1 Ebyomumirembe 21:1-30 LGCB2014 - Bible AI

¹ⓑ Awo Setaani nʼatandika okulwana ne Isirayiri, Dawudi nʼasendebwasendebwa okubala Abayisirayiri.

²Dawudi nʼalagira Yowaabu, nʼabaduumizi bʼeggye nti, “Mugende mubale Abayisirayiri okuva e Beeruseba okutuuka e Ddaani, mukomewo, muntegeeze bwe beenkana.”

³Naye Yowaabu nʼamuddamu nti, “Mukama ayongere ku bantu be, nʼokusingawo emirundi kikumi. Mukama wange kabaka, bonna si baweereza ba mukama wange, kale kiki ekimukoza kino? Lwaki aleetera Isirayiri emitawaana?”

⁴Naye ekigambo kya kabaka ne kisinga ebya Yowaabu, era Yowaabu nʼagenda nʼabuna Isirayiri yonna, nʼakomawo e Yerusaalemi.

⁵Yowaabu nʼategeeza Dawudi omuwendo gwʼabasajja abalwanyi. Mu Isirayiri mwalimu abasajja abalwanyi akakadde kamu nʼemitwalo kkumi, ngʼokwo kwʼotadde emitwalo amakumi ana mu emitwalo musanvu abaali mu Yuda.

⁶Naye teyabalirako Baleevi nʼAbabenyamini, kubanga ekiragiro kya kabaka tekyasanyusa Yowaabu.

⁷Ekikolwa ekyo kyʼokubala abantu, kyali kya kivve mu maaso ga Katonda era nʼabonereza Isirayiri.

⁸ⓒ Awo Dawudi nʼagamba Katonda nti, “Nnyonoonye nnyo olwʼekikolwa ekyo. Kaakano, nkusaba ogyewo obutali butuukirivu obwʼomuddu wo, kubanga nkoze ekintu ekyʼobusirusiru ennyo.”

⁹Mukama Katonda nʼayogera ne nnabbi Gaadi eyaluŋŋamyanga Dawudi nti,

¹⁰“Genda otegeeze Dawudi nti, ‘Bwʼati bwʼayogera Mukama nti: nkuteekeddewo ebyʼokulondako bisatu, weerobozeeko ekimu kye nnaakukola.’ ”

¹¹Awo Gaadi nʼagenda eri Dawudi nʼamugamba nti, “Bwʼati bwʼayogera Mukama nti, ‘Weerobozeeko ku bisatu:

¹²ⓓ emyaka esatu egyʼenjala, oba emyezi esatu egyʼokumalibwawo abalabe bo, oba ennaku ssatu ezʼekitala kya Mukama Katonda, kawumpuli agwe mu nsi, ne malayika wa Mukama azikirize abantu mu bitundu byonna ebya Isirayiri.’ Kale nno, ssalawo kye mbanziramu oyo antumye.”

¹³ⓔ Dawudi nʼaddamu Gaadi nti, “Nsobeddwa nnyo. Wakiri ka ngwe mu mukono gwa Mukama Katonda, kubanga okusaasira kwe kungi, okusinga okugwa mu mukono gwʼomuntu.”

¹⁴Awo Mukama Katonda nʼaweereza kawumpuli ku Isirayiri, abantu emitwalo musanvu ne bafa.

¹⁵Ate era Katonda nʼatuma malayika okuzikiriza Yerusaalemi. Naye Mukama bwe yalaba ebyo byonna, nʼalumwa nnyo olwʼebyo byonna, nʼalagira malayika eyali azikiriza abantu nti, “Ekyo kimala! Zzaayo omukono gwo.” Mu kiseera ekyo malayika wa Mukama Katonda yali ayimiridde kumpi ne gguuliro lya Olunaani Omuyebusi.

¹⁶Dawudi nʼayimusa amaaso ge, nʼalaba malayika wa Mukama Katonda ngʼayimiridde wakati wʼensi nʼeggulu ngʼasowodde ekitala mu mukono gwe, nga kigoloddwa ku Yerusaalemi. Awo Dawudi nʼabakadde, nga bambadde ebibukutu ne bavuunama amaaso gaabwe.

¹⁷ⓕ Dawudi nʼagamba Katonda nti, “Si nze nalagira abantu babalibwe? Nze nnyonoonye, era nkoze ebibi. Bano ndiga, kiki kye bakoze? Ayi Mukama Katonda wange, ombonereze nze ne nnyumba yange, naye toganya kawumpuli ono kusigala ku bantu bo.”

¹⁸Awo malayika wa Mukama Katonda nʼalagira Gaadi okugamba Dawudi ayambuke, azimbire Mukama ekyoto ku gguuliro lya Olunaani Omuyebusi.

¹⁹Awo Dawudi nʼagondera ekigambo Gaadi kye yayogera mu linnya lya Mukama Katonda, nʼayambuka.

²⁰Laba Olunaani bwe yali ngʼawuula eŋŋaano, nʼakyuka nʼalaba malayika wa Mukama, ne batabani be abana abaaliwo ne beekweka.

²¹Awo Dawudi bwe yasembera okumpi ne Olunaani we yali, Olunaani nʼamulaba, nʼava mu gguuliro, nʼamuvuunamira.

²²Dawudi nʼamugamba nti, “Mpa ekifo egguuliro lyo mwe liri, nzimbire Mukama ekyoto, nange nʼasasula omuwendo gwakyo gwonna, kawumpuli ave ku bantu.”

²³Olunaani nʼaddamu Dawudi nti, “Kitwale! Mukama wange kabaka akole nga bwʼasiima. Laba, nzija kukuwa ziseddume zʼonoowaayo ngʼebiweebwayo ebyokebwa, nʼebintu ebiwuula ngʼenku, nʼeŋŋaano okuba ekiweebwayo ekyʼobutta. Ebyo byonna nzija kubikuwa.”

²⁴Naye Dawudi nʼagamba Olunaani nti, “Nedda, maliridde okusasula omuwendo omujjuvu. Sijja kutwalira Mukama ekikyo, wadde okuwaayo ekiweebwayo ekyokebwa bye sisasulidde.”

²⁵Awo Dawudi nʼagula ekifo kya Olunaani kilo musanvu eza zaabu.

²⁶ⓖ Dawudi nʼazimbira Mukama ekyoto mu kifo ekyo, era nʼawaayo ebiweebwayo ebyokebwa nʼebiweebwayo olwʼemirembe, ngʼakoowoola Mukama, era Mukama nʼamuddamu nʼomuliro okuva mu ggulu ogwaka ku kyoto ekyʼebiweebwayo ebyokebwa.

²⁷Awo Mukama Katonda nʼalagira malayika okuzaayo ekitala kye mu kiraato kyakyo.

²⁸Okuva mu kiseera ekyo, Mukama bwe yaddamu Dawudi ku gguuliro lya Olunaani Omuyebusi, Dawudi nʼaweerangayo ssaddaaka eyo.

²⁹Mu biro ebyo Eweema ya Mukama, Musa gye yali azimbidde mu ddungu, nʼekyoto ekyʼebiweebwayo ebyokebwa byali mu kifo ekigulumivu e Gibyoni.

³⁰Naye Dawudi yali tasobola kugendayo kwebuuza ku Katonda, kubanga yali atya ekitala kya malayika wa Mukama Katonda.