1 Peetero 5:1-14 LGCB2014 - Bible AI

¹Noolwekyo mbulirira abakadde abali mu mmwe nze mukadde munnammwe, omujulirwa wʼokubonaabona kwa Kristo, era agabanira awamu ekitiibwa ekigenda okubikkulirwa.

²Mulundenga ekisibo kya Katonda ekiri mu mmwe, mukiriisenga nga mukirabirira nʼokwagala so si na kwemulugunya, nga mukolerera amagoba agʼobukuusa wabula olwʼokujjumbira Katonda.

³Be mukulembera temubakambuwaliranga wabula mubakulemberenga nga mubalaga ekyokulabirako ekirungi.

⁴Era Omusumba Omukulu bwʼalikomawo, muliweebwa engule eyʼekitiibwa ekitaliggwaawo.

⁵Mmwe abavubuka, mugonderenga abakulu. Muweerezeganenga mwekka na mwekka nʼobuwombeefu kubanga ⓚ “Katonda akyawa abʼamalala naye abawombeefu abawa omukisa.”

⁶Noolwekyo mwewombeeke wansi wʼomukono gwa Katonda ogwʼamaanyi, naye alibagulumiza ngʼobudde butuuse.

⁷Mumutwalirenga byonna bye mweraliikirira kubanga abalumirwa era afaayo ku buli ekibatuukako.

⁸Mutunulenga, mwekuume omulabe wammwe Setaani, atambulatambula ngʼempologoma enjala gyʼeruma egenda ngʼewuluguma ngʼenoonya gwʼeneerya.

⁹Mumwaŋŋange ngʼabalumbye, nga mwesiga Mukama, era mujjukire nti Ebibonoobono ebiri ngʼebyo bituuka ne ku bakkiriza abalala mu nsi yonna.

¹⁰Bwe mulibonaabonera akaseera, Katonda waffe atukwatirwa ekisa ngʼayita mu Kristo, alibawa ekitiibwa kye ekitaliggwaawo. Alibakomyawo, alibazzaamu amaanyi, alibawanirira era alibanyweza.

¹¹Ekitiibwa nʼamaanyi bibeerenga gyʼali emirembe nʼemirembe. Amiina.

¹²Ebbaluwa eno nzija kugikwasa Sirwano[1], gwe mmanyi nga waaluganda mwesigwa ddala, agibaleetere. Nsuubira nga mbazizzaamu amaanyi mu bbaluwa eno, era nga mbalaze engeri Katonda gyʼagabamu ekisa kye ekingi. Ebyo bye mbategeezezza bibayambe okunywerera mu kwagala kwe.

¹³Balonde bannammwe mu kkanisa yʼe Babulooni, babalamusizza. Ne mutabani wange Makko naye abalamusizza.

¹⁴Mulamusagane nʼokwagala okwʼEkikristaayo. Emirembe gibeerenga mu mmwe mwenna abali mu Kristo.