1 Ebyomumirembe 29:1-30 LGCB2014 - Bible AI

¹Awo Kabaka Dawudi nʼayogera eri ekibiina kyonna ekyali kikuŋŋaanye nti, “Sulemaani mutabani wange, Katonda gwʼalonze, mwana muto atalina bumanyirivu, ate nga omulimu munene. Ekizimbe kino si kya ku lwa muntu wabula kya ku lwa Mukama Katonda.

²ⓩ Ntegese olwa yeekaalu ya Katonda wange, zaabu olwʼomulimu gwa zaabu, ne ffeeza olwʼomulimu gwa ffeeza, nʼebikomo olwʼomulimu ogwʼebikomo, nʼebyuma olwʼomulimu ogwʼebyuma, nʼembaawo olwʼomulimu ogwʼembaawo, amayinja aga onuku mangi nʼamayinja agʼokutona, amayinja agʼomulimu ogwʼenjola nʼagʼamabala mangi, nʼamayinja agʼomuwendo omungi agʼengeri zonna, nʼamayinja amanyirivu mangi nnyo.

³Okwongera kwʼebyo byonna, nʼokwewaayo kwange olwa yeekaalu ya Katonda wange, mpaddeyo amawanika gange aga zaabu ne ffeeza ku lwa yeekaalu ya Katonda wange;

⁴ttani kikumi mu kkumi eza zaabu eya Ofiri, ne ttani bibiri mu nkaaga eza ffeeza omulongoosemu okugibissa ku bisenge byʼekizimbe,

⁵nʼolwʼomulimu ogwa zaabu nʼogwa ffeeza, nʼomulimu gwonna ogunaakolebwa abafundi. Kale ani aneewaayo okwewonga leero eri Mukama?”

⁶Awo emitwe gyʼennyumba, nʼabataka bʼebika bya Isirayiri, nʼabaduumizi abʼolukumi nʼabʼekikumi, nʼabakungu abaavunaanyizibwanga emirimu gya kabaka, ne beewaayo awatali kuwalirizibwa.

⁷Ne bawaayo zaabu ttani kikumi mu kyenda ne kilo kinaana mu nnya, ne ffeeza ttani bisatu mu nsanvu mu ttaano, nʼebikomo ttani lukaaga mu nsanvu mu ttaano, nʼebyuma ttani enkumi ssatu mu lusanvu mu ataano, olwʼomulimu gwa yeekaalu ya Katonda.

⁸Abo abaalina amayinja agʼomuwendo, baagawaayo eri eggwanika lya yeekaalu ya Mukama, eyakuumibwanga Yekyeri Omugerusoni.

⁹Abantu ne basanyukira nnyo okwewaayo abakulembeze baabwe kwe beewaayo, kubanga baawaayo nʼomutima ogutuukiridde eri Mukama. Ne kabaka Dawudi nʼasanyuka nnyo nnyini.

¹⁰Awo Dawudi nʼatendereza Mukama mu lujjudde lwʼabantu bonna, nʼayogera nti, “Weebazibwe, Ayi Mukama Katonda, Katonda wa jjajjaffe Isirayiri, emirembe nʼemirembe.

¹¹ⓐ Obukulu, nʼamaanyi, nʼekitiibwa, nʼobuwanguzi, nʼokugulumizibwa bibyo, Ayi Mukama Katonda, kubanga byonna ebiri mu ggulu ne mu nsi bibyo. Obwakabaka bubwo, Ayi Mukama Katonda, era ogulumizibwa okuba omukulu wa byonna.

¹²ⓑ Obugagga nʼekitiibwa biva gyʼoli, era ggwe ofuga ebintu byonna; omukono gwo gwʼamaanyi era gwa buyinza era gugulumiza ne guwa amaanyi bonna.

¹³Kale nno, Katonda waffe, tukwebaza era tutendereza erinnya lyo eryʼekitiibwa.

¹⁴“Naye nze ani nʼabantu bange kye ki, ffe okusobola okuwaayo bwe tutyo nga ffe tweyagalidde? Byonna biva gyʼoli, era tukuwadde ku bibyo.

¹⁵ⓒ Ffe tuli bagenyi era abatambuze mu maaso go, nga bajjajjaffe bonna bwe baali, nʼennaku zaffe ezʼoku nsi ziri ngʼekisiikirize, awatali ssuubi.

¹⁶Era Ayi Mukama Katonda waffe, ebintu bino byonna bye tuwaddeyo olwʼokuzimba eyeekaalu ku lwʼerinnya lyo, biva gyʼoli, era byonna bibyo.

¹⁷ⓓ Katonda wange, mmanyi nti okebera emitima, era osanyukira obwʼesimbu, nʼebintu bino byonna mbiwaddeyo awatali kuwalirizibwa, era nʼomutima omwesimbu. Era kaakano ndabye abantu bo nga bakuwa nʼessanyu nʼomwoyo gumu.

¹⁸Ayi Mukama, Katonda wa bajjajjaffe Ibulayimu, Isaaka, ne Isirayiri, okuume omuliro ogwo mu mitima gyʼabantu bo emirembe gyonna, era emitima gyabwe ginywerere ku gwe.

¹⁹Owe Sulemaani mutabani wange omutima ogumaliridde okukumanga ebiragiro byo, empya zo, nʼamateeka go, era omuwe amaanyi okuzimba ekizimbe kye ntegese.”

²⁰Awo Dawudi nʼagamba ekibiina kyonna nti, “Mukama Katonda wammwe atenderezebwe.” Ekibiina kyonna ne kitendereza Mukama, Katonda wa bajjajjaabwe nga bakutamye emitwe gyabwe, nga bwe bagwa ne ku ttaka mu maaso ga Mukama ne kabaka.

²¹Ku lunaku olwaddirira ne bawaayo ssaddaaka nʼebiweebwayo ebyokebwa eri Mukama, ngʼomwo mwe muli seddume lukumi, nʼendiga ennume lukumi, nʼobwana bwʼendiga obulume lukumi, era nʼebiweebwayo ebyʼokunywa ne ssaddaaka endala ku lwa Isirayiri yenna.

²²Ne baliira era ne banywera mu maaso ga Mukama nga bajjudde essanyu lingi ku lunaku olwo.

²²Awo Sulemaani mutabani wa Dawudi nʼakakasibwa nga kabaka omulundi ogwokubiri, era nʼafukibwako amafuta mu maaso ga Mukama okuba omukulembeze ne Zadooki okuba kabona.

²³Awo Sulemaani nʼatuula ku ntebe eyʼobwakabaka eya Mukama nga ye kabaka mu kifo kya Dawudi kitaawe, era nʼalaba omukisa ne Isirayiri yenna ne mugondera.

²⁴ⓔ Abakungu bonna nʼabasajja abazira bonna, ne batabani ba kabaka Dawudi bonna ne bawera eri kabaka Sulemaani.

²⁵Mukama nʼagulumiza nnyo Sulemaani mu maaso ga Isirayiri yenna, era nʼaweebwa ekitiibwa ekyʼobwakabaka ekyali kitaweebwanga kabaka mulala yenna mu Isirayiri.

²⁶Dawudi mutabani wa Yese yali kabaka wa Isirayiri yenna.

²⁷ⓕ Yafugira Isirayiri okumala emyaka amakumi ana, nga musanvu yagifugira e Kebbulooni, nʼemirala amakumi asatu nʼagifugira mu Yerusaalemi.

²⁸Nʼafa ngʼakaddiye nnyo, ngʼajjudde essanyu olwʼemyaka gye yamala ku nsi, mu bugagga ne mu kitiibwa, era Sulemaani mutabani we nʼamusikira.

²⁹Era ebyafaayo ebyomumirembe gya kabaka Dawudi okuviira ddala ku ntandikwa okutuukira ddala ku nkomerero, byawandiikibwa mu bitabo ebyomumirembe bya nnabbi Samwiri ne mu bitabo ebyomumirembe ebya Gaadi omulabirizi,

³⁰era nʼebyʼokufuga kwe, nʼobuyinza bwe, nʼebyo byonna ebyamutuukako, ne ku Isirayiri, ne ku bwakabaka obulala obwali bumwetoolodde, byonna byawandiikibwa omwo.