1 Samwiri 11:1-15 LGCB2014 - Bible AI

¹Awo olwatuuka Nakkasi Omwamoni[21] nʼayambuka nʼazingiza Yabesugireyaadi. Abasajja bonna abʼe Yabesi ne bamugamba nti, “Kola naffe endagaano, tunaakuweerezanga.”

²ⓨ Naye Nakkasi Omwamoni nʼabaddamu nti, “Sijja kukola nammwe ndagaano okuggyako nga munzikirizza okuggya mu buli muntu, eriiso lye erya ddyo, olwo nswaze Isirayiri yenna.”

³Abakulu ba Yabesi ne bamugamba nti, “Tuweeyo ebbanga lya nnaku musanvu, tusindike ababaka mu nsi yonna eya Isirayiri. Bwe wataabeewo nʼomu anajja okutubeera, kale tuneewaayo gyʼoli.”

⁴ⓩ Ababaka bwe baatuuka e Gibea ewa Sawulo, ne bategeeza abantu ebigambo ebyo; bwe baabiwulira bonna ne bakuba ebiwoobe.

⁵Mu kiseera ekyo Sawulo yali ava mu nnimiro ngʼagoberera ente ze ezirima, nʼabuuza nti, “Abantu babadde ki? Kiki ekibakaabya?” Ne bamutegeeza obubaka abasajja abʼe Yabesi bwe baali baleese.

⁶ⓐ Awo Sawulo bwe yawulira ebigambo ebyo, Omwoyo wa Katonda nʼamukkako mu maanyi, obusungu bwe ne bubuubuuka nnyo.

⁷ⓑ Nʼaddira ente bbiri, nʼazitemaatema, nʼaziwa ababaka ne bazitwala okubuna ensi yonna eya Isirayiri ngʼagamba nti, “Buli ataagoberere Sawulo ne Samwiri, ente ze ezirima bwe zityo bwe zinaakolebwa.” Entiisa ya Mukama nʼegwa ku bantu, ne bakuŋŋaana wamu nʼomutima gumu.

⁸ⓒ Sawulo nʼababalira e Bezeki, abasajja abaava mu Isirayiri nga bawera emitwalo amakumi asatu, nʼabaava mu Yuda ne bawera emitwalo esatu.

⁹Ne bagamba ababaka abaali bazze nti, “Mutegeeze abasajja abʼe Yabesugireyaadi nti, ‘Obudde we bunaatuukira mu ssaawa ezʼomu ttuntu, munaaba mulokolebbwa.’ ” Ababaka bwe bazzaayo obubaka obwo e Yabesi, abatuuze baayo ne bassa ekikkowe.

¹⁰Abatuuze abʼe Yabesi ne bagamba Abamoni nti, “Enkya tujja kwewaayo gye muli, mutukole kye mwagala.”

¹¹Enkeera Sawulo yakeera mu matulutulu nʼayawulamu abasajja be ebibinja bisatu; ne balumba olusiisira lwʼAbamoni ne babatta okutuusa mu ssaawa ezʼomu ttuntu. Abaaluwona ne basaasaana, ne wataba nʼomu asigala na munne.

¹²ⓓ Awo abantu ne bagamba Samwiri nti, “Ani eyali abuuza nti, ‘Sawulo alitufuga?’ Mubatuwe tubatte.”

¹³ⓔ Naye Sawulo nʼaddamu nti, “Nedda, tewali muntu anattibwa leero, kubanga olwa leero Mukama alokodde Isirayiri.”

¹⁴Awo Samwiri nʼagamba abantu nti, “Mujje, tugende e Girugaali tukakase obwakabaka.”

¹⁵Awo abantu bonna ne bagenda e Girugaali mu maaso ga Mukama ne bakakasa Sawulo okuba kabaka. Era mu kifo ekyo ne baweerayo ssaddaaka ezʼebiweebwayo olwʼemirembe mu maaso ga Mukama, Sawulo nʼAbayisirayiri bonna ne basanyuka ne bajaguza nnyo ne bakola nʼentujjo eyʼamaanyi.