1 Samwiri 18:1-30 LGCB2014 - Bible AI

¹ⓦ Awo Dawudi bwe yamala okwogera ne Sawulo, Yonasaani nʼaba bumu ne Dawudi, era nʼamwagala nnyo nga bwe yali yeeyagala.

²Okuva ku lunaku olwo Sawulo nʼatwala Dawudi okubeera naye, nʼatamuganya kuddayo mu nnyumba ya kitaawe.

³Awo Yonasaani nʼatta omukago ne Dawudi kubanga yamwagala nnyo nga bwe yali yeeyagala yekka.

⁴Yonasaani ne yeeyambulamu ekyambalo kye yali ayambadde nʼekanzu ye, ne yeesumulula nʼekitala kye, nʼomutego gwe nʼolukoba lwe, nʼabiwa Dawudi.

⁵Buli kintu Sawulo kye yatumanga Dawudi, Dawudi nʼakituukirizanga bulungi nnyo, era Sawulo kyeyava amuwa ekifo ekyawaggulu mu magye. Ekyo ne kisanyusa abantu bonna, nʼabakungu ba Sawulo.

⁶ⓧ Awo abasajja bwe baali nga bakomawo eka, Dawudi ngʼamaze okutta Omufirisuuti, abakazi ne bava mu bibuga byonna ebya Isirayiri nga bayimba era nga bazina, okusisinkana kabaka Sawulo, nga bayimba ennyimba ezʼessanyu, nga balina ebitaasa nʼentongooli.

⁷ⓨ Baazinanga ate nga bwe bayimba nti,

⁷“Sawulo asse enkumi ze Dawudi nʼatta emitwalo gye.”

⁸Sawulo olwawulira ebigambo ebyo nʼasunguwala nnyo, era ne kimukola bubi nnyo. Nʼayogera nti, “Dawudi bamuwaanye nʼemitwalo, nze ne bampaana nʼenkumi; kiki kyʼataafune bwʼataalye bwakabaka?”

⁹Awo okuva mu kiseera ekyo Sawulo nʼakwatirwa Dawudi obuggya.

¹⁰Olunaku olwaddirira omwoyo omubi okuva eri Katonda ne gujja ku Sawulo nʼamaanyi mangi, nʼayogera ebyʼobunnabbi mu lubiri lwe, Dawudi nga bwʼakuba entongooli nga bwe yakolanga buli lunaku. Sawulo yalina effumu mu ngalo ze,

¹¹nʼalikasuka, ngʼayogera mu mutima gwe nti, “Kanfumite Dawudi mmukwasize ku kisenge.” Naye Dawudi nʼalyewoma emirundi ebiri.

¹²Awo Sawulo nʼatya Dawudi, kubanga Mukama yali wamu naye, kyokka ngʼavudde ku Sawulo.

¹³ⓩ Sawulo kyeyava aziyiza Dawudi okujja mu maaso ge nʼamufuula omuduumizi owʼabasajja olukumi, era olwʼomulimu ogwo ne yeeyongera okwatiikirira mu bantu.

¹⁴ⓐ Dawudi nʼafuna omukisa mu buli kye yakolanga, kubanga Mukama yali wamu naye.

¹⁵Awo Sawulo bwe yalaba Dawudi ngʼafuna emikisa, nʼamutya.

¹⁶ⓑ Naye Isirayiri yenna ne Yuda ne baagala Dawudi, kubanga yakulemberanga bulungi.

¹⁷Awo Sawulo nʼagamba Dawudi nti, “Nzija kukuwa muwala wange omukulu Merabu, abe mukyala wo, mpeereza nʼobuvumu era lwana entalo za Mukama.” Sawulo nʼateesa mu mutima gwe nti, “Kikafuuwe nze okugolola omukono gwange okumukolako akabi. Ekyo Abafirisuuti be balikikola.”

¹⁸ⓒ Naye Dawudi nʼagamba Sawulo nti, “Nze ani, nʼennyumba ye waffe be baani, era nʼekika kya kitange kye kiki mu Isirayiri, nze okuba mukoddomi wa kabaka?”

¹⁹ⓓ Naye ekiseera bwe kyatuuka omuwala wa Sawulo Merabu okuweebwa Dawudi, ne bamuwa Aduliyeri Omumekolasi okumuwasa.

²⁰Awo muwala wa Sawulo omulala Mikali yali ayagala Dawudi, era Sawulo bwe yakiwulira, nʼakisanyukira.

²¹Sawulo nʼalowooza mu mutima gwe nti, “Nzija kumumuwa afuuke omutego, omukono gwʼAbafirisuuti gulyoke gumuzikirize.” Sawulo kyeyava agamba Dawudi nti, “Kaakano ofunye omukisa ogwokubiri okuba mukoddomi wange.”

²²Awo Sawulo nʼalagira abaweereza be nti, “Mwogere ne Dawudi kyama mumugambe nti, ‘Laba, kabaka akusanyukira, ate nʼabaweereza be bonna bakwagala, noolwekyo beera mukoddomi wa kabaka.’ ”

²³Ebigambo ebyo ne babitegeeza Dawudi. Naye Dawudi nʼayogera nti, “Mulowooza nga kintu kitono okubeera mukoddomi wa kabaka? Nze ndi musajja mwavu atamanyiddwa nnyo.”

²⁴Abaweereza ba Sawulo ne bamutuusaako ebigambo bya Dawudi.

²⁵ⓔ Sawulo nʼaddamu nti, “Mugambe Dawudi nti, ‘Tewali kirala kabaka kyʼayagala okuggyako ebikuta byʼAbafirisuuti kikumi okwesasuza ku balabe be, nʼoluvannyuma onoowasa muwala we.’ ” Sawulo yali ayagala Dawudi attibwe Abafirisuuti.

²⁶Awo abaweereza be ne bagenda ne bategeeza Dawudi ebigambo ebyo, Dawudi nʼasanyuka nnyo okuba mukoddomi wa kabaka. Awo ekiseera ekiragaane nga tekinnaba na kuyitawo,

²⁷ⓕ Dawudi nʼabasajja be ne bagenda ne batta Abafirisuuti ebikumi bibiri. Nʼaleeta ebikuta byabwe, nʼawaayo omuwendo ogutuukiridde eri kabaka, alyoke abeere mukoddomi wa kabaka. Awo Sawulo nʼalyoka amuwa muwala we Mikali amuwase.

²⁸Naye Sawulo bwe yategeera nga Mukama ali wamu ne Dawudi, ate nga ne muwala we Mikali ayagala Dawudi,

²⁹Sawulo ne yeeyongera okumutya, era nʼaba mulabe wa Dawudi okuva mu kiseera ekyo.

³⁰ⓖ Abaduumizi bʼAbafirisuuti ne beeyongera okubatabaalanga, era buli lwe baabalumbanga, Dawudi nʼawangulanga okusinga nʼAbaserikale ba Sawulo abalala bonna. Erinnya lya Dawudi ne lyatiikirira nnyo.