1 Samwiri 1:1-28 LGCB2014 - Bible AI

¹ⓐ Waaliwo omusajja Omwefulayimu eyabeeranga e Lamasayimuzofimu, mu nsi eyʼensozi eya Efulayimu, ngʼayitibwa Erukaana, nga mutabani wa Yerokamu, muzzukulu wa Eriku, muzzukulu wa Toku, muzzukulu wa Zufu.

²Yalina abakyala babiri, omu nga ye Kaana; nʼomulala nga ye Penina. Penina yalina abaana, naye Kaana nga mugumba.

³Buli mwaka omusajja oyo yayambukanga okuva mu kibuga kyʼewaabwe okugenda okusinza nʼokuwaayo ssaddaaka eri Mukama owʼEggye e Siiro[1]. Eyo Kofuni ne Finekaasi batabani ba Eri gye baawererezanga nga bakabona ba Mukama Katonda.

⁴Awo olunaku olwʼokuwaayo ssaddaaka bwe lwatuuka, Erukaana, nʼawa Penina ne batabani be, ne bawala be emigabo egyʼennyama.

⁵Naye Kaana nʼamuwa emigabo ebiri kubanga yamwagala nnyo, newaakubadde nga Mukama Katonda yali tamuwadde mwana.

⁶Era kubanga Mukama Katonda yali tamuwadde mwana, muggya we nʼamucoccanga.

⁷Ebyo byabangawo buli mwaka, era bwe baayambukanga okugenda mu yeekaalu ya Mukama, muggya we nʼamujoogerezanga okutuusa lwe yakaabanga, nʼokulya nʼatalya.

⁸Bba Erukaana nʼamubuuza nti, “Kaana, okaabiranga ki? Lwaki tolya? Kiki ekikweraliikiriza? Nze sikusingira abaana ekkumi?”

⁹Lwali lumu bwe baali bamaze okulya nʼokunywa e Siiro, Eri yali atudde ku ntebe okumpi nʼomulyango gwa yeekaalu[2], Kaana nʼasituka nʼagenda mu maaso ga Mukama Katonda.

¹⁰ⓑ Mu kulumwa olwʼennaku ennyingi ennyo, nʼakaaba nnyo amaziga ngʼasaba Mukama Katonda.

¹¹ⓒ Ne yeeyama ngʼagamba nti, “Ayi Mukama Ayinzabyonna, bwʼolitunuulira ennaku eyʼomuweereza wo, nʼonzijukira, nʼompa omwana owoobulenzi, ndimuwaayo eri Mukama Katonda ennaku zonna ezʼobulamu bwe nga muwonge, era enviiri ze teziimwebwengako.”

¹²Awo Kaana bwe yeeyongera okusaba ennyo eri Mukama Katonda, Eri ne yeekaliriza akamwa ke.

¹³Kaana yali asaba mu kasirise, ngʼemimwa gye ginyeenya, naye nga eddoboozi lye teriwulikika. Eri nʼalowooza nti atamidde.

¹⁴Eri kyeyava amugamba nti, “Oli komya ddi okujjanga wano ngʼotamidde? Ggyawo ettamiiro lyo.”

¹⁵ⓓ Naye Kaana nʼamuddamu nti, “Si bwe kiri mukama wange; nze ndi mukazi ajjudde ennaku. Sinnanywa ku wayini newaakubadde ekitamiiza ekirala; mbadde nkaabira Mukama Katonda mu mmeeme yange.

¹⁶Omuweereza wo tomulowooza okuba omukazi owʼekyejjo, kubanga mbadde nsindira Mukama ennaku nʼobuyinike bwange.”

¹⁷ⓔ Awo Eri nʼamuddamu nti, “Genda mirembe. Katonda wa Isirayiri akuwe ekyo kyʼomusabye.”

¹⁸ⓕ Nʼayogera nti, “Omuweereza wo alabe ekisa mu maaso go.” Oluvannyuma ne yeetambulira, nʼalya ku mmere, nʼatandika okutunula nʼessanyu.

¹⁹ⓖ Awo Erukaana nʼabʼewuwe ne bagolokoka enkeera mu makya ne basinza Mukama, nʼoluvannyuma ne baddayo ewaabwe e Laama. Ne yeetaba ne mukazi we Kaana, Mukama Katonda nʼamujjukira.

²⁰Kaana nʼaba olubuto nʼazaala omwana wabulenzi. Nʼamutuuma erinnya Samwiri, amakulu gaalyo, “Kubanga namusaba Mukama Katonda.”

²¹Awo Erukaana nʼayambuka nʼabʼennyumba ye okugenda okuwaayo ssaddaaka eri Mukama Katonda nʼokutuukiriza obweyamo bwe.

²²Naye Kaana teyagenda nabo. Nʼagamba bba nti, “Omwana bwʼaliva ku mabeere[3], ndimutwala ne mulagayo eri Mukama Katonda, era alibeera eyo ennaku ze zonna.”

²³ⓗ Erukaana nʼamuddamu nti, “Kola nga bwʼosiima. Linda okutuusa lwʼolimala okumuggya ku mabeere; Mukama Katonda atuukirize ekigambo kye.” Awo omukyala nʼasigala eka, nʼalabirira omwana okutuusa lwe yava ku mabeere.

²⁴Bwe yava ku mabeere, nʼamutwala mu yeekaalu ya Mukama Katonda e Siiro ngʼakyali muto; ne batwala ente ssatu ennume, nʼendebe eyʼobutta, nʼeccupa ya wayini.

²⁵ⓘ Bwe baamala okusala emu ku nte, ne batwala omwana eri Eri.

²⁶Kaana nʼayogera nti, “Nga bwʼoli omulamu mukama wange, nze mukyala oli eyayimirira okumpi naawe, ne nsaba Mukama Katonda.

²⁷Namusaba omwana ono, era Mukama Katonda ampadde kye namusaba.

²⁸Kaakano mmuwaayo eri Mukama, era obulamu bwe bwonna aweereddwayo eri Mukama Katonda.”

²⁸Omwana nʼasinzizanga Mukama Katonda eyo.