1 Samwiri 19:1-24 LGCB2014 - Bible AI

¹ⓗ Awo Sawulo nʼagamba mutabani we Yonasaani, nʼabaweereza be bonna, batte Dawudi. Naye Yonasaani yayagalanga nnyo Dawudi,

²bwʼatyo nʼamulabula ngʼagamba nti, “Kitange Sawulo anoonya bwʼanaayinza okukutta. Weekuume enkya ku makya, weekweke mu kifo ekikusifu obeere eyo.

³Nnaagenda ne nnyimirira ne kitange mu nnimiro, wʼonoobeera, ne njogera naye ku bikukwatako, nʼoluvannyuma nzija kujja nkutegeeze bye nnaazuula.”

⁴ⓘ Awo Yonasaani nʼayogera bulungi ku Dawudi eri Sawulo kitaawe ngʼagamba nti, “Kabaka aleme okukola akabi ku muddu we Dawudi, kubanga talina kyakukoze, era akuweereza bulungi nnyo mu mirimu egyʼomugaso.

⁵ⓙ Yeewaayo nʼatta Omufirisuuti; Mukama nʼaleetera Isirayiri yenna, obuwanguzi obwʼekitalo, nʼokiraba nʼosanyuka. Lwaki oyigganya omuntu nga Dawudi ataliiko musango, nʼoyagala okumutta awatali nsonga?”

⁶Sawulo nʼawuliriza Yonasaani, era nʼamulayirira ngʼagamba nti, “Mukama nga bwʼali omulamu, Dawudi tajja kuttibwa.”

⁷Awo Yonasaani nʼayita Dawudi, nʼamutegeeza byonna. Nʼamuleeta eri Sawulo, Dawudi nʼaddamu nʼaweereza Sawulo ngʼolubereberye.

⁸Ne wagwawo olutalo nate, Dawudi nʼagenda okulwana nʼAbafirisuuti, nʼabakuba nʼatta bangi ku bo, abaasigalawo ne badduka.

⁹Awo omwoyo omubi okuva eri Mukama ne gujja ku Sawulo bwe yali ngʼatudde mu nnyumba ye, ngʼakutte effumu mu mukono, Dawudi bwe yali ngʼakuba entongooli.

¹⁰Sawulo nʼagezaako okumufumitira ku kisenge nʼeffumu, naye Dawudi nʼalyewoma, ne likwasa ekisenge. Ekiro ekyo Dawudi nʼadduka nʼawona.

¹¹Sawulo nʼatuma ababaka bagende bakuume ennyumba ya Dawudi, bamutte enkeera. Naye Mikali mukyala wa Dawudi nʼamulabula nʼamugamba nti, “Bwʼotodduke kiro kino, bwe bunaakya bajja kukutta.”

¹²ⓚ Awo Mikali nʼassiza Dawudi mu ddirisa, nʼadduka nʼagenda ne yeekweka.

¹³Mikali nʼaddira ekifaananyi ekyole nʼakiteeka ku kitanda, nʼakibikkako olugoye, nʼassa nʼebyoya ebyʼembuzi ku mutwe gwakyo.

¹⁴Awo Sawulo bwe yatumayo ababaka okuwamba Dawudi, Mikali nʼabagamba nti, “Mulwadde.”

¹⁵Sawulo nʼabatuma baddeyo bamulabe era nʼabalagira nti, “Mumundeetere mu kitanda kye, mmutte.”

¹⁶Naye abasajja bwe bagenda yo, ne balaba ekifaananyi ekyole mu kitanda, nga ne ku mutwe kuliko ebyoya byʼembuzi.

¹⁷Sawulo nʼabuuza Mikali nti, “Lwaki wannimbye bwʼotyo, nʼoleka omulabe wange okudduka, nʼokuwona nʼawona?” Mikali nʼamuddamu nti, “Yaŋŋambye nti, ‘Bwʼotondeke kugenda nzija kukutta.’ ”

¹⁸Awo Dawudi nʼaddukira eri Samwiri e Laama, nʼamutegeeza byonna Sawulo bye yamukola. Ye ne Samwiri ne bagenda e Nayosi ne babeera eyo.

¹⁹Sawulo nʼategeezebwa nti, “Dawudi ali Nayosi mu Laama;”

²⁰ⓛ nʼatuma ababaka okumuwamba. Naye bwe baalaba ekibiina kya bannabbi nga boogera ebyʼobunnabbi, nga Samwiri ye mukulembeze waabwe, Omwoyo wa Katonda nʼakka ku basajja ba Sawulo, nabo ne baba nga bali.

²¹Awo Sawulo bwe yategeezebwa ekibaddewo, nʼatuma ababaka abalala nabo ne baba nga bali. Sawulo nʼatuma ekibinja ekyokusatu, era nabo ne baba nga bali.

²²Ekyavaamu, ye yennyini kwe kugenda e Laama, nʼatuuka awali oluzzi olunene oluli e Seku, nʼabuuza nti, “Samwiri ne Dawudi bali ludda wa?” Ne bamuddamu nti, “Bali Nayosi mu Laama.”

²³ⓜ Awo Sawulo nʼagenda e Nayosi mu Laama, naye Omwoyo wa Mukama nʼamukkako, nʼatambula ngʼayogera ebyʼobunnabbi okutuuka e Nayosi.

²⁴ⓝ Ne yeyambula ebyambalo bye, nʼatandika okwogera nga bannabbi mu maaso ga Samwiri. Nʼabeera bwʼatyo olunaku lwonna nʼokuzibya obudde. Abantu kyebaava boogera nti, “Ne Sawulo ali mu bannabbi?”