafu ye yali omukulu waabwe, Zekkaliya nʼamuddirira, Yeyeeri nʼaddako, nʼoluvannyuma Semiramosi, ne Yekyeri, ne Mattisiya, ne Eriyaabu, ne Benaya, ne Obededomu, ne Yeyeeri, abookukuba entongooli nʼennanga, Asafu ye ngʼakuba ebitaasa.

⁶Benaya ne Yakaziyeeri bakabona be baafuuwanga amakondeere bulijjo mu maaso gʼessanduuko eyʼendagaano ya Katonda.

⁷Awo ku lunaku olwo, Dawudi nʼalagira Asafu nʼabantu be yakolanga nabo, basooke okwebaza Mukama nga bagamba nti:

⁸Mwebaze Mukama, mukoowoole erinnya lye, mumanyise ebikolwa bye mu mawanga.

⁹Mumuyimbire, muyimbe okumutendereza mwogere ku byamagero bye byonna.

¹⁰Erinnya lye ligulumizibwe, nʼemitima gyʼabo abanoonya Mukama gisanyuke.

¹¹Mutunuulire Mukama nʼamaanyi ge; munoonye amaaso ge ennaku zonna.

¹²Mujjukire ebyewuunyo byʼakoze, nʼebyamagero bye, nʼensala ye eyʼemisango gyʼalangirira,

¹³Mmwe zadde lya Isirayiri omuweereza we, mmwe abazzukulu ba Yakobo, era abalonde be.

¹³

¹⁴Ye Mukama Katonda waffe; okusalawo kwe okwʼemisango kubuna ensi yonna.

¹⁵ⓡ Ajjukira endagaano ye emirembe gyonna, nʼekigambo kye yalagira, okutuusa ku mirembe olukumi,

¹⁶gye yalagaana ne Ibulayimu, era nʼagirayiza Isaaka.

¹⁷Nʼaginyweza ngʼetteeka eri Yakobo, nʼeri Isirayiri ngʼendagaano eyʼolubeerera,

¹⁸ngʼagamba nti, “Ndikuwa ensi ya Kanani, ngʼomugabo, ogwʼobusika bwo.”

¹⁸

¹⁹Omuwendo gwabwe bwe gwali omutono, era omutono ddala, nga batambuze mu yo,

²⁰ⓢ baatambulatambulanga okuva mu nsi emu okudda mu ndala, nʼokuva mu bwakabaka obumu okudda mu bantu abalala.

²¹Teyaganya muntu nʼomu kubanyigiriza; weewaawo, yanenya bakabaka ku lwabwe:

²²ngʼagamba nti, “Temukwatanga ku abo be nnafukako amafuta, so bannabbi bange temubakolanga akabi.”

²²

²³Muyimbire Mukama, mmwe ensi zonna; mulangirire obulokozi bwe buli lunaku.

²⁴Mubuulire ekitiibwa kye mu mawanga, nʼebikolwa bye ebyamagero mu bantu bonna.

²⁵Mukama mukulu era asaanira okutenderezebwa; era atiibwenga okusinga bakatonda abalala bonna.

²⁶Bakatonda bonna abamawanga bifaananyi, naye Mukama ye yakola eggulu.

²⁷Ekitiibwa nʼobukulu biri mu maaso ge, amaanyi nʼessanyu biri wamu naye.

²⁸Muyimuse Mukama, mmwe ebika ebyʼamawanga, muyimusize Mukama ekitiibwa nʼamaanyi,

²⁹Muyimusize Mukama ekitiibwa ekigwanira erinnya lye; muleete ekiweebwayo, mujje mu maaso ge; musinze Mukama mu kitiibwa kyʼobutukuvu bwe.

³⁰Mukankane mu maaso ge ensi yonna, weewaawo ensi nywevu, teyinza kusesetulwa.

³¹Eggulu lisanyuke, nʼensi ejaguze; boogere mu mawanga nti, “Mukama afuga!

³²Ennyanja ewuume, nʼebigirimu byonna, nʼennimiro zijaguze, nʼokujjula kwazo!

³³Awo emiti egyʼomu kibira ginaayimba, ginaayimbira Mukama nʼessanyu, kubanga akomawo okusalira ensi omusango.”

³³

³⁴“Weebaze Mukama kubanga mulungi; era okwagala kwe kubeerera emirembe gyonna.

³⁵Mwogerere waggulu nti, ‘Tulokole, Ayi Katonda owʼobulokozi bwaffe; tukuŋŋaanye, otulokole eri amawanga, twebaze erinnya lyo ettukuvu, era tujagulize mu ttendo lyo.

³⁶Mukama yeebazibwe, Katonda wa Isirayiri owʼemirembe nʼemirembe.’ ”

³⁶Abantu bonna ne baddamu nti, “Amiina, Mukama yeebazibwe.”

³⁷Awo Dawudi nʼaleka Asafu nʼababeezi be, okuweereza Mukama mu maaso gʼessanduuko eyʼendagaano ya Mukama, nga bwe kyagwaniranga buli lunaku.

³⁸Obededomu nʼababeezi be enkaaga mu omunaana nabo yabaleka baweereze eyo. Obededomu mutabani wa Yedusuni, era ne Kosa be baali abaggazi.

³⁹Dawudi yaleka Zadooki, kabona ne bakabona banne mu maaso gʼeweema ya Mukama mu kifo ekigulumivu e Gibyoni

⁴⁰okuwangayo ebiweebwayo ebyokebwa eri Mukama ku kyoto ekyʼebiweebwayo ebyokebwa, buli nkya na buli kawungeezi, nga byonna bwe byawandiikibwa mu mateeka ga Mukama, ge yawa Isirayiri.

⁴¹Kemani ne Yedusuni nʼabalala abaalondebwa ne bayitibwa amannya gaabwe okwebaza Mukama, “kubanga okwagala kwe kubeerera emirembe gyonna,” baali wamu nabo.

⁴²Era Kemani ne Yedusuni baavunaanyizibwanga okufuuwa amakondeere, nʼokukuba ebitaasa, nʼokukubira ebivuga ebirala ku luyimba lwa Katonda. Batabani ba Yedusuni baabeeranga ku wankaaki.

⁴³Awo abantu bonna ne baddayo ewaabwe, ne Dawudi nʼaddayo okusabira ennyumba ye omukisa.