1 Peetero 4:1-19 LGCB2014 - Bible AI

¹Kale nga Kristo bwe yabonyaabonyezebwa mu mubiri, nammwe mumalirire okubonaabona nga ye. Kubanga abonaabona mu mubiri aba takyafugibwa kibi.

²Okuva kaakano nga muli mu nsi muno, mugoberere ebyo Katonda byʼayagala, so si kugoberera kwegomba kwammwe okwʼomubiri.

³Mu biseera ebyayita mwemaliranga mu kukola ebyo Abaamawanga bye beegombanga. Mwali mwemalidde mu bwenzi, mu kwegomba okubi, mu butamiivu, mu binyumu, mu bubaga obwʼomwenge, ne mu kusinza bakatonda abalala.

⁴Kaakano abo abatakkiriza Katonda beewuunya era babavuma bwe balaba nga temukyabeegattako mu ebyo bye bakola.

⁵Abantu abo baliwoza mu maaso ga Katonda. Kubanga yeeteeseteese okulamula abalamu nʼabafu ngʼasinziira ku ebyo bye baakola.

⁶Enjiri kyeyava ebuulirwa, nʼabafu balyoke basalirwe omusango ngʼabantu abalala bonna, kyokka babe balamu mu mwoyo nga Katonda bwʼali.

⁷Enkomerero ya byonna eneetera okutuuka. Noolwekyo mwetegeke era mwegenderezenga, era bulijjo musabenga Katonda.

⁸Nʼekisingira ddala obukulu mwagalanenga ddala mu mazima, kubanga okwagalana kubikka ebibi bingi.

⁹Musembezeganenga awatali kwemulugunya.

¹⁰Buli omu asaanidde okukozesa nʼobwesigwa buli kirabo Katonda kye yamuwa olwʼokugasa banne nabo balyoke bafune emikisa gya Katonda emingi gyʼagaba.

¹¹Ayogera, ayogerenga ngʼatumiddwa Katonda; ayamba, akikolenga nʼamaanyi gonna Katonda gʼamuwadde; mu byonna Katonda alyoke agulumizibwenga mu Yesu Kristo, alina ekitiibwa nʼobuyinza emirembe nʼemirembe. Amiina.

¹²Abaagalwa, temwewuunya obulumi obwʼamaanyi bwe bubatuukako ngʼabatuukiddwako ekintu ekitali kya bulijjo.

¹³Kyokka musanyuke kubanga mugabanye ku kubonaabona kwa Kristo, mulyoke mujjule essanyu, ngʼekitiibwa kye kirabise.

¹⁴Mulina omukisa bwe muvumibwa olwʼerinnya lya Kristo kubanga Omwoyo owʼekitiibwa owa Katonda ali ku mmwe.

¹⁵Mu mmwe temusaana kubaamu mutemu, oba mubbi, oba omukozi wʼebibi, wadde eyeeyingiza mu byʼabalala. Kubanga buli abonyaabonyezebwa olwʼebyo taliiko kyʼagasibwa.

¹⁶Naye bwʼabonyaabonyezebwa olwʼokuba Omukristaayo aleme kukwatibwa nsonyi, wabula yeebazenga Katonda olwʼokuba owa Kristo.

¹⁷Kubanga ekiseera kituuse Katonda okulamula ngʼatandikira mu nnyumba ya Katonda. Obanga okulamula kutandikidde ku ffe, kale kiriba kitya ku abo abajeemera Enjiri ya Katonda?

¹⁸ⓙ “Era obanga kizibu omutuukirivu okulokolebwa, kale aboonoonyi nʼabatatya Katonda balikolebwa batya?”

¹⁹Noolwekyo abo ababonaabona olwʼokutuukiriza ekyo Katonda kyʼayagala, basaanidde okuwaayo obulamu bwabwe eri Katonda waabwe omwesigwa, bakole obulungi.