1 Samwiri 13:1-23 LGCB2014 - Bible AI

¹ⓩ Sawulo yalina emyaka amakumi asatu we yaliira obwakabaka, nʼafuga Isirayiri okumala emyaka amakumi ana.

²Sawulo yalonda abasajja enkumi ssatu okuva mu Isirayiri, enkumi ebbiri ku bo ne babeera naye e Mikumasi ku lusozi olwʼe Beseri, nʼabalala lukumi ne babeera ne Yonasaani e Gibea ekya Benyamini. Abasajja abalala bonna nʼabasindika baddeyo ewaabwe.

³ⓐ Yonasaani nʼalumba olusiisira lwʼAbafirisuuti eyali e Geba, Abafirisuuti ne bakiwulira. Awo Sawulo nʼalagira, bafuuwe ekkondeere mu nsi yonna, ngʼagamba nti, “Abaebbulaniya bawulire!”

⁴Awo Isirayiri yenna bwe baawulira nga Sawulo awambye olusiisira lwʼAbafirisuuti, ate nga Isirayiri yali efuuse ekyenyinyalwa eri Abafirisuuti, abantu ne balagirwa okwegatta ku Sawulo e Girugaali.

⁵ⓑ Abafirisuuti ne beekuŋŋaanya okulwana nʼAbayisirayiri. Abafirisuuti baalina amagaali emitwalo esatu, nʼabeebagala embalaasi kakaaga, nʼabaserikale abeebigere ngʼomuwendo gwabwe gwenkana ngʼomusenyu ogwʼoku nnyanja obungi. Ne bayambuka ne basiisira e Mikumasi, ku luuyi olwʼebuvanjuba olwʼe Besaveni.

⁶ⓒ Abasajja Abayisirayiri bwe baalaba ngʼembeera yaabwe mbi nnyo, nʼeggye lyabwe nga linnyigirizibwa omulabe, ne beekweka mu mpuku, ne mu bisaka ne mu njazi, ne mu binnya.

⁷ⓓ Ne wabaawo nʼabamu ku Baebbulaniya abaasomoka Yoludaani ne bagenda mu nsi ya Gaadi ne Gireyaadi.

⁷Sawulo ye nʼasigala e Girugaali, nʼabaserikale bonna be yali nabo, naye nga bajjudde okutya.

⁸Nʼalinda okumala ennaku musanvu, ebbanga Samwiri lye yali amulaze, naye Samwiri nʼatajjirawo e Girugaali, nʼabasajja ba Sawulo ne batandika okumuvaako.

⁹Sawulo kyeyava ayogera nti, “Mundeetere wano ekiweebwayo ekyokebwa nʼekiweebwayo olwʼemirembe.” Nʼawaayo ekiweebwayo ekyokebwa.

¹⁰Naye bwe yali yakamala okuwaayo ekiweebwayo ekyokebwa, Samwiri nʼatuuka. Sawulo nʼagenda okumwaniriza.

¹¹Samwiri nʼamubuuza nti, “Kiki kino kyʼokoze?” Sawulo nʼaddamu nti, “Bwe nnalabye ngʼabasajja batandise okusaasaana, ate nga tozze mu kiseera kye walaga, ate nga nʼAbafirisuuti bakuŋŋaanira e Mikumasi,

¹²ne ndowooza nti, ‘Kaakano Abafirisuuti bagenda kukkirira okunnumba e Girugaali, nga sinnaba kwegayirira kufuna mukisa gwa Mukama, kyenvudde mpalirizibwa okuwaayo ekiweebwayo ekyokebwa.’ ”

¹³ⓔ Samwiri nʼagamba Sawulo nti, “Okoze kya busirusiru, obutakuuma kiragiro kya Mukama Katonda wo kye yakulagira. Singa wakikuumye, Mukama yandinywezezza obwakabaka bwo okufuga Isirayiri emirembe gyonna.

¹⁴ⓕ Naye kaakano obwakabaka bwo tebuliba bwa lubeerera. Mukama anoonyezzaayo omusajja alina omutima ogumunoonya era amulonze okuba omukulembeze wʼabantu be, kubanga tokuumye kiragiro kya Mukama.”

¹⁵Awo Samwiri nʼava e Girugaali nʼayambuka e Gibea mu Benyamini, Sawulo nʼabala abasajja abaali naye, nga baawera nga lukaaga.

¹⁶Sawulo ne mutabani we Yonasaani, nʼabasajja abaali nabo baali basiisidde e Gebea ekya Benyamini, ate ngʼAbafirisuuti bo basiisidde Mikumasi.

¹⁷Abalabe ne bava mu nkambi yʼAbafirisuuti mu bibinja bisatu, ekimu ne kyolekera Yofula, mu nsi ya Suwaali,

¹⁸ⓖ nʼekibinja ekirala ne kyolekera Besukolooni, nʼekyokusatu ne kyolekera ensalo etunuulidde ekiwonvu Zeboyimu okwolekera eddungu.

¹⁹ⓗ Mu nsi yonna eya Isirayiri temwali muweesi nʼomu, kubanga Abafirisuuti baali baasalawo nti, “Si kulwa ngʼAbaebbulaniya beeweeseza ebitala oba amafumu!”

²⁰Noolwekyo Abayisirayiri bonna baaserengetanga eri Abafirisuuti, okuwagala enkumbi zaabwe, nʼebiwabyo byabwe, nʼembazzi zaabwe, ne najjolo zaabwe.

²¹Baalinanga omuwendo gwe baasasulanga olwʼokuwagala enkumbi eyʼamannyo abiri nʼebiwabyo, nga gwa njawulo ku ogwo gwe baawangayo olwʼokuwagala embazzi nʼemiwunda.

²²Era ku lunaku olwʼolutalo tewaali muserikale nʼomu ku baali ne Sawulo ne Yonasaani, eyalina ekitala wadde effumu, okuggyako Sawulo ne mutabani we Yonasaani[23].

²³ⓘ Waaliwo ekibinja ekyʼAbafirisuuti ekyali kigenze mu kifo ekyayitibwanga Mikumasi.