1 Samwiri 24:1-22 LGCB2014 - Bible AI

¹Awo Sawulo bwe yakomawo ngʼava okugoba Abafirisuuti, ne bamutegeeza nti, “Dawudi ali mu ddungu erya Engedi.”

²Sawulo nʼalonda abasajja enkumi ssatu okuva mu Isirayiri yenna, nʼagenda nabo okunoonya Dawudi nʼabasajja be, ku luuyi olwʼenjazi embulabuzi gye Zaabeeranga.

³ⓢ Sawulo nʼatuuka okumpi nʼawaali ebisibo byʼendiga ebyali ku mabbali gʼekkubo, nʼalaba empuku, nʼayingira omwo okuwummulako. Dawudi nʼabasajja be baali mu mpuku omwo mu bifo ebikomererayo.

⁴Awo abasajja ba Dawudi ne bamugamba nti, “Luno lwe lunaku Mukama lwe yayogerako bwe yagamba nti, ‘Ndiwaayo omulabe wo mu mukono gwo, omukole nga bwʼosiima.’ ” Dawudi nʼasooba mpola nʼasala ku kirenge kyʼekyambalo kya Sawulo.

⁵ⓣ Naye oluvannyuma Dawudi nʼawulira okulumirizibwa mu mutima olwʼokusala ku kirenge kyʼekyambalo kya Sawulo.

⁶Nʼagamba abasajja be nti, “Kikafuuwe, nze okukola mukama wange ekintu ekifaanana bwe kityo, Mukama gwe yafukako amafuta, wadde okumugololerako omukono, kubanga Mukama yamufukako amafuta.”

⁷ⓤ Nʼebigambo ebyo Dawudi nʼaziyiza abasajja be nʼatabakkiriza kulumba Sawulo. Awo Sawulo nʼava mu mpuku, nʼagenda.

⁸Oluvannyuma, Dawudi naye nʼafuluma empuku, nʼakoowoola Sawulo ngʼayogera nti, “Mukama wange kabaka!” Awo Sawulo nʼakyuka nʼatunula emabega, Dawudi nʼavuunama nʼakka wansi ne yeeyala ku ttaka.

⁹ⓥ Dawudi nʼagamba Sawulo nti, “Lwaki owuliriza eŋŋambo zʼabantu aboogera nti, ‘Dawudi amaliridde okukukola akabi?’

¹⁰Leero okirabye nʼamaaso go, Mukama bwʼakumpadde mu mukono gwange ngʼoli mu mpuku. Wabaddewo ababadde banneegayirira nkutte, naye ne sibawuliriza. Nagambye nti, ‘Sijja kugolola mukono gwange ku mukama wange, kubanga Mukama yamufukako amafuta.’

¹¹ⓦ Kitange laba, akatundu ke naggye ku kirenge kyʼekyambalo kyo. Nasaze busazi ku kyambalo kyo naye ne sikutta. Kaakano kitegeere era okimanye nga sikusobyanga newaakubadde okukujeemera. Sinnakusobya newaakubadde ngʼonjigganya okunzita.

¹²Mukama alamule wakati wange naawe. Mukama akusasule ngʼebikolwa ebibi byonna byʼonkoze bwe biri, naye nze siriyimusa mukono gwange ku ggwe.

¹³ⓧ Ngʼolugero olwʼabʼedda bwe baalugera nti, ‘Mu babi mwe muva akabi,’ kyendiva sikuyimusiza mukono gwange.

¹⁴ⓨ Kabaka wa Isirayiri ajjiridde ani? Ani gwʼoyigganya? Mbwa nfu oba nkukunyi?

¹⁵ⓩ Mukama atulamule, asalewo wakati wo nange. Mukama atunuulire ensonga yange andokole mu mukono gwo.”

¹⁶Awo Dawudi bwe yamala okwogera ebigambo ebyo, Sawulo nʼabuuza nti, “Eryo ddoboozi lyo, Dawudi mutabani wange?” Sawulo nʼakuba ebiwoobe.

¹⁷ⓐ Nʼagamba Dawudi nti, “Ggwe oli mutuukirivu okunsinga, kubanga onsasudde bulungi, newaakubadde nga nze nkuyisizza bubi.

¹⁸Leero ontegeezezza bwʼonkoze obulungi, bwʼotanzise ate nga Mukama yampaddeyo mu mukono gwo.

¹⁹Omuntu bwʼasiŋŋaana omulabe we, ayinza okumuganya okugenda nga tamutuusizzaako bisago? Kale Mukama akusasule bulungi olwʼekikolwa kyʼonkoze leero.

²⁰Kaakano ntegeeredde ddala ngʼonoobeera kabaka, era nʼobwakabaka bwa Isirayiri bulinywezebwa mu mukono gwo.

²¹ⓑ “Kale nno ndayirira eri Mukama, nga tolizikiriza bazzukulu bange newaakubadde okusaanyaawo erinnya lyange mu nnyumba ya kitange.”

²²Awo Dawudi nʼalayirira Sawulo. Sawulo nʼaddayo ewuwe, naye Dawudi ne basajja be ne baddayo mu kifo gye baali beekwese.