1 Ebyomumirembe 18:1-17 LGCB2014 - Bible AI

¹Awo oluvannyuma lwʼebyo, Dawudi nʼawangula Abafirisuuti, era nʼawamba ne Gaasi nʼebyalo ebyali bikyetoolodde okuva mu mukono gwʼAbafirisuuti.

²Dawudi nʼawangula nʼAbamowaabu, ne bafuuka baddu be, ne bamuwanga obusuulu.

³Ate era Dawudi yalwanagana ne Kadalezeri kabaka wʼe Zoba okutuukira ddala e Kamasi, bwe yali ngʼanyweza okufuga kwe ku nsalo eyʼOmugga Fulaati.

⁴Dawudi nʼamuwambako amagaali lukumi, nʼabeebagala embalaasi abasajja kasanvu, nʼabasajja abeebigere emitwalo ebiri. Embalaasi endala zonna ezʼamagaali nʼazitema enteega, ne yeerekerawo kikumi.

⁵Awo Abasuuli abʼe Ddamasiko bwe bajja okudduukirira Kadalezeri kabaka wʼe Zoba, Dawudi nʼabattamu abantu emitwalo ebiri mu enkumi bbiri.

⁶Nʼateeka olusiisira lwʼeggye lye mu Busuuli e Ddamasiko, era Abasuuli baafuuka baweereza be, ne bamutonera ebirabo. Mukama nʼawa Dawudi obuwanguzi buli gye yatabaalanga.

⁷Dawudi nʼatwala engabo eza zaabu abaserikale ba Kadalezeri ze baasitulanga, nʼazireeta e Yerusaalemi.

⁸ⓦ Mu Tibukasi ne mu Kuni, ebibuga ebyali ebya Kadadezeri nʼaggyayo ebikomo bingi nnyo, era ebyo Sulemaani bye yakolamu ennyanja eyʼekikomo, nʼempagi, nʼebintu ebyʼebikomo ebirala.

⁹Awo kabaka Toowu owʼe Kamasi bwe yawulira nga Dawudi awangudde eggye lyonna erya Kadadezeri, kabaka wʼe Zoba

¹⁰nʼatuma mutabani we Kadolaamu eri kabaka Dawudi okumulamusaako nʼokumuyozaayoza okuwangula olutalo wakati we ne Kadadezeri, kubanga Kadadezeri yalwananga ne Toowu. Kadolaamu yaleeta zaabu, nʼeffeeza, nʼebikomo, nga bya ngeri za ngyawulo.

¹¹Ebintu byonna ebyaleetebwa, kabaka Dawudi yabiwonga eri Mukama, nga bwe yakola effeeza ne zaabu gye yawamba ku mawanga amalala nga Edomu ne Mowaabu, nʼAbamoni, nʼAbafirisuuti, ne Amaleki.

¹²Ye Abisaayi mutabani wa Zeruyiya yattira abasajja ba Edomu omutwalo gumu mu kanaana mu Kiwonvu ekyʼOmunnyo.

¹³Era yateeka olusiisira lwa baserikale mu Edomu, era aba Edomu bonna ne bafuuka baweereza ba Dawudi. Mukama nʼawa Dawudi obuwanguzi mu bifo byonna gye yatabaalanga.

¹⁴Dawudi nʼafuga Isirayiri yenna, mu bwenkanya ne mu butuukirivu abantu be bonna.

¹⁵Yowaabu mutabani wa Seruyiya ye yali omuduumizi wʼeggye; Yekosafaati mutabani wa Akirudi nga ye mujjukiza;

¹⁶ⓧ Zadooki mutabani wa Akitubu ne Abimereki mutabani wa Abiyasaali be baali bakabona; Savusa ye yali muwandiisi;

¹⁷Benaya mutabani wa Yekoyaada ye yakuliranga Abakeresi nʼAbaperesi; ate batabani ba Dawudi baali bakungu bakulu ddala era nga babeera ku lusegere lwa kabaka.