1 Samwiri 17:1-58 LGCB2014 - Bible AI

¹ⓔ Awo Abafirisuuti ne bakuŋŋaanyiza eggye lyabwe e Soko ekya Yuda okulwana. Ne basiisira mu Efusudammimu ekiri wakati wa Soko ne Azeka.

²Sawulo nʼAbayisirayiri nabo ne bakuŋŋaana, bo ne basiisira mu kiwonvu Era, ne basimba ennyiriri okulwana nʼAbafirisuuti.

³Abafirisuuti ne bayimirira ku luuyi olumu olwʼolusozi, nʼAbayisirayiri ne bayimirira ku luuyi olulala olwʼolusozi, nga wakati waabwe waliwo ekiwonvu.

⁴ⓕ Mu lusiisira lwʼAbafirisuuti ne muva essajja eddene nga lizira erinnya lyalyo Goliyaasi[25], eryʼe Gaasi, ngʼobuwanvu bwalyo lyali mita ssatu nʼokusingawo.

⁵Lyalina enkuufiira eyʼekikomo ku mutwe gwalyo, nga lyambadde nʼekizibaawo ekyʼekikomo, nʼobuzito bwakyo bwali kilo ataano mu musanvu.

⁶Lyali lyambadde ebyʼebikomo ku magulu gaalyo, nga lirina effumu eryʼekikomo ku kibegabega kyalyo.

⁷Nʼolunyago lwʼeffumu lyalyo lwali ngʼomuti ogulukirwako engoye, nʼomutwe gwʼeffumu ogwʼekyuma ngʼobuzito bwagwo kilo musanvu. Eyasitulanga engabo ye yamukulemberangamu.

⁸Awo Goliyaasi nʼayimirira nʼaboggolera eggye lya Isirayiri nti, “Lwaki mwetegeka okulwana? Siri Mufirisuuti, ate mmwe temuli baddu ba Sawulo? Mulonde omusajja mu mmwe aserengete gye ndi.

⁹Bwʼanannwanyisa nʼanzita, kale tunaafuuka baddu bammwe, naye bwe nnaamuwangula ne mutta, munaafuuka baddu baffe era munaatuweerezanga.”

¹⁰Era Omufirisuuti nʼayongera okwogera nti, “Leero, nsomooza eggye lya Isirayiri! Mumpeeyo omusajja tulwane.”

¹¹Sawulo ne Isirayiri yenna bwe baawulira ebigambo ebyʼOmufirisuuti, ne bakeŋŋentererwa ne batya nnyo.

¹²ⓖ Dawudi yali mutabani wa Yese Omwefulasi owʼe Besirekemu mu Yuda.

¹³Yese yalina abaana munaana aboobulenzi, era mu biro ebyo ebya Sawulo yali akaddiye nnyo.

¹³Batabani ba Yese abakulu abasatu baali bagenze ne Sawulo mu lutalo. Omukulu ye yali Eriyaabu, owookubiri nga ye Abinadaabu, nʼowookusatu nga ye Samma.

¹⁴Dawudi ye yali omuto. Abasatu ne bagenda ne Sawulo,

¹⁵naye Dawudi nʼaddiŋŋananga ngʼava mu kulunda endiga za kitaawe e Besirekemu, ngʼagenda ewa Sawulo.

¹⁶Omufirisuuti nʼamala ennaku amakumi ana ngʼasoomooza Abayisirayiri enkya nʼakawungeezi.

¹⁷Yese nʼagamba mutabani we Dawudi nti, “Kwata ekkilo zino amakumi abiri ezʼeŋŋaano ensiike nʼemigaati gino ekkumi, oyanguwe okubitwalira baganda bo mu lusiisira lwabwe.

¹⁸ⓗ Ate ne bino ebitole ekkumi ebyʼamata (kiizi[26]) bitwalire omuduumizi wʼekibinja kyabwe. Olabe baganda bo nga bwe bali okomyewo obubaka obunaatugumya.

¹⁹Bali ne Sawulo nʼabasajja ba Isirayiri bonna mu kiwonvu Era, balwana nʼAbafirisuuti.”

²⁰Enkeera Dawudi nʼagolokoka mu makya nnyo, endiga nʼazirekera omusumba, nʼateekateeka ebintu bye yali atwala, nʼagenda nga Yese bwe yamulagira. We yatuukira mu lusiisira, ngʼeggye ligenda mu ddwaniro nga lirangirira olutalo.

²¹Isirayiri nʼAbafirisuuti baali basimbye ennyiriri, buli ggye nga lyolekedde linnaalyo.

²²Dawudi nʼalekera omukuumi wʼebikozesebwa ebintu bye, nʼadduka nʼagenda eri eggye, nʼalamusa ku baganda be.

²³Awo bwe yali ngʼakyʼanyumya nabo, Goliyaasi, Omufirisuuti omuzira owʼe Gaasi, ne yeesowolayo okuva mu ggye lyʼAbafirisuuti nʼasoomooza Abayisirayiri mu bigambo bye bimu bye yayogeranga. Dawudi nʼamuwulira.

²⁴Awo Abayisirayiri bwe baalaba omusajja ne batya ne bamudduka mu kutya okwʼekitalo.

²⁵ⓘ Ne bagamba nti, “Mulaba omusajja oyo avuddeyo? Mazima, azze okusoomooza Isirayiri. Omuntu alimutta, kabaka alimugaggawaza era alimuwa muwala we okumuwasa, era nʼennyumba ya kitaawe eneebanga ya ddembe mu Isirayiri.”

²⁶ⓙ Awo Dawudi nʼabuuza abasajja abaali bamuyimiridde okumpi nti, “Kiki ekirikolerwa omuntu alitta Omufirisuuti oyo, nʼaggya obuswavu buno ku Isirayiri? Omufirisuuti oyo atali mukomole yeeyita ani okusoomooza eggye lya Katonda omulamu?”

²⁷Ne bamuddiramu ebigambo bye bimu nti, “Bwʼatyo bwʼanaakolebwa omuntu anaamutta.”

²⁸Awo Eriyaabu, muganda wa Dawudi mukulu waabwe bwe yamuwulira ngʼayogera nʼabasajja, obusungu ne bumukwata, nʼamubuuza nti, “Kiki ekyakuleese wano? Ani gwe walekedde endiga ezo entono ku ttale? Mmanyi amalala go nʼekyejo kyʼolina mu mutima, waserengese kulaba bulabi lutalo.”

²⁹Dawudi nʼayogera nti, “Kaakano nkoze ki? Siyinza kubaako kye mbuuza? Mbuuzizza bubuuza.”

³⁰Nʼakyuka nʼabuuza omuntu omulala ekibuuzo kye kimu, mu ngeri yʼemu abasajja ne bamutegeeza ebigambo bye bimu nga bali abaasoose.

³¹Ebigambo Dawudi bye yayogera byawulirwa ne bituusibwa eri Sawulo; Sawulo nʼamutumya.

³²ⓚ Awo Dawudi nʼagamba Sawulo nti, “Waleme kubaawo muntu nʼomu aggwaamu mwoyo olwʼOmufirisuuti oyo. Omuweereza wo anaagenda nʼamulwanyisa.”

³³ⓛ Sawulo nʼamuddamu nti, “Toyinza kugenda kulwana na Mufirisuuti oyo; kubanga oli mulenzi bulenzi, songa ye abadde mulwanyi okuva mu buvubuka bwe.”

³⁴ⓜ Naye Dawudi nʼaddamu Sawulo nti, “Omuweereza wo amaze ebbanga ngʼalunda endiga za kitaawe, era bwe waabangawo empologoma oba eddubu eyajjanga nʼetwala omwana gwʼendiga okuva mu kisibo,

³⁵nagigobereranga, ne ngikuba, ne mponya omwana gwʼendiga nga nguggya mu kamwa kʼensolo eyo. Bwe yankyukiranga nʼeyagala okunzita, nga ngikwata oluba ne ngikuba ne ngitta.

³⁶Omuweereza wo yattako ku mpologoma nʼeddubu. Omufirisuuti ono atali mukomole anaaba ngʼemu ku zo, kubanga asoomozezza eggye lya Katonda omulamu.”

³⁷ⓝ Dawudi nʼayogera nti, “Mukama eyamponya enjala zʼempologoma nʼenjala zʼeddubu, alimponya ne mu mukono gwʼOmufirisuuti oyo.”

³⁷Awo Sawulo nʼagamba Dawudi nti, “Genda, era Mukama abeere naawe.”

³⁸Sawulo nʼayambaza Dawudi ebyambalo bye ebyʼolutalo; nʼamuwa ekizibaawo ekyʼekikomo, nʼamuteeka nʼenkuufiira eyʼekikomo ku mutwe.

³⁹Dawudi ne yeesiba ekitala kya Sawulo ku kyambalo, nʼagezaako okutambula, naye nʼalemererwa, kubanga yali tabimanyidde. Awo nʼagamba Sawulo nti, “Siisobole kugenda na bino kubanga sibimanyidde.” Nʼabyeyambulamu.

⁴⁰Nʼakwata omuggo mu mukono gwe, nʼalonda nʼamayinja amaweweevu ataano mu kagga, nʼagateeka mu nsawo ye eyʼomusumba. Nʼaddira nʼenvuumuulo ye mu mukono gwe nʼasemberera Omufirisuuti.

⁴¹Awo Omufirisuuti nʼomusajja eyasitulanga ebyokulwanyisa bye nga yamukulembeddemu, ne basemberera Dawudi.

⁴²ⓞ Omufirisuuti nʼatunuulira Dawudi nʼamunyooma kubanga yali mulenzi bulenzi, ngʼalabika bulungi ate nʼamaaso ge nga malungi.

⁴³ⓟ Nʼagamba Dawudi nti, “Ndi mbwa olyoke ojje gye ndi nʼemiggo?” Omufirisuuti nʼakolimira Dawudi nga bwakoowoola balubaale be.

⁴⁴ⓠ Omufirisuuti nʼagamba Dawudi nti, “Sembera wano, omubiri gwo nnaagugabira ennyonyi ezʼomu bbanga nʼensolo enkambwe ezʼomu nsiko.”

⁴⁵ⓡ Naye Dawudi nʼagamba Omufirisuuti nti, “Ojja gye ndi nʼekitala nʼeffumu, naye nze nzija gyʼoli mu linnya lya Mukama owʼeggye, Katonda wʼeggye lya Isirayiri gwʼosoomooza.

⁴⁶ⓢ Olwa leero Mukama anaakuwaayo mu mukono gwange, ne nkukuba era ne nkusalako omutwe. Olwa leero nnaagabira emirambo egyʼeggye eryʼAbafirisuuti eri ebinyonyi ebyʼomu bbanga nʼeri ensolo enkambwe ezʼensi, ensi yonna eryoke etegeere nga waliwo Katonda mu Isirayiri.

⁴⁷ⓣ Abo bonna abakuŋŋaanye wano banaategeera nga Mukama talokola na kitala wadde effumu, kubanga olutalo, lwa Mukama era mwenna agenda kubawaayo mu mukono gwaffe.”

⁴⁸ⓤ Awo Omufirisuuti bwe yali ngʼasembera okulumba Dawudi, Dawudi nʼadduka mbiro okumusisinkana.

⁴⁹Dawudi nʼaggya ejjinja mu nsawo ye nʼalivuumuula ne likwasa Omufirisuuti mu kyenyi; nʼagwa nga yeevuunise, nʼejjinja nga liyingidde mu kyenyi kye.

⁵⁰ⓥ Bwʼatyo Dawudi nʼawangula Omufirisuuti nʼenvuumuulo nʼejjinja, nʼamukuba nʼamutta nga Dawudi talina kitala kyʼakutte.

⁵¹Dawudi bwe yamala okutta Omufirisuuti, nʼadduka nʼamuyimirirako, nʼasowola ekitala kyʼOmufiisuuti okuva mu kiraato kyakyo, nʼamutemako omutwe nakyo. Awo Abafirisuuti bwe baalaba omuzira waabwe ngʼafudde ne badduka.

⁵²Abasajja ba Isirayiri ne Yuda ne bagolokoka nʼokuleekaana okungi ne bagoberera Abafirisuuti okutuuka e Gaasi ne ku miryango gya Ekuloni; abaafa nʼabaatuusibwako ebiwundu ne baba bangi mu kkubo okuva e Saalayimu okutuuka e Gaasi nʼe Ekuloni.

⁵³Awo Abayisirayiri bwe baakomawo okuva mu kugoberera Abafirisuuti, ne banyaga olusiisira lwʼAbafirisuuti.

⁵⁴Dawudi nʼasitula omutwe gwʼOmufirisuuti nʼaguleeta e Yerusaalemi, naye ebyokulwanyisa byʼOmufirisuuti nʼabiteeka mu weema ye.

⁵⁵Sawulo bwe yalengera Dawudi ngʼagenda okulwana nʼOmufirisuuti, nʼabuuza Abuneeri omuduumizi wʼeggye nti, “Abuneeri, oyo omuvubuka mutabani wʼani?” Abuneeri nʼamuddamu nti, “Nga bwʼoli omulamu, ayi kabaka, simanyi.”

⁵⁶Kabaka nʼayogera nti, “Genda onoonyereze bazadde bʼomuvubuka oyo.”

⁵⁷Amangu ddala nga Dawudi akomyewo ngʼasse Omufirisuuti, Abuneeri nʼamutwala mu maaso ga Sawulo, nga Dawudi asitudde omutwe gwʼOmufirisuuti mu mukono gwe.

⁵⁸Sawulo nʼamubuuza nti, “Muvubuka, oli mwana wʼani?” Dawudi nʼamuddamu nti, “Ndi mutabani wa muddu wo Yese Omubesirekemu.”