1 Ebyomumirembe 20:1-8 LGCB2014 - Bible AI

¹ⓨ Awo mu biro, bakabaka mwe bagenderanga okulwana, Yowaabu nʼakulembera eggye, nʼazisa ensi yʼabaana ba Amoni, ate era nʼazingiza Labba. Naye Dawudi ye nʼasigala mu Yerusaalemi, Yowaabu ye nʼalumba Labba, nʼakizikiriza.

²Awo Dawudi nʼaddira engule eyali eya kabaka waabwe, obuzito bwayo kilo asatu mu nnya eza zaabu, nga mu yo baateekamu amayinja agʼomuwendo, nʼagitikka ku mutwe. Nʼatwala nʼomunyago mungi ddala okuva mu kibuga ekyo.

³Yatwala abantu abaali mu kibuga ekyo nʼabawa emirimu nga bakozesa nʼemisumeeno, nʼensuuluulu, nʼembazzi. Bwʼatyo Dawudi bwe yakola ebibuga byonna ebyʼabaana ba Amoni, oluvannyuma ye nʼeggye lye lyonna ne baddayo e Yerusaalemi.

⁴Awo olwatuuka oluvannyuma lwʼebyo ne wabalukawo entalo nʼAbafirisuuti e Gezeri. Mu kiseera ekyo Sibbekayi Omukusasi nʼatta Sippayi omu ku bazzukulu bʼagasajja aganene ddala, era ne bawangula Abafirisuuti.

⁵ⓩ Mu lutalo olulala nʼAbafirisuuti, Erukanani mutabani wa Yayiri nʼatta Lakani muganda wa Goliyaasi Omugitti, eyalina effumu ngʼomuti ogulukirwako engoye.

⁶Mu lutalo olulala olwali e Gaasi, waaliwo omusajja omuwanvu ennyo eyali omu ku bazzukulu bʼagasajja aganene, ngʼalina engalo mukaaga ku buli mukono, nʼobugere mukaaga ku buli kigere.

⁷ⓐ Yasoomooza nnyo Isirayiri, era Yonasaani mutabani wa Simeeya, muganda wa Dawudi nʼamutta.

⁸Abo bonna baali bazzukulu ba lisajja Laafa owʼe Gaasi, era bonna ne bagwa mu mikono gya Dawudi nʼabasajja be.