1 Samwiri 2:1-36 LGCB2014 - Bible AI

¹ⓙ Awo Kaana nʼasaba mu bigambo bino nti, “Omutima gwange gusanyukira Mukama; amaanyi gange geenyumiririza mu Mukama Katonda. Akamwa kange kasekerera abalabe bange, kubanga essanyu lyange liri mu bulokozi bwo.”

²Tewali mutukuvu nga Mukama Katonda tewali mulala wabula ggwe; tewali Lwazi oluli nga Katonda waffe.

²

³Toyogera nate nga weewaanawaana wadde okuleka akamwa ko okwogera ebyʼamalala, kubanga Mukama Katonda yʼamanyi byonna, era yʼapima ebikolwa.

³

⁴ⓚ Emitego egyʼabʼamaanyi gimenyebbwa naye abanafu baweereddwa amaanyi.

⁵Abo abakkutanga, be bapakasa okufuna emmere naye abo abeetaaga, tebakyalumwa njala. Eyali omugumba azadde abaana musanvu, nʼoyo alina abaana abangi, asobeddwa.

⁵

⁶Mukama Katonda yʼaleeta okufa, era yʼawa obulamu; atwala emagombe ate nʼazuukiza.

⁷Mukama Katonda yʼayavuwaza era yʼagaggawaza; atoowaza ate nʼagulumiza.

⁸Ayimusa abaavu okuva mu nfuufu; asitula abali mu bwetaavu okuva mu ntuumu yʼevvu; nʼabatuuza nʼabalangira, era ne basikira entebe eyʼekitiibwa. Kubanga emisingi gyʼensi gya Mukama Katonda, era okwo kwʼatuuzizza ensi.

⁸

⁹Anaakuumanga ebigere byʼabatukuvu be, naye ababi balisirisibwa mu kizikiza;

⁹kubanga omuntu tawangula lwʼamaanyi.

¹⁰Abalabe ba Mukama Katonda balisaasaanyizibwa; alibabwatukira ngʼasinziira mu ggulu; Mukama alisalira ensonda ezʼensi omusango;

¹⁰aliwa kabaka we amaanyi, era nʼagulumiza amaanyi gʼoyo gwe yafukako amafuta.

¹¹Awo Erukaana nʼaddayo ewuwe e Lama, naye omwana nʼasigala ngʼaweereza Mukama Katonda, ngʼalabirirwa Eri.

¹²Batabani ba Eri baali basajja ba mpisa mbi, nga tebatya Mukama Katonda,

¹³Omuntu yenna bwe yawangayo ssaddaaka, omuweereza wa kabona yajjanga, ngʼakutte ewuuma eyʼamannyo asatu ngʼennyama ekyatokosebwa,

¹⁴nʼasonseka ewuuma mu nsaka oba mu bbinika, oba mu ntamu, oba mu sefuliya, era ebyo byonna ewuuma bye yakwasanga, kabona bye yeetwaliranga. Bwe batyo bwe baakolanga Abayisirayiri bonna abajjanga okusinziza e Siiro.

¹⁵Ate amasavu bwe gaabanga tegannayokebwa, omuweereza wa kabona yajjanga nʼagamba omuntu awaayo ssaddaaka nti, “Kabona muwe ku nnyama ayokye, kubanga tajja kukkiriza kutwala nnyama nfumbe ayagala mbisi yokka[4].”

¹⁶Omusajja bwe yamuddangamu nti, “Leka bamale okwokyako amasavu, olyoke otwale yonna gyʼoyagala,” omuweereza yaddangamu nti, “Nedda, oteekwa okugimpa kaakano, bwe kitaba bwe kityo, nzija kugitwala lwʼamaanyi.”

¹⁷Ekibi kyʼabavubuka abo ne kiba kinene nnyo mu maaso ga Mukama, kubanga baanyoomanga ekiweebwayo kya Mukama Katonda.

¹⁸Samwiri nʼaweerezanga mu maaso ga Mukama Katonda nga mulenzi muto, eyayambalanga ekkanzu eyʼobwakabona eya bafuta.

¹⁹Nnyina nʼamukolelanga ekyambalo nʼakimutwaliranga, bwe yabanga ayambuse ne bba okuwaayo ssaddaaka eya buli mwaka.

²⁰Eri nʼawa Erukaana ne mukyala we omukisa, ngʼayogera nti, “Mukama Katonda abawe abaana okudda mu kifo kyʼoyo mukazi wo ono gwe yasaba, nʼamuwaayo ngʼekirabo eri Mukama.” Nʼoluvannyuma baddayo eka.

²¹Mukama nʼaba wa kisa eri Kaana, nʼazaala abaana aboobulenzi basatu, nʼaboobuwala babiri. Omuvubuka Samwiri nʼakulira mu maaso ga Mukama.

²²Awo Eri eyali akaddiye ennyo, nʼawulira ebyo byonna batabani be bye baakolanga Abayisirayiri bonna, ne bwe beetabanga nʼabakyala abaweerezanga ku mulyango gwʼEweema eyʼOkukuŋŋaanirangamu.

²³Nʼabagamba nti, “Kiki ekibakoza ebifaanana bwe bityo? Bye mpulira okuva eri abantu bano bonna nga si birungi.

²⁴Nedda, baana bange; ebigambo bye mpulira ebisaasaana mu bantu ba Mukama si birungi nʼakatono.

²⁵Omuntu bwʼayonoona eri muntu munne, Katonda[5] ayinza okubatabaganya, naye omuntu bwʼayonoona eri Mukama, ani anaamwegayiririra?” Naye ne batawuliriza bigambo bya kitaabwe, kubanga Mukama yali asazeewo okubazikiriza.

²⁶Awo omuvubuka Samwiri ne yeeyongera okukula, nʼaba muganzi eri Mukama nʼeri abantu.

²⁷Awo ne wabaawo omusajja wa Katonda eyajja eri Eri, nʼamugamba nti, “Bwʼati bwʼayogera Mukama nti, ‘Sseeraga bulungi eri ennyumba ya jjajjaawo mu Misiri bwe baali bafugibwa Falaawo?

²⁸Nalonda jjajjaawo okuva mu bika byonna ebya Isirayiri okuba kabona wange, okwambukanga ku kyoto kyange, okwoterezangako obubaane, nʼokwambalanga ekkanzu eyʼobwakabona eya bafuta mu maaso gange. Era ne mpa ennyumba ya jjajjaawo ebiweebwayo byonna ebyokebwa Abayisirayiri.

²⁹Lwaki munyooma ssaddaaka yange nʼekiweebwayo kyange bye nalagira, okuweebwangayo mu yeekaalu yange? Lwaki ossaamu batabani bo ekitiibwa okunsinga, nga mweddiza ebitundu ebisinga obusava ku buli kiweebwayo abantu bange, Isirayiri, kye bawaayo?’

³⁰“Mukama Katonda wa Isirayiri kyava ayogera nti, ‘Nasuubiza nti ennyumba yo nʼennyumba ya jjajjaawo be banaaweerezanga mu maaso gange ennaku zonna;’ naye kaakano Mukama agamba nti, ‘Kikafuuwe! Abanzisaamu ekitiibwa bennassangamu ekitiibwa, naye abo abonnyooma banaaswazibwanga.

³¹Laba ekiseera kijja lwe ndikumalamu amaanyi era nʼennyumba ya jjajjaawo nayo ne ngimalamu amaanyi, waleme okubaawo nʼomu aliwangaala okutuuka mu bukadde,

³²olyoke olabire ennaku mu nnyumba yange. Newaakubadde Isirayiri erifuna omukisa, tewalibaawo nʼomu ku bʼomu nnyumba yo aliwangaala nʼakaddiwa.

³³Omuntu yekka ku bantu bo gwe siizikirize, gwe ndikkiriza okumpeereza ku kyoto kyange, alisigalawo kukulabya nnaku, na kukunakuwaza mu mutima, na kukukaabya maziga; era bazzukulu bo bonna banaafanga nga kye bajje bavubuke.’

³⁴“ ‘Ekirituuka ku batabani bo, Kofuni ne Finekaasi, ke kaliba akabonero gyʼoli era bombi balifa ku lunaku lumu.

³⁵Ndyeyimusiza kabona omwesigwa, aligoberera ebiri mu mutima gwange ne mu mmeeme yange. Ndinywereza ddala ennyumba ye, era aliweerezanga ennaku zonna mu maaso gʼoyo gwe ndifukako amafuta.

³⁶Era buli aliba asigaddewo ku bʼomu nnyumba yo alijja nʼamuvuunamira ngʼamusaba ekitundu kya ffeeza nʼomugaati ngʼayogera nti, “Nkwegayiridde nnonda okuba omu ku bakabona, nsobole okufuna ekyokulya.” ’ ”