1 Peetero 1:1-25 LGCB2014 - Bible AI

¹Nze Peetero omutume wa Yesu Kristo, mpandiikira abalonde ba Katonda, abaasaasaanira mu Ponto, ne mu Ggalatiya ne mu Kapadokiya, ne mu Asiya ne mu Bisuniya,

²Katonda Kitaffe be yasooka okumanya ne batukuzibwa Omwoyo olwʼokugondere Yesu Kristo, era ne balongoosebwa nʼomusaayi ggwe, ogwabamansirwako.

²Ekisa nʼemirembe byeyongerenga mu mmwe.

³Katonda Kitaawe wa Mukama waffe Yesu Kristo atenderezebwe. Olwʼokusaasira kwe okungi twazaalibwa mu bulamu obulina essuubi omulundi ogwokubiri, olwʼokuzuukira kwa Yesu Kristo mu bafu.

⁴Bwʼatyo nʼatusuubiza omugabo mu busika, ogwʼolubeerera ogutakyusa langi era ogutafuma, gwʼatuterekedde mu ggulu.

⁵Era Katonda, mu buyinza bwe, alibakuuma olwʼokukkiriza kwammwe, nʼabatuusa mu bulokozi obwateekebwateekebwa okubikkulirwa mu biro ebyʼenkomerero.

⁶Ekyo, kijja kubasanyusa nnyo newaakubadde nga mujja kusanga ebizibu bya ngeri nnyingi okumala akaseera.

⁷Kubanga okugezesebwa kwʼokukkiriza kwammwe, kwa muwendo mungi nnyo okusinga zaabu egezebwa mu muliro nʼekakasibwa, kulyoke kusaanire ettendo nʼekitiibwa nʼokugulumizibwa ku lunaku luli Mukama waffe Yesu Kristo lwʼalirabikirako.

⁸Newaakubadde nga Yesu oyo temumulabangako, kyokka mumwagala, era ne kaakano temumulaba naye mumukkiriza ne mujjula essanyu eritayogerekeka ne mumugulumiza,

⁹era ekiva mu kukkiriza kwammwe kwe kulokolebwa kwʼemyoyo gyammwe.

¹⁰Bannabbi baafuba nga bwe baasobola okuvumbula era nʼokutegeera okulokolebwa kuno, ne bategeeza ebyʼomu maaso ku kisa kya Katonda kyʼagenda okubawa.

¹¹Omwoyo wa Kristo ngʼali mu bo, yategeeza ebyʼomu maaso ku kubonaabona kwa Kristo era nʼekitiibwa ekiriddirira, ne bafuba okuvumbula omuntu gwe kirituukako nʼekiseera we kirituukira.

¹²Bannabbi bano Katonda yabalaga nti Ebyo tebabikola ku lwabwe, wabula ku lwammwe. Era kaakano Enjiri ebuuliddwa gye tuli ffenna. Yatubuulirwa mu maanyi ga Mwoyo Mutukuvu eyava mu ggulu. Bino byʼebintu ne bamalayika bye bayaayaanira okutegeera.

¹³Noolwekyo mwetegeke nga muli bateefu, nga mutadde emitima gyammwe ku kisa kya Katonda ekiribaweebwa, Yesu Kristo bwʼalirabika.

¹⁴Mugonderenga Katonda, kubanga muli baana be, muleme kufugibwa okwegomba kwammwe okubi okwʼedda, kwe mwatambulirangamu mu butamanya.

¹⁵Kale, nga Katonda eyabayita bwʼali omutukuvu, nammwe mubeerenga batukuvu mu byonna bye mukola.

¹⁶Nga bwe kyawandiikibwa nti, ⓐ “Mubenga batukuvu, kubanga nze ndi mutukuvu.”

¹⁷Mujjukire nti Kitammwe gwe musaba, asalira omusango buli muntu awatali kusaliriza, musaana mumusseemu ekitiibwa, nga mwetwala ngʼabagenyi ku nsi kuno.

¹⁸Kubanga mumanyi nti Mwanunulibwa mu mpisa zammwe embi ezaava ku bajjajjammwe. Temwanunulibwa na bintu ebiggwaawo nga ffeeza oba zaabu.

¹⁹Wabula mwanunulibwa nʼomusaayi gwa Kristo ogwʼomuwendo omungi ennyo, ogwʼomwana gwʼendiga ogutaliiko kamogo oba ebbala.

²⁰Kristo yategekebwa dda nga nʼensi tennatondebwa, kyokka mu nnaku zino ezaakayita nʼalabisibwa ku lwammwe.

²¹Mu ye, mwe mwayita okukkiriza Katonda eyamuzuukiza mu bafu, nʼamuwa ekitiibwa, era okukkiriza kwammwe nʼokusuubira kwammwe kyebivudde binywerera ku Katonda.

²²Kale kaakano nga bwe mumaze okutukuza emyoyo gyammwe olwʼokukkiriza amazima, ne mwagalanira ddala mu luganda lwennyini, mweyongere okwagalana nʼomutima ogutaliimu bukuusa.

²³Kubanga okusinziira mu kigambo kya Katonda ekiramu era ekyʼolubeerera, mwazaalibwa omulundi ogwokubiri.

²⁴Kubanga,

²⁴ⓑ “Abantu bonna bali ngʼomuddo, nʼekitiibwa kyabwe kiri ngʼekimuli kyʼomuddo. Omuddo gukala, ekimuli kyagwo ne kigwa.

²⁵Naye ekigambo kya Mukama Katonda kibeerera emirembe gyonna.”

²⁵Era ekigambo ekyo yʼEnjiri eyababuulirwa.