1 Peetero 2:1-25 LGCB2014 - Bible AI

¹Kale mukomye buli ngeri yonna eyʼettima, nʼobulimba bwonna, nʼobukuusa, nʼobuggya, nʼokwogera ekibi kwonna.

²Ngʼabaana abaakazaalibwa bwe beegomba amata, nammwe mwegombenga amata agʼomwoyo, muganywenga mukule era mulokolebwe,

³kubanga mwalega ku bulungi bwa Mukama.

⁴Mujje gyʼali kubanga ye lyʼejjinja eddamu, abantu lye baasuula nga balowooza nti Terigasa, kyokka eryalondebwa Katonda era eryʼomugaso omunene ennyo.

⁵Mujje gyʼali nga muli ngʼamayinja amalamu, muzimbibwemu ennyumba eyʼomwoyo. Mulyoke mube bakabona be abaweereza ssaddaaka eyʼomwoyo, esiimibwa Katonda mu Yesu Kristo Mukama waffe.

⁶Kubanga ekyawandiikibwa kigamba nti,

⁶ⓒ “Laba, nteeka mu Sayuuni, ejjinja eryʼoku nsonda eryʼomuwendo omungi eddonde, oyo eyeesiga Kristo, taliswazibwa.”

⁷Ejjinja eryo lya muwendo mungi nnyo eri mmwe abakkiriza, naye eri abatakkiriza ⓓ “Lye jjinja abazimbi lye batasaako mwoyo, lyʼeryo eryafuuka eryʼoku nsonda.”

⁸Era ⓔ “Lye jjinja abantu lye beekoonako, lwe lwazi kwe beesittala ne bagwa.” Beesittala kubanga bajeemera ekigambo kya Katonda, nga bwe kyʼateekebwateekebwa.

⁹ⓕ Naye mwe muli kika kironde, bakabona bwʼobwakabaka, eggwanga ettukuvu, abantu ba Katonda bennyini. Mwalondebwa mulyoke mutende ebirungi bya Katonda eyabaggya mu kizikiza nʼabayingiza mu butangaavu bwe obutenkanika.

¹⁰Edda temwali ggwanga, naye kaakano muli ggwanga lya Katonda, era mwali temusaasirwa, naye kaakano Katonda abasaasidde.

¹¹Abaagalwa, mutegeerere ddala nti Ku nsi kuno muli bayise. Kyenva mbeegayirira mwewale okwegomba kwʼomubiri, kubanga kulwanagana nʼomwoyo.

¹²Mukuumenga empisa zammwe ennungi, abo be mubeera nabo abatakkiriza, newaakubadde baboogerako nti Ebikolwa byammwe bibi, basobole okulaba ebirungi bye mukola, balyoke bagulumize Katonda ku lunaku lwʼalirabikirako.

¹³Ku lwa Mukama waffe, mugonderenga buli kiragiro kyʼabo abali mu buyinza, oba kabaka alina obufuzi obwʼoku ntikko,

¹⁴oba abafuzi abalala bʼatuma okubonerezanga abakola ebikolwa ebibi, era nʼokusiimanga abo abakola ebikolwa ebirungi.

¹⁵Kubanga Katonda asiima mukolenga ebirungi, mulyoke musirisenga abantu abasirusiru era abatalina kye bamanyi.

¹⁶Mubenga ba ddembe, kyokka nga temulyesigamya ku kukola bitasaana, wabula mulikozese ngʼabaweereza ba Katonda.

¹⁷Mussengamu abantu bonna ekitiibwa, mwagalenga nnyo abooluganda. Mutyenga Katonda. Mussengamu ekitiibwa abafuzi.

¹⁸Abaddu, mugonderenga bakama bammwe, nga mubassaamu ekitiibwa ekijjuvu, si abo bokka abalungi nʼabakwatampola naye nʼabo abakambwe.

¹⁹Kubanga kya mukisa omuntu bwʼabonyaabonyezebwa awatali nsonga, nʼagumiikiriza olwʼokutuukiriza ekyo Katonda kyʼayagala.

²⁰Kale kitiibwa ki kye mufuna bwe mugumiikiriza mu kubonaabona olwʼokukola ekibi? Naye Katonda abasiima bwe mugumiikiriza nga mubonyaabonyezebwa olwʼokukola obulungi.

²¹Ekyo kye mwayitirwa kubanga ne Kristo yabonyaabonyezebwa ku lwammwe, nʼabalekera ekyokulabirako kye musaana okugoberera.

²²ⓖ “Kristo teyakola kibi wadde okwogera ebyobukuusa.”

²³Bwe yavumibwa, ye teyavuma. Era abaamubonyaabonya teyabeewerera, wabula yeewaayo eri Katonda alamula awatali kusaliriza.

²⁴Yesu Kristo yennyini yeetikka ebibi byaffe mu mubiri gwe bwe yatufiirira ku musaalaba, naffe tulyoke tufe eri ekibi, tube abalamu eri obutuukirivu. Olwʼebiwundu bye, mwawonyezebwa.

²⁵Kubanga mwali muwabye ngʼendiga, naye kaakano mukomezebbwaawo eri Omusumba era alabirira obulamu bwammwe.