1 Samwiri 20:1-42 LGCB2014 - Bible AI

¹Awo Dawudi nʼadduka okuva e Nayosi mu Laama nʼagenda eri Yonasaani, nʼamubuuza nti, “Nkoze ki? Nazza musango ki? Kibi ki kye nakola ekiyagazisa kitaawo okunzita?”

²Yonasaani nʼaddamu nti, “Kikafuuwe! Togenda kuttibwa. Laba kitange talina kyʼakola, kakibe kinene oba kitono, nga tantegeezezza. Kiki ekyandimuleetedde okukinkisa ekyo? Tekiriiwo.”

³ⓞ Naye Dawudi nʼamulayirira ngʼayogera nti, “Kitaawo akimanyi bulungi nti onjagala, era alowooza mu mutima gwe nti, ‘Yonasaani tateekwa kumanya nsonga eyo, kubanga ajja kunakuwala.’ Mukama nga bwʼali omulamu, era naawe ngʼoli mujulirwa, ndi wakati mu kufa.”

⁴Awo Yonasaani nʼagamba Dawudi nti, “Buli kyʼoyagala nkukolere, nnaakikukolera.”

⁵ⓟ Dawudi nʼagamba Yonasaani nti, “Enkya mbaga eyʼokujuukirirako omwezi nga gubonese era nsubirwa okuliira awamu ne kabaka, naye nzikiriza ŋŋende ne kweke mu nnimiro okutuusa ku lunaku olwokusatu akawungeezi nga wayiseewo ennaku bbiri.

⁶Kitaawo bwʼanambuuza, mugambe nti, ‘Dawudi yansabye, agende e Besirekemu, mu kibuga kye waabwe, kubanga waliwo ssaddaaka eya buli mwaka eneeweebwayo ku lwʼennyumba ye yonna.’

⁷Bwʼanaakuddamu nti, ‘Kirungi,’ olwo nno omuweereza wo anaaba mirembe. Naye bwʼanaanyiiga, kale onootegeera nti amaliridde okunkola akabi.

⁸ⓠ Noolwekyo beera wa kisa eri omuweereza wo, kubanga wakola endagaano nʼomuweereza wo mu maaso ga Mukama. Naye oba nnina omusango, gwʼoba onzita. Lwaki ompaayo eri kitaawo?”

⁹Yonasaani nʼayogera nti, “Tekiribaawo! Singa nnali ntegedde nga kitange amaliridde okukukola akabi, sandikubuulidde?”

¹⁰Awo Dawudi nʼamubuuza nti, “Ani anantegeeza, kitaawo ngʼakuzzeemu nʼobusungu?”

¹¹Yonasaani nʼamugamba nti, “Jjangu tulage mu nnimiro.” Awo bombi ne balaga mu nnimiro.

¹²Awo Yonasaani nʼagamba Dawudi nti, “Mukama, Katonda wa Isirayiri, abeere mujulirwa waffe; nzija kugezaako okumatiza kitange enkya oba okwosa enkya ku ssaawa nga zino. Bwʼanaaba nga takuliiko nsonga, kiki ekinandobera okukumanyisa?

¹³ⓡ Naye kitange bwʼanaaba ngʼamaliridde okukukola akabi, kale Mukama ankole bwʼatyo, nʼokusingawo, bwe siikutegeeze ne nkusindika ogende weekweke. Mukama abeere naawe, nga bwʼabadde ne kitange.

¹⁴Bwe nnaaba omulamu, ondage ekisa kya Mukama ekitakoma, ennaku zonna ezʼobulamu bwange, nneme okuttibwa,

¹⁵tokendeezanga ku kisa so tolekangayo kulaga bwesigwa eri ennyumba yange, Mukama ne bwʼalizikiriza buli mulabe wa Dawudi ku nsi.”

¹⁶Awo Yonasaani nʼakola endagaano nʼennyumba ya Dawudi ngʼagamba nti, “Mukama abonereze abalabe ba Dawudi.”

¹⁷Yonasaani nʼalayiza Dawudi nate okukakasa ekirayiro kye, olwʼokwagala kwe yamwagala kubanga yamwagala nga bwe yali yeeyagala.

¹⁸Yonasaani nʼagamba Dawudi nti, “Enkya mbaga eyʼokujuukirirako omwezi nga gubonese, naye tunaakusaalirwa, kijja kutegeerekeka nti toliiwo, kubanga ekifo kyo kinaaba kyereere.

¹⁹Okwosa enkya, obudde nga bunaatera okuziba, genda mu kifo mwe weekweka luli, ebizibu bino bwe byatandika, obeere awali ejjinja Ezeri.

²⁰Nnaalasa obusaale busatu ku mabbali gaalyo, ngʼateeba ssabbaawa.

²¹ⓢ Nʼoluvannyuma nzija kutuma omulenzi nga mugamba nti, ‘Genda onoonye obusaale.’ Bwe naamugamba nti, ‘Laba, obusaale buli ku luuyi gyʼoli, buleete,’ kale onojja, kubanga Mukama nga bwʼali omulamu, onoolama, era tewaabeewo kabi.

²²Naye bwe nnaagamba omulenzi nti, ‘Laba, obusaale buli mu maaso,’ kale onoogenda, kubanga olwo Mukama ngʼakugambye ogende.

²³Era ne ku bigambo bye twayogerako, Mukama abeere naffe ennaku zonna.”

²⁴Awo Dawudi ne yeekweka mu nnimiro. Embaga eyʼokujuukirirako omwezi nga gubonese bwe yatuuka, kabaka nʼatuula okulya.

²⁵Nʼatuula mu kifo kye ekya bulijjo okumpi nʼekisenge okwolekera Yonasaani. Abuneeri nʼatuula okuliraana Sawulo, naye ekifo kya Dawudi kyali kyereere.

²⁶ⓣ Sawulo nʼatabaako kyayogera ku lunaku olwo, kubanga yalowooza nti, “Waliwo ekituuse ku Dawudi ne kimufuula atali mulongoofu; ddala si mulongoofu.”

²⁷Olunaku olwaddirira, omwezi nga gumaze okuboneka, ekifo kya Dawudi ne kisigala nga kyereere. Awo Sawulo nʼabuuza mutabani we Yonasaani nti, “Kiki ekyalobedde mutabani wa Yese okujja ku kijjulo, olunaku lwa jjo newaakubadde leero?”

²⁸Yonasaani nʼaddamu nti, “Dawudi yanneegayiridde mukkirize agende e Besirekemu,

²⁹ngʼayogera nti, ‘Nzikiriza ŋŋende kubanga ennyumba yaffe balina ssaddaaka eyʼokuwaayo mu kibuga, ne muganda wange yandagidde mbeere yo. Kale nno obanga ndabye ekisa mu maaso go, nzikiriza ŋŋende ndabe baganda bange.’ Kyeyavudde tabeerawo ku mmeeza ya kabaka.”

³⁰Awo Sawulo nʼannyiigira nnyo Yonasaani, nʼamugamba nti, “Ggwe omwana wʼomukazi omukyamu era omujeemu! Olowooza sikimanyi nga weekobaana ne mutabani wa Yese okweleetako okuswala, nʼokukwasa maama wo eyakuzaala ensonyi?

³¹Mutabani wa Yese ngʼakyali mulamu ku nsi, tolinywezebwa ggwe newaakubadde obwakabaka bwo. Kaakano mutumye omundeetere, kubanga ateekwa okufa.”

³²ⓤ Awo Yonasaani nʼaddamu kitaawe Sawulo nti, “Kiki ekimugwanyiza okuttibwa? Akoze ki?”

³³Naye Sawulo nʼamukasuukirira effumu amutte. Awo Yonasaani we yategeerera nga kitaawe amaliridde okutta Dawudi.

³⁴Yonasaani nʼasituka ku mmeeza mu busungu obungi, era nʼatalya mmere ku lunaku olwokubiri olwʼomwezi, kubanga yanakuwalira ekikolwa kya kitaawe ekyʼobuswavu eri Dawudi.

³⁵Ku makya Yonasaani nʼalaga mu nnimiro okusisinkana Dawudi, nga bwe baali balagaanye. Yalina akalenzi ke yagenda nako,

³⁶nʼakagamba nti, “Dduka onoonye obusaale bwe nnaalasa.” Akalenzi bwe kaali nga kadduka, Yonasaani nʼalasa akasaale mu maaso gaako ne kamusookayo.

³⁷Awo akalenzi bwe kaatuuka mu kifo akasaale we kaali kagudde, Yonasaani nʼakakoowoola ngʼagamba nti, “Akasaale tekali mu maasoko?”

³⁸Nʼakangula ku ddoboozi, nʼamugamba nti, “Yanguwa, genda mangu, tolwawo.” Akalenzi ne kakima akasaale, ne kakomawo eri mukama waako.

³⁹Naye akalenzi ne katabaako kye kategeera. Yonasaani ne Dawudi bokka be baamanya enteekateeka eyo.

⁴⁰Awo Yonasaani nʼakwasa akalenzi ebyokulwanyisa bye, nʼakagamba nti, “Genda, obizzeeyo mu kibuga.”

⁴¹Akalenzi bwe kaamala okugenda, Dawudi nʼavaayo mu kifo ekyʼobukiikaddyo, nʼagwa wansi mu maaso ga Yonasaani nʼamuvuunamira emirundi esatu. Ne bagwaŋŋana mu bifuba ne bakaaba, naye Dawudi ye yasinga okukaaba.

⁴²Awo Yonasaani nʼagamba Dawudi nti, “Genda mirembe, kubanga fembi twelayirira omukwano mu linnya lya Mukama nga twogera nti, ‘Mukama ye mujulirwa wakati wo nange, ne wakati wʼezzadde lyo nʼezzadde lyange emirembe gyonna.’ ” Dawudi nʼagenda, ne Yonasaani nʼaddayo mu kibuga.