1 Ebyomumirembe 22:1-19 LGCB2014 - Bible AI

¹ⓗ Awo Dawudi nʼayogera nti, “Wano we wanaabeeranga ennyumba ya Mukama Katonda, nʼekyoto ekyʼebiweebwayo ebyokebwa ku lwa Isirayiri.”

²Dawudi nʼalagira okukuŋŋaanya bannaggwanga abaali mu Isirayiri, era mu bo nʼalondamu abatemi bʼamayinja, bagabajje nga kuzimbisa nnyumba ya Mukama.

³Yateekawo ebyuma bingi olwʼokukola emisumaali egyʼenzigi egya wankaaki, nʼolwebigatta, nʼebikomo bingi ebyayinga obungi nʼobuzito.

⁴Yawaayo nʼemivule egitabalika, Abazidoni nʼAbatuulo gye baamuleetera,

⁵Dawudi nʼayogera nti, “Sulemaani mutabani wange akyali mwana muto nʼobumanyirivu bwe butono. Ennyumba egenda okuzimbirwa Mukama egwana okuba eyʼekitiibwa ekinene ennyo, ngʼeyatiikirira era ngʼetenderezebwa mu mawanga gonna. Noolwekyo nzija kuteekateeka ebinaagizimba.” Era Dawudi yakola entegeka nnene ddala nga tannaba kufa.

⁶Awo nʼayita Sulemaani mutabani we nʼamukuutira okuzimbira Mukama Katonda wa Isirayiri ennyumba.

⁷ⓘ Dawudi nʼagamba Sulemaani nti, “Mwana wange, kyali mu mutima gwange okuzimba ennyumba ku lwa Mukama Katonda wange.

⁸Naye ekigambo kya Mukama ne kinzijira nga kigamba nti, ‘Oyiye omusaayi mungi, era olwanye entalo nnyingi. Tolizimbira linnya lyange nnyumba, kubanga oyiye omusaayi mungi mu maaso gange.

⁹ⓙ Laba, omwana owoobulenzi alizaalibwa gyʼoli, era aliba omusajja owʼemirembe, ne muwa emirembe eri abalabe bonna enjuuyi zonna. Aliyitibwa Sulemaani. Ndiwa Isirayiri emirembe nʼobutebenkevu ku mulembe gwe.

¹⁰Oyo ye alizimba ennyumba ku lwʼerinnya lyange. Aliba mutabani wange, nange ndiba kitaawe. Era ndinyweza entebe ye eyʼobwakabaka bwe mu Isirayiri emirembe gyonna.’ ”

¹¹“Kaakano, mwana wange, Mukama abeere naawe, era olabe omukisa, ozimbire Mukama Katonda wo ennyumba, nga bwe yayogera.

¹²Mukama akuwe amagezi agʼokwawula nʼokutegeera ngʼokulembera Isirayiri, olyoke okuumenga amateeka ga Mukama Katonda wo.

¹³ⓚ Olwo onoolaba omukisa bwʼoneekuumanga ebiragiro nʼamateeka Mukama ge yawa Musa ku lwa Isirayiri. Beera nʼamaanyi era gguma omwoyo, totya so totekemuka.”

¹⁴“Mu kutegana okungi ntegekedde yeekaalu ya Mukama ttani eza zaabu enkumi ssatu mu bina mu ataano, ne ttani eza ffeeza emitwalo esatu mu enkumi nnya mu bitaano; nʼebikomo nʼebyuma bingi nnyo ebitapimika muwendo gwabyo, nʼembaawo nʼamayinja. Ate okyayinza nʼokwongerako.

¹⁵Olina abakozi bangi; abatemi bʼamayinja, nʼabazimbi, nʼababazzi, nʼabantu bonna abalina obumanyirivu mu kuweesa

¹⁶zaabu ne ffeeza, nʼebikomo, nʼekyuma. Kaakano tandikirawo okukola era Mukama akuluŋŋamye.”

¹⁷Awo Dawudi nʼalagira abakulembeze bonna aba Isirayiri okuyamba mutabani we Sulemaani ngʼagamba nti,

¹⁸“Mukama Katonda wammwe tali wamu nammwe? Era tabawadde okuwummula nʼemirembe ku njuyi zonna? Agabudde ababeera mu nsi mu mukono gwange, era ensi ekkakkanye eri Mukama nʼeri abantu be.

¹⁹Kaakano mumalirire mu mitima gyammwe ne mu mmeeme zammwe okunoonya Mukama Katonda wammwe. Mutandike okuzimba awatukuvu wa Mukama, nʼoluvannyuma muleete essanduuko eyʼendagaano ya Mukama, nʼebintu ebitukuvu ebya Katonda mu yeekaalu eneezimbibwa ku lwʼerinnya lya Mukama.”